Monday, November 12

في العشه...أنا ديك


السلام عليكم و رحمه الله و بركاته
إفتكرت النهارده إن أنا كان عنديه مدونه ...!! تخيلوا أنا فعلاً كنت نسيت خالص التدوين و المودونات...بقالي كتير قوي مكتبتش...و مكنتش ناوي أكتب
مع إني بتكلم مع نفسي كتير قوي اليومين دول...و بصراحه بقيت مشحون كفايا...صراعات في الشغل وقرف في كل حته حواليا...لدرجة تخليك شاكك حتي في صوابع إيديك...حتي أقرب الناس مني...و أقربهم مني ديه حتي مش علي مستوي الصله أو قوه العلاقه ... ده أنا قصدي بيها المسافه...تخيلوا أنا ممكن أكون عامل إزاي دلوقتي... :D
المهم .. بعض الناس اللي بعرفهم أصبحوا حمل تقيل عليا...عارفين لما يكون في ناس بيخلوك تطلع أوحش حاجه عندك...و مش مدينك فرصه تبقي كويس معاهم و بعدين يلوموا عليك....قال إيه أصل إنت مش كويس
يعني لما أدافع عن حقي و أصد أي محاوله لهضمي...و أقف قصاد عنفك و كيدك بالمرصاد أبقي وحش أنا و مش كويس...شوفوا إزاي...صحيح ضربني و بكي و سبقني و إشتكي...!!! و عجبي
المهم...مش المفروض إن أول حاجه أكتبها من زمان تبقي كلام نكد كده و حاجات إنتوا ملكوش ذنب أوجع دماغكوا بيها.
علي فكره أنا برده بدافع بعنف...مش غلبان يعني...و ممكن أكون برد الطاق طاقين ... علشان بس أنا بحب أبقي منصف و لما أحكي أحكي بالظبط
بس أنا في رد فعلي اللي انا بعترف إنه ممكن يكون عنيف بكون بدافع بس عن حقي...و برفع إيدك من علي حاجتي...يعني ممكن و أنا برفعها أكسرها...بس ده في الأصل مش ذنبي...إنت اللي غلط و فكرت و حاولت و دبرت و خططت...يبقي إستحمل و مانتاش قد اللعب متلعبش يا قط
أنا و الله عمري م أتمني الأذي لحد و لا أسعي في إعاقه أو الجور علي حق حد....بس عن حقي لازم أدافع...و لما يبقي كل هدفك مصلحتك و بس و حتي لو جت علي حساب حد غيرك....يبقي إسمحلي مسقفش و لا أقف متكتف لما الضرر يجيلي.
معلش لو كلنا هنبقي في عشه واحده...أنا مش هعرف أبقي فيها غير ديك...بس معنديش مانع تكون إنت كمان ديك...بس متفكرش يا ديك و عقلك يوزك تخطي بره حدودك و تمد
جناحك علي غير عشك
عشان يا ديك...أنا برده ديك...فاهمني...!؟
مكنتش مرتب و لا كلمه من الكلام ده.....بس أهو جه....و جايز لما يطلع حده الصراع تخف...!!
و مش عارف إذا كان حد فيكم فهمني و لا لأ...عموماً محدش يزعل من البوست
و حقكوا عليا

13 comments:

ma_3alina said...

الحمد لله على كل حال

الحمد لله على سلامتك .. والله انا فرحان فرحان فرحان إنك افتكرت مدونتك .. ولو تعرف انت غيابك اثر في ناس كتير ازاي مكنتش تفكر تهجر مدونتك الفترة دي كلها

أنا مش فاهم أي حاجة من اللي مكتوب .. بس شكله كلام كويس .. وأرجو ألا يكون موجه لأحد يقرأه

اسأل الله عز وجل أن يزيح العداوة والبغضاء من قلوب العباد .. ولا تقاطع مدونتك وزواره يا أخي ..

Anonymous said...

السلام عليكم ورحمه الله و بركاته
كيف الحال اخي
اسال الله العظيم رب العرش الكريم ان تكون علي خير و علي طاعه و ان يجري الحق علي قلبك و علي لسانك
...
ايه الغيبه دي كلها..
يا اخي اكتب اي حاجه
حتي كلامك اللي مش واضح (شويه(
..كلام هيكون طيب زيك ان شاء الله

قل...ربي اني مغلوب فنتصر
فصبر جميل و الله المستعان علي ما تصفون

عصفور المدينة said...

حمدا لله على سلامتك ولعل لا يكون حد إيده اتكسرت وبعدين انت قبل كدة كنت بتقول إنك في الحياة العادية هادي
:)
على كل تمثل قول الله عز وجل

ولمن انتصر من بعد ظلمه فأولئك ما عليهم من سبيل

وأيضا
ولمن صبر وغفر إن ذلك لمن عزم الأمور


وايضا

وإن عاقبتم فعاقبوا بمثل ما عوقبتم به

Anonymous said...

اخي بالله عليك محتاج الدعاء ان ينصرني الله علي من ظلمنا و ان ينتقم منه في الدنيا و الاخره و ان يرد الحق الينا
بالله عليك محتاج الدعاء..ليس لنا الا ان ندعوا ..فهو سبحانه علي كل شيء قدير

ض/خالد said...

ايه يا سيدي
انت فينك
انت معتكف كده من رمضان لحد ذو القعدة؟؟؟
لو كده ...دي بدعة يا راجل...

الحقيقة أنا مش زعلان من البوست ولا حاجة....

وعادي يعني
لاني عارف اني مش المقصود بيه :)
وكمان معرفشي من المقصود...
فعشان كده أنا مش زعلان منك...

وابسط ياعم فيه واحد مش زعلان منك أهه

:(

ammola said...

والله انا فهمت كلامك
وأحيانا باتمنى فى مواقف أكون فيها مظلومة-وهى كتير أوى-انى اكون زيك
بس غالبا مش باعرف..خيابة بعيد عنك

مسلم said...

ma_3alina

جزاك الله خير يا حبيبي؛ كلكوا و الله وحشتوني أكتر بكتير...و كفايه عليه فرحتك اللي باينه في كلامك ديه

مسلم said...

عصفور المدينه

الله يسلمك

جزاك الله خير علي النصيحه الغاليه و أنا معاك تماماً بس أنا كنت حاسس إني محتاج أفضفض...ففضفضت معاكوا شويه

مسلم said...

ض/خالد

ماشي يا سيدي متشكرين علي المسانده الوجدانيه العاليه ديه

مسلم said...

ammola

الوحيده اللي فهمتي البوست يااااه

بس تعرفوا كلكوا أنا لما قريته مفهتووووش

:)

آه و الله مفهمتوش

رفقة عمر said...

اولا عايزة اعبر عن فرحتى بعودتك للمدونه وللتدوين وان حضرتك بخير
يارب دايما بخير
عادى من حقك تتدافع عن حقك احيانا الانسان لما يكون بيحاول يبقى صح قوى ويعامل الناس كويس قوى وللاسف لا يجد المقابل بل بالعكس يجد اساءه كمان اكيد بيعمل فس اللى حضرتك تعمله
بس برضه تحمل اختبارات الله وان شء الله يجعل لك الله من امرك مخرجا ويظهر لك من هم اهلا لثقتك ويستحقون صحبتك
وليس ذلك على الله بعزيز

رفقة عمر said...

تصحيح
نفس

Anonymous said...

و الله يا حماحيمو من أفضل ما أحبه فيك هو أنك واضح يا (ابيض ي أسود) . بس صدقني (ولمن صبر وغفر إن ذلك اكن عزم الأمور).

Ahmed Nabil