Thursday, July 19

مبروك يا عمرو

السلام عليكم و رحمه الله و بركاته

عمرو ده صاحب عمر و صديق قديم جدا؛ لا لا ده أكتر من أخويا

يعني عشره سنين طويله أنا فاكر مثلا و إحنا في ثانويه عامه يا عمرو؛ دروسنا كلها كانت مع بعض و كنا تقريباً بنقضي طول اليوم مع بعض من درس لدرس و حتي لما كنا بنزوغ من الدروس (ديه مرات قليلقه علي فكره) كنا مع بعض؛ و كنا بنعمل حاجه غريبه شويه

بعد قضاء اليوم كله وشنا في وش بعض نروح بالليل و نقعد نتكلم في التليفون مع بعض؛ حاجه غريبه مش كده

أنا برده لما إفتكرتها دلوقتي قلت لنفسي هو إحنا كنا بنقول إيه؛ المهم عمرو علي طول بالنسبه ليا كان شخص ليه مكانه خاصه؛ و هو بصراحه عمرو بيبقي ليه مكانه عند أي حد بيعرفه

كنت دايماً لما أبقي مضايق أو مخنوق ( و ده كان بيحصل كتير) كان أكتر واحد ببقي عايز أتكلم معاه هو عموووور؛ جايز في فتره من الفترات كان بيحصل بينا شويه بعد بس دايماً كنا بنرجع نلم الشمل تاني

شبابنا كله تقريبا كان مع بعض

ذكريات كتيره قوي؛ إسكندريه؛ و مرسي مطروح؛ و أيام المحروسه؛ و أيام مذاكرتنا في الإسماعيليه؛ و أكل المعسكر الي مكانش حلو؛ و لما كنا نخرج ناكل من عند حلمي و العربيه اللادا؛ و بعديها اللانوس؛ فاكر أول مره خلتني أسوق العربيه في العبور.. ;) و أيام القاهره؛ كنت دايما أول واحد بتهنيني بعيد ميلادي (بعد ماما طبعاً) كل لحظاتي الحلوه تقريبا لو إفتكرتها أكيد هلاقي عمر في خلفيه الصوره و حتي لحظاتي اللي مش حلوه بلاقيه برده كان في الخلفيه؛ عمر وقف معايا كتير

و ساعدني كتير قوي... و دايماً كان الشخص اللي بتسند عليه قبل ما أقع ؛جزاك الله خير يا عمرو

عمرو هيتزوج قصدي يعني إن البناء بتاعه يوم الأحد اللي جاي

و عشان كده حبيت أقوله مبروك من هنا بصوت عالي

مبروك يا عمرو

جايز مش هقدر أقولهالك بصوت عالي في ودانك يوم الفرح زي ما كنت بجد أتمني

بجد و الله يا عمرو كان نفسي أكون جنبك و أفرح معاك و أشوف بعيوني فرحك بس هنعمل إيه بقه يا عمور؛ المهم مبروك يا حبيبي

و عايز بقه أمارس دور الأب علي إبنه الصغير و أقولك كلمتين ياولد تحطهم حلقه في ودنك

يا عمرو إنت كمان يومين هتبتدي مرحله تانيه خالص في حياتك؛ مش القصد منها إن هيكون معاك نصك التاني أو إشباع بعض العواطف

الهدف لازم يكون أكبر من كده؛ إنت يا عمرو بتحط طوبه في بناء الإسلام؛ التكوين الأسري دائما كان هو حجر الأساس في الصرح الإسلامي

فلازم تكون عارف إن إنت في رقبتك أمانه لهذا الدين؛ زي ما رب العالمين أكرمك بالزواج و العفاف و يسر لك أسبابه؛ لازم إنت كمان تحفظ النعمه؛ و تشكرها و تكبرها و تنميها

و العبد مننا يفرح بنعمه ربه (و أما بنعمهِ ربِّكَ فحدِثْ) و لكن إحذر أخي أن تكون فرحتك في غير طاعته

و أول و أهم شئ هو الإهتمام بإقامه الدين في بيتك و جعله جنه بذكر الله و الحفتظ علي الصلوات و يكفي أن أذكرك بحديث رسول الله صلي الله عليه و سلم عن الزوجين الذين ينضح كل منهما الماء في وجه الآخر ليوقظه لصلاه الليل فيُكتبان من الذاكرين الله كثيرا و الذاكرات

ثاني شئ إياك إياك أن يشغلك أمر الزواج عن طاعه كنت تؤديها لله فلا يصح أبدا أن تنشغل بالنعمه عن المُنعِم جل و علا

و راقب نفسك من أول يوم و لا تتهاون؛ فمثلاً صلاه فجر يوم الإثنين القادم...هل ستكون في جماعه؟؟

تالت شئ متابعه سنن النبي صلي الله عليه و سلم في الزواج و الجماع إلي آخره

كمان مهم قوي يا عموووور إن شاء الله بعد كده تبدي تحضر إزاي هتربي أولادك بإذن الله؛ و إيه الشكل اللي عايزهم عليه؛ و رأيي مع إن ده شئ لسه بدري عليه؛ مش المهم إن الأولاد يطلعوا دكاتره و مهندسين المهم ميبقوش زيي مثلاً و يبقوا ربانيين مسلمين مستعدين لحمل عبئ هذا الدين.

لو ده هدفك أكيد ربنا هييسرهولك

طبعاً يا عمرو و إنت مش محتاج توصيه بس من باب التذكره لازم تكون عارف إن من أول يوم في الزواج أصبح في إنسان مسئول منك؛ مش قصدي الأكل و الشرب طبعاً لأ؛ أنا قصدي الحب و الود و القرب و الإشباع و المعامله و الملاطفه

و تذكر وصيه نبيك صلي الله عليه و سلم (إستوصوا بالنساء خيراً)

زوجتك ربنا وصفها في القرآن بأنها سكن لك؛ يعني هي من تأوي إليها و تأوي هي إليك

و يعينك علي ذلك أن تبدأ بتوجيه الزوجه توجيها دينياً في مسأله تقدير الزوج و طاعته لأن المفهوم الإسلامي للعلاقه بين الزوجين يختلف تماماً عن موروثاتنا من العادات و التقاليد حتي في أكثر العائلات أخلاقاً

و كما أوصيتك بزوجتك خيراً أوصيها بك خيراً

و أخيراً

مبروك يا عمرو

ملحوظه: أنا دايما بحاول إني أبعد عن الكلام عن أمور شخصيه أو تجارب ذاتيه لكن المره ديه سامحوني؛ و عموماً جايز الموضوع ده يكون نقطه إضافه لتعريف من يزورون المدونه بشخصيتي

18 comments:

عصفور المدينة said...

مبروك يا عمرو
وعقبالك يا مسلم ولا انت متزوج
إلا صحيح هو الكلام في الأمور الشخصية جائز ولا لأ
:)

رفقه عمر said...

الف مبروك لعرو وعقبالك يارب قريبا
اعذرنى محتاجه اتكلم فى امر
قرات راى فتاه الجنه عنك وكمان ردك عندها
وانا سامحنى لو اتكلمت فى الامر دة بس ياريت تعتبرنى اخت لك فى الله يجمعنا هدف واحد وهو محاوله توصيل الاسلام بصورته الحقيقيه لاكبر عدد من الناس
وانا كنت لاحظت امر فى اسلوبك واحرجت كتير اتكلم فيه
هو اسلوبك الشديد فى النصيحه عصبيتك اللى بلاحظها فى كتاباتك وفى ردودك حتى احيانا لا تعتم بالرد على من يعلقون عندك ودة اكيد مش امر مستحب فى الانسان المسلم
المسلم سهل هين لين
وجه بشوش ويخفض جناحه للمؤمنين حتى المقصرين منهم
اخى انا اعتبر مدونتك من المدونات الرائعه اللى بتتكلم فى الدين بس الناس تريد من يتواضع لها يسمعها بصدر رحب لا يتعالى عليها ولا يتكبر بطاعته عليهم اخى
انا اعتز بمدونتك وكل كلمه فيها كانت مفيدة لى
بس ياريت تخفض جناحك للمؤمنين
اسفه لو كنت ضايقتك
بس لاتنسى اننى تقبلت منك نصائح كتير وسمعتها منك من غير زعل
فارجو ان لا اسبب اى ضيق لك من فضلك
وياريت ترد على تعليقى ولا مرة اعلق عندك وترد عليا
لو انا تعليقى غير مرغوب فيه اوعدك ادخل اقرا من غير اى تعليق
بس لازم ادخل علشان انا اللى بستفيد
فلازم ادخل
اسفه للتطويل لعذرنى

كرم مسلم said...

السلام عليكم

عمرو
بارك الله لكم وجمع بينكم فى خير

عمرو
ياريت تأخذ بكلام مسلم ليك لأنه بصراحة باين أه بيعزك جدا

مسلم

جزاك الله خيرا على هذا الأخلاص

BinO said...

مبروك يا عمرو
ربنا يكرمك ويبارك لك
ويرزقك الذرية الصالحة
فأنت نعم الأخ
وانا أحبك في الله أخي

_-_-_-_-_-_-_-_-_-_-_-_-_-_-_-
عقبالك يا حيمو وربنا يبارك لك
ويارب تلاقيها بقي
عشان نقولك مبروك يا حيمو
:)
أحبك في الله أخي

ma_3alina said...

ألف مبارك يا عمرو
بارك الله لك ولزوجك وبارك عليكما وجمع بينكما في خير وعلى خير .. اللهم صب عليهما الخير صبا ولا تجعل عيشهما كدا ..

الجاتوم على مين على العريس ولا صاحب العريس

يالا .. عقبالي ياااااارب
وعقبالك .. وعقبال الباشمهندس صاحب العيون وعقبال الباشمهندس اللي نفسه يكون صارم .. وعقبال الدكتور الواد سكتم ..

على فكرة العبد لله من أنصار الكتابة الشخصية

:D

omar مشروع بطل said...

بجد مشاعرك ناحية عمرو جميلة اوى
ربنا يحفظكم لبعض ونسأل الله ان يكون هذا الحب العظيم خالصا لوجهه

والف مبروك وعقبالى

ftataljanna said...

السلام عليكم ورحمة الله وبركاته

بارك الله لهما وبارك عليهما وجمع بينهما فى خير ورزقهما ذؤية صالحة اللهم امين

مسلم said...

عصفور

الكلام في الأمور الشخصيه جائز علي قول الجمهور

هاهاها

أحبكم في الله جميعاً

إدعيلي و الله يا أستذ عصفور أحسن أنا خلاص قربت أتجوز علي نفسي

مسلم said...

رفقه عمر

أولا جزاك الله خيراً علي مشاركاتك التي لا تلبث مع مشاركات كل من يزورون المدونه أن تضفي عليها طابع الفائده التي تحدثتي عناه

ثم

لا أنكر أبداً أن أسلوبي قد يكون فيه بعض خشونه و قليل من العصبيه لا أنكرها و لا أفتخر بها لكنها موجوده

لكن بالنسبه لتعليق الأخت فتاه الجنه فأعتقد أني في هذه اللقطه بالذات أعطيت للموضوع قدره و فقط و كنت أود لو أنك أخبرتيني برأيك في هذه المسأله بعينها

أنا عاده أرد علي جميع من يعلقون عندي و قلما أترك تعليقا بدون رد و تعليقاتك بالذات أعتقد أن نسبه الرد عليها تتجاوز ال 99% بقليل :)

موضوع تعليقك غير مرغوب فيه ده أعتقد إنه كلام مش محتاج أرد عليه

طبعاً تعليقك مرحب به في أي وقت

و سأحاول الأخذ بنصائحك في قادم الموضوعات إن شاء الله

مسلم said...

كرم مسلم

جزانا الله و إياكم يا أخي

مسلم said...

بينو

إدعيلي أنا تعبان قوي...و بمر بمرحله صعبه جداً

كأنما أصعَّدُ في السماء

مسلم said...

ما علينا

الجاتووم

قصدك الجاتوه علي العريس طبعاً و علي فكره الفرح فيه أكل جامد قوي و عشان كده أنا ظابط نفسي علي البوفيه إن شاء الله

و الله المستعان

اللهم أعنا علي القيام بالواجب (في البوفيه طبعاً)

مسلم said...

مشروع بطل

جزاك الله خيرا يا أخي

مسلم said...

فتاه الجنه

قومتي الناس عليا جزاكي الله خير :)

طبعا أنا بهزر جزاكي الله خيرا علي مجهودك في التذكره و النصح

ثم

اللهم آمين علي دعائك

ftataljanna said...

انا مش قصدي خالص بجد

وعلى فكرة انا مش كان قصدي عن حضرتك تحديدا او ابن حجر تحديدا زى ما وضحت فى البوست

انا كان قصدي الفكرة عامة

كدعوة يعني

وبعدين يا سيدي كلنا لها :)

سماح بقى :)

عصفور المدينة said...

ربنا يجوزك ياباشمهندس
بس اوعى تقول
رب ارجعون

مسلم said...

فتاه الجنه
ديه بس مداعبه ليس إلا

جزاكي الله خيرا علي التذكره

مسلم said...

عصفور المدينه

و الله الواح مش عارف الخير فين

إدعيلي