Wednesday, June 6

فضفضه...كلاكيت تاني مره

السلام عليكم و رحمه الله و بركاته

تاج تاني

انت مين

طبعا صيغه السؤال ليس الهدف منها السؤال عن الإسم...و الواضح إن السؤال القصد منه...كيف تري نفسك..!؟؟

و هجاوب من كلام إتنين أصحابي

الأول (عشره 10 سنين): قالي أنا فعلا مبفهمكش

الثاني (عشره حوالي 5 أو 6 سنين) : قالي...عارف انت حاجات كتير متلخبطه مع بعض..لو اترتبت كويس هتبقي حاجه حلوه قوي

ده كلامهم...أما إجابتي أنا...و الله أنا ما أنا عارف...غير أني أحياناً فعلا بكون شخص يحب الله و رسوله...مع انها أوقات صغيره قوي. . ):

مين أكتر ست أشخاص بتحبهم

لن أذكر والداي

النبي صلي الله عليه و سلم

السيده عائشه رضي الله عنها

سيدنا عمر بن الخطاب رضي الله عنه

مشايخ الإسكندريه

الشيخ محمد حسين يعقوب

أختي

انت سعيد

الحمد لله.... لا

لو اجتمعت أنا وحسني مبارك في غرفة واحدة

صعب قوي إنه يحصل

و لو حصل هقوله كلمه واحده

ضميرك مستريح...؟

لو معاك مليون و نص جنيه تعمل بيهم ايه

إممم.... هغير عربيتي و أجيب شقه كويسه...و هعمل حاجتين تانييين بس مش هقدر أقول عليها...و مش عارف بس أنا كل أملي إني ساعتها ربنا يرزقني حسن النيه

بتحب مصر؟

بحب مصر..؟؟ أيوه بحبها قوي...بس بكرهها قوي

عايز أقولكوا حاجه...لم يذكر السجن في القرآن إلا مرتين...كانوا في مصر

للأسف هذا الشعب مبتلي بخصلتين...إذا حكم طغي ...و إذا حُكِم لا يُحكَم إلا بالكرباج

كلنا كده...حتي إبقوا إتفرجوا علي سواق الميكروباص بيعمل إيه في الزباين

المهم علي الرغم من ذلك...أحبها لأن فيها خير أجناد الأرض

بتحب البنات؟

مش عارف إيه القصد البنات الكيار و الا الصغيرين

لكن عموماً بالنسبه للأولي ده شئ فطري و غريزي مش محتاج سؤال...لكن له ضوابطه الشرعيه

أما بالنسبه للتانيه...فأنا فعلا أحب جداً جداً جداً الأطفال الصغار و خصوصاً البنات

انت مسلم؟

بالرجوع إلي البطاقه الشخصيه

نعم

بمتابعه الحال... الحمد لله أن أبقاها علينا نعمه و لم ينزعها مني لسوء الإستخدام و عدم شكرها ... و الله المستعان

ليه؟

نشأت و ترعرعت في أسره مسلمه...ثم ما لبثت أن وعيت فعرفت أن هذا الكون لابد له من مدبر و من خالق حكيم كيف لا و بيتنا الصغير إذا غاب عنه أبي و أن سهت عنه أمي سادته الفوضي و لذلك كنت بعيدا عن مخاطر اللا دينيه

ثم نظرت فعرفت كيف يعبد النصاري رهبانهم و كيف يعبد اليهود هواهم

و كبر عقلي و وعيت بعضاً من معاني القرآن و كثيرا ما يراودني شعور غريب باللذه أثناء القراءه أو الإستماع و لا تلبث شفتاي أن تنفرج ببسمه يقين و تلذذ و أقول متمتماً ... ما كان هذا الكلام ليكون من صنع بشر

بجد ساعتها بردد الحمد لله أن من علينا بسماع القرآن

أكتر وقت بحس فيه بهذا الشعور عند سماعي سورتي الأعراف و الرعد

ثم سيره نبي الهدي صلي الله عليه و سلم

ثم سيره صحابته مصابيح الدجي

ثم...ثم الحمد لله أني مسلم

تاج تالت

مين اكتر شخصيه متقدرشى تستغنى عنها فى حياتك

عندما تأملت و فكرت وجدا أن هناك أشخاصا سيصعب علي فراقهم... و لكن ليس هناك من لا أستطيع الإستغناء عنه...!!؟

وليه

جايز تركيبه شخصيتي...لم أعهد نفسي أبدا تابعاً لأحد...و جايز كمان طبيعه حياتي و شغلي اللي خلتني أسيب بيت أبواي و أنطلق في دهاليز الدنيا منذ السادسه عشر من عمري و طيله حوالي العشر أعوام الآن و أنا في ترحال مستمر

جعلني هذا معتمداً علي نفسي متأهباً لفراق أغلي الناس في أي وقت

لكم هي قاسيه لحظات الفراق...لككم أصبح قاسياً قلبي...!!؟؟

ايه أكتر موقف محرج تعرضت ليه

أكتر موقف محرج...للأسف وقتها مكنش عندي دم..!!؟

و اتصرفت ازاى

ملوش لزوم عشان أنا مش عايز أفتكر

ايه الأمنية اللى بتدعى دايما ربنا انه يحققها ليك

أمنيه...زوجه صالحه و رفقه الأحبه...محمد صلي الله عليه و سلم و صحبه

تحققت ولا لسه

النصف الأول أعتقد أنه متحقق لا محاله و لكنها مسأله وقت و حال قلب مع الله

النصف الثاني... ليس لي إلا أن يتغمدني الله برحمته...فالخطايا كثيره و الحمل ثقيل و الزاد قليل و من يغيث سائراً بين الذئاب بليل طويل

إلا الله وحده لا إله إلا هو الكريم الجليل

ملحوظه: بعد ما جاوبت علي التاج : أنا بجد تعبان قوي...!! ))))):

19 comments:

عصفور المدينة said...

مشايخ الإسكندريه
محمد إسماعيل
سعيد عبدالعظيم
ياسر برهامي
أحمد فريد
ومين كمان....
www.alsalafway.com
ليه كل أهل القاهرة نقرهم من سواقين الميكروباص

متحقق لا محاله
قول يارب

ma_3alina said...

عارف يا هندسة مش أنا عندي تصنيف اسمه فتاة أحلامي .. أهو أنا كنت عايز اكتب بوست عن السيدة عائشة واحطة تحت التصنيف دا ..

السيدة عائشة مدرسة على النساء دراستها .. انا كمان بحب أمي السيدة عائشة جدا .. ونفس اتجوز واحدة زيها .. بس الشيخ صدمني لما قلت له كده ..

قال لي :

لما تكون النبي تبقى تدور على عائشة

عاااااااااااااااا

يا قلبي يا غريب said...

السلام عليكم و رحمه الله و بركاته
اسال الله العظيم رب العرش العظيم ان يشرح صدرك و ييسر لك امرك و يجعلك من الفالحين الناجحين الصالحين

يا اخي احبك في الله
و احب كل من يزورك في مدونتك الطيبه

مـحـمـد مـفـيـد said...

كويس انك مش مررت التاج لحد
انا من عشاق محمد اسماعيل المقدم
وياسر برهامي

رفقه عمر said...

ليه تعبت بعد ما كتبت التاج انا شايفه ماشاء اجااباتك صادقه حسيت فيها بالصدق والصراحه وشكرا انك جاوبت على التاج

مسلم said...

عصفور المدينه

جزاك الله خيرا علي الزياره

موضوع متحقق لا محاله ده يقيناً في الله ليس إلا

فأنا أعلم أن الله لا يرد يد عبده خائبه

مسلم said...

ma_3alina

انا مبسوط فعلا إنك جيت المدونه مرتين ورا بعض

السيده عائشه رضي الله عنها من أحب الشخصيات إلي قلبي فعلا

مسلم said...

يا قلبي يا غريب

أحبك الله الذي أحببتني فيه

و إني أحبك في الله

مسلم said...

محمد مفيد

كويس ليه

أنا بمرر التاج ليك أهوه

الدكتور محمد إسماعيل .... لا تصفه كلمات

و الشيخ ياسر لا تفيه حقه جمل أو عبارات

و أهل الدعوه بالإسكندريه هم في السماء كالنجمات

مسلم said...

رفقه عمر

جزاك الله خيراً علي وصف الكلام بالصدق

أنا تعبت لأن التاج أثار شجونا في نفسي و أظهو عيوبا كنت غافلا عنها

مش عارف

مش عارف

رينـــــــــــا said...

السلام عليكم
ماشاء الله اجابات حضرتك جميله اوى فعلا
شفاك الله وعافاك ان شاء الله

ma_3alina said...

هندسة ...
:)
قصدك إني علقت في المدونة مرتين ورا بعض

إنما على موضوع المجي .. فأنا لازم اعدي يوميا على مدونتك مرة على الأقل ..
وكل مواضيعك تم قراءتها .. تحب اسمعهم لك
ههههههههههههه

لذلك لزم التنويه

:D

مسلم said...

رينا

جزاك الله خيراً

مسلم said...

ma_3alina

ماشي يا سيدي

يعني بتيجي و تمشي من غير ما حد يعرف

يعني أنا مش هعرف أظبط المدونه ديه و أعرف مين بيدخل و يخرج...!!؟؟ هاهاها

عموما ديه أكيد حاجه تسعدني إن إنت تشرفني

منة الله said...

مسلم


ادعوك للمشاركة في استفتاء اكثر 10 مدونات تاثيرا في قرائها

عل مدونتك تكون واحدة منهم

اليك الرابط

http://www.6ef.blogspot.com/

مسلم said...

منه الله

إممممم

مش عايزها تكون منهم

يا قلبي يا غريب said...
This comment has been removed by a blog administrator.
مسلم said...

السلام عليكم و رحمه الله و بركاته

أخي يا قلبي يا غريب

لقد أضفتك و منتظر دخولك

رفقه عمر said...

ليه مش فيه بوستات جديدة لعل المانع خير