Wednesday, June 20

بعقلانيه بحته

السلام عليكم و رحمه الله و بركاته

أولاً : كيف حالكم

منذ عده أيام و علي مدونه عصفور المدينه كان هناك تساؤل من أحد أصدقائه و هو

هل ألتزم أم لا ألتزم؟

سؤال قد يكون راودني شخصياً في يوم من الأيام..!!؟

كان ذلك بعد أشهر قليله مرت بعد رمضان...ذلك الشهر الذي لو ظللت أصف لساعات فلن يعلم أحد كم أحبه...شهر الغفران

وقتها وقفت أسأل نفسي...إنت عايز إيه...ما انت جربت كل حاجه؛ رحت و جيت..درت و لفيت و بعدين

هتفضل كده...من أغنيه لأغنيه...و من فسحه لفسحه و من منظر لمنظر

طيب هو الأغنيه بتاعت النهارده إيه الجديد فيها عن بتاعت إمبارح...طيب و كلامات فلان إيه الفرق بينها و بين كلمات علان...طيب و البنت الفلانيه إيه الزياده اللي فيها عن البنت العلانيه...طيب و حياتك من سنه إيه اللي جد فيها عن دلوقتي..!!؟

هتفضل كده...!؟

كان هو ده السؤال اللي مسيطر علي تفكيري...لحد إمتي

و كان الحل ساعتها من خلال تفكير عقلاني شويه يعني بحسابات واحد زائد واحد بيساوي اتنين

و...اللي حسم الأمر جمله واحده...كنت بلاقيها بعد أي حاجه من الحاجات الغلط اللي بنعملها أو اللي كنت متعلق بيها...جمله واحده

ثم.....تموت

و ثم في اللغه حرف يفيد التتابع مع التراخي...يعني بالبلدي كده حاجه ثم حاجه تبقي حاجه و بعد شويه (كتير أو قليل) الحاجه التانيه.

فكنت لما آجي أقول الأغاني ألاقيها تبقي

الأغاني....ثم................تموت

البنات تبقي

البنات ثم .................تموت

و كنت بقول لنفسي..بعقلانيه برده....عاده الناس بتمتدح البني آدم اللي بيبقي مرتب حياته و يا سلام لو حاطط خطط لسنه أو سنتين قدام؛ يعني لما تبقي مع حد و يقول انا كمان شهرين هعمل كذا و كمان سنه كذا و بعد سنتين أتجوز و بعد تلاته أنجب...و هكذا تجد أي حد يقول ده راجل منظم

طيب ده الأخ ده بيرتب لسنه و سنتين ...و بيرتب في حاجات كلها غيبيات ميضمنش إنها تحصل

بمعني إن أي حد فينا لا يمكن إنه يضمن حدوث شئ معين بكيفيه معينه بنسبه مائه بالمائه

في حين أن شئ واحد فقط هو الذي تضمنه من وقت ميلادك و هو أنك حتما لازماً و لابد سوف تموت

فكيف يوصف بالعقل من ينظم لحياه و أشياء غير مضمونه في حين لا يعمل أي حساب للشئ الوحيد المضمون في حياته و هو الموت....!!!!!!؟

إذا أردت أن تحدد وجهتك و طريقك فأذكر هذه الكلمه

ثم ..... تموت

فستجد نفسك تعرف الطريق مباشره

نرجع تاني للسؤال نفسه...ألتزم أم أظل كما أنا و لا أتزم

ألتزم

لا ألتزم

طريق رضا الله

طريق غضب الله

طريق لقاء الأحبه محمد صلي الله عليه و سلم و صحبه

طريق تلقي فيه أحقر خلق الله...من وصفهم بأنهم كالأنعام بل هم أضل سبيلا

طريق الطمأنينه النفسيه و الرضا و القناعه

طريق الطمع و عدم الشبع النفسي و الحقد و الحسد و الضغينه و المشاحنات

طريق يأخذك لجنه عرضها كعرض السماوات و الأرض

طريق قد يقودك لنار تخلد فيها مع المنافقين و الكافرين و العصاه

طريق تحفه الملائكه

طريق ملئ بالشياطين

طريق بركه في الأهل و المال و النفس

طريق محق للبركه و ضياع للمال و الأهل و شقاء بهما

طريق الله

طريق الشيطان

هذه مقارنه بسيطه لم أجتهد في تنسيقها و إنما أوردت فيها ما ورد بخاطري و السؤال الآن

ينفع تقول ألتزم أم لا ألتزم..!!!!!!؟

و لحد إمتي هتفضل تسأل...و لحد إمتي ربك هيديلك الفرصه إنك تفكر ؟؟

النهارده أمرك بإيدك...بكره ممكن تيجي غصب عنك

النهارده بتفكر و بتتشرط....بكره هتتمني و ساعتها ممكن عمرك ما تنالها

النهارده قرارك قرارك..بكره متعرفش ... إيه اللي جاي بكره

قال تعالي : (و سارعوا إلي مغفره من ربكم و جنه عرضها كعرض السماوات و الأرض أعدت للمتقين)

لسه بتفكر...طيب فكر...مفيش مانع...بس المهم تقرر صح

كلنا لازم نقرر

6 comments:

عصفور المدينة said...

جزاك الله خيرا
وتلك الأمثال نضربها للناس وما يعقلها إلا العالمون

مسلم said...

جزانا و إياكم أستاذ عصفور

خمسة فضفضة said...

السلام عليكمن ورحمة الله وبركاته

جزاك الله خير

مناقشه فعلا عقلانيه وهادئه ، لموضوع مهم جدا

ma_3alina said...

أقول لك على سر .. أنا ما عشتش التجربة دي .. وما اخدتش القرار ..

قعدت فترة اعاتب نفسي لني ما اخدتش القرار بالصورة دي ..

بس بعد الجيش هديت شوية ورضيت

حد فاهم حاجة ... يالا ما علينا

مسلم said...

خمسه فضفضه

و عليكم السلام و رحمه الله و بركاته

جزانا الله و إياكي

مسلم said...

ma_3alina

عموماً سرك في بييييييييييير