Tuesday, June 12

فطنه نظيف..!؟

السلام عليكم و رحمه الله و بركاته

من كام يوم أسعدني زماني و قادني ريموت التليفيزيون إلي مشاهده قناه التليفزيون المصري الأرضيه الأولي...و اللي كان بقالي ما لا يقل عن خمس سنين مشفتهاش

المهم اللي حصل إن كان في برنامج بيتذاع بيحكي عن التطور الرهيب اللي وصلتله مصر...و الراجل المعلق علي البرنامج قاعد يقول

"....صناعه البرمجيات...صناعه كبييييييره...كان صعب إننا ندخلها ... لكن بسواعد أبناءنا وصلت صادراتنا منها إلي شئ و شويات...)

ثم يردف قائلاً (...شوفتوا مصر إتقدمت بينا إزاي)

أنا بيني و بينكوا ضحكت كده في نفسي و قلت يا ولاد الإيه...حركه حلوه بجد

عارفين إيه

الحكومه بعد خطط زرع الأميه في وسط الناس و جعل التعليم وسيله كبير من وسائل تخريج دفعات من الجهله و المغيبين عن معايير التقدم و الفهم

بعد سنين طويله من إفساد منظومه التعليم المصري

قررت الحكومه إستغلال منسوب الجهل العالي عند بسطاء و عموم الشعب في ترسيخ مفهوم إن مصر لسه أم الدنيا

إستغلت الجهل ده في إنها كده و بالبلدي تعيشهم في الدور

دور إن مصر بلد يتقدم للأمام يوم بعد يوم

أنا طبعا من مده قليله سافرت بره مصر ... مرحتش دوله يعني من دول العالم الأول انا رحت كوريا الجنوبيه

كوريا الجوبيه ديه بقه...بجد و الله و من غير مبالغه

مصر بالنسبه لها عزبه صغيره و أقل كمان ديه ممكن تكون نجع و الله العظيم من غير مبالغه

و مش عايز أقول لفظ تاني يزعل

الأستاذ الفاضل اللي بيعلق علي البرنامج بيتكلم بنبره تشعر فيها بكفاح ملايين وراء تحقيق التقدم و النمو الذي يتحدث عنه سعادته

و انا عايز أسأله لو كلامي هيوصله و معتقدش إن ده هيحصل

ضميرك مستريح

أو بمعني أدق إنت مصدق نفسك

صناعه برمجيات إيه يا أستاذ ... ده في عيد الفطر اللي فات كان فيه في السوق كحك عيد صيني

برمجيات...طيب بأماره إيه يا أخي ... يعني دا كل الفلاش ميموري اللي في السوق صيني

المهم عشان مخرجش عن الموضوع...أنا عجبني قوي فطنه الحكومه و ذكائها و طبعا فطنه الدكتور نظيف

قال بعد ما خليناهم مش عارفين الألف لامؤاخذه من كوز الذره المرشوش هرمونات أو من عمود النور البايظ أو من عمود الخرسانه المغشوش

قال إيه نستغل بقه جهلهم و نوهمهم إننا متقدمين و متصدرين لدول العالم في البحث العلمي...!!؟

بجد تفكير هايل

مبروك شعب مصر

الحكومه و لامؤاخذه بتستغفلكوا

و يجعله عامر

ملحوظه : نرجو من شعب مصر الباسل المتقدم في البرمجيات مسانده حسن شحاته و كتيبته الأبطال في مشوارهم الإفريقي الصعب أمام منافسين من عينه بوروندي و موريتانيا...نظراً لأن بوروندي تقريبا نصف لاعبيها محترفون في دوري دوله جزر القمر و لذلك فهناك خوف علي اللعيبه قصدي الكتيبه من طول السهر

و قال يقولك برمجيات قال

و لا حول و لا قوه إلا بالله

13 comments:

عصفور المدينة said...

يا هندسة إيش جاب الفلاش ميموري للبرمجيات
انت كدة في منطقتنا(مجالي يعني)
الحمد لله مصر متطورة في البرمجيات فعلا عشان دي الحاجة الوحيدة اللي مش تقف قدامها عوائق مثل ما يقف قدام الصناعات اللي
بجد
ده غير الناس اللي ليهم عنصر فاعل في منتجات عالمية أساسية مثل الويندوز وغيرها
خلينا نفرح بحاجة يا هندسة

بمناسبة المذيع
اخبرني من يعرف مذيعا يقدم برنامج كمبيوتر انه لا يعرف يستخدم الكمبيوتر ولكن هناك من يكتب له نص البرنامج

مسلم said...

موضوع البرمجيات ده حته في النص

إنت لو سمعت البرنامج هتعرف أنا أقصد ايه

و بعدين أنا آسف يعني ...مشفتش في أسواقنا المصريه الباسله أي ناتج لهذه الصناعه الضخمه

يعني لا أنا شايف برامج نازله يمين و شمال

و لسه بستخدم الويندوز لسه مبقاش إسمه النوافذ يعني

و لا أحد عملنا برنامج أوديو مثلا و سماه المذياع

و محدش إخترع لغه برمجه و سماها لغه الضاد مثلا

أنا بهزر طبعا

أنا أقصد إن الناس في التليفزيون دلوقتي بيحاولوا يوهموا الناس إننا زي الفل و الدنيا كويسه

في حين إن ده زيف و ضلال

زي بالظبط جرنال الجمهوريه أو الأخبار و الأهرام الجرايد الصفراء ديه

كل يوم تمسكها تلاقيهم كاتبين

إفتتاه تسعتاشر مصنع

حفر عشرين بير بترول

تلاته مليون فرصه عمل لغايه قبل الطبعه الأولي

بتسعين مليار جنيه جبنه رومي لمحدودي الدخل

و هلم جره

Anonymous said...

مش عيب يا اخوانجى يا مسلم تروح بلاد الكفره اللى بتعبد الصنم

ma_3alina said...

إن أحكي فسأحكي دهرا وبإيجاز أحكي شهرا

بعد إذن الباشمهندس عصفور المدينة وأنا عارف إنها منطقته وانا مجرد لاعب على اطراف المنطقة .. لكن يسمح لي أقول إن إحنا متخلفين جدافي مجال البرمجيات .. عقليات الناس في مصر بتعتبر البرمجيات دي نوع من الترف يمكن الاستغناء عنه .. واسوأ ما في الصناعة هي من تتعامل معه

وإن كان فيه تصدير للبرمجيات فالتصدير للمبرمجين اللي بيطفشوا من مصر وبيروحوا أي بلد أخرى تقدر هذه المجال

ولولا قلة علمي وتمسكي ببعض الأمور هنا ورفضي لواقع البلاد الأخرى لكنت اول الراحلين ..

عجبني قوي التعليق بتاع إنك إخوانجي وضحكني جدا وأنا فعلا كنت زعلان ..

يعجبني اتفرج على الناس اللي فاكرة إنها فاهمة كل حاجة .. هههه .. تحيا الفكاكة

مسلم said...

إخوانجي

يا نااااااااااااااااااااااصح

بسم الله ما شاء الله عليك و عرفتها لوحدك ديه يا أستاذ و الا حد قالك عليها

عموما لا مش عيب

مسلم said...

MA_3ALINA

كلامك أعتقد إنه صحيح تماما

و أنا قلتها في بوست قبل كده

مصر أصبحت دوله طارده للكفاءات جاذبه للتفاهات

ammola said...

عشان تحرم تلعب بالريموت
وبعدين يعنى مش كفاية ريادتنا فى تصدير الخدامات واللا انتو ما فيش حاجة عاجباكو
وصحيح ...ايه اللى وداك بلاد الكفرةهة؟؟؟

مسلم said...

اللي وداني بلاد الكفره

الشغل

ثم يعني الكفره دول

و الا بلاش

خلينا في همنا و خلاص

BinO said...

:)
مش عارف أعمل حاجة غير أني أضحك
يمكن عشان سمعت البوست منك قبل ما تكتبه
بس زي ما أنت بتقول
متشغلش دماغك
وبطل لعب بالريموت

عصفور المدينة said...

السلام عليكم
أدعوك وأدعو الزوار هنا للتعليق عندي في مدونتي على موضوع بعنوان
دعوة

ض/خالد said...

بصراحة انا شايف ان مصر فعلا فيها عقول برمجية جيدة جدا

انما ممكن يكون الفشل في موضوع صناعة الهارد وير

مسلم said...

بينو

حاضر هبطل لعب

يعني أنا اللي طلعت غلطان

مسلم said...

ض خالد

أنا لا أختلف معك لكن هذا شئ حادث علي مستوي الأفراد يعني مجهود فردي و ناس دماغها نضيفه شويه

و هذا ليس شئ علي مستوي المؤسسه اللي هي الحكومه

بمعني إن الحكومه لم تبذل جهدا وافرا في إنشاء صناعه كبيره إسمها صناعه البرمجيات

و لا تبذل كل غالي و نفيس من أجل تطويرها

و الله أعلم