Wednesday, April 18

ميزو في كوريا

السلام عليكم و رحمه الله و بركاته
هحكيلوا التهارده يوميات ميزو في كوريا
الأول أعرفكوا عليه
ميزو هندووس صغيوور
مهندس أجهزه في شركه بترول ... كبيره في مصر
طيب ميزو ايه اللي جابه كوريا
ميزو شركته خدت مشروع جديد
و جاي يراجع نظام التشغيل في كوريا
ميزو ركب الطياره...و طبعا أول مره يركب الطياره بعد سنين الشقا في المشاريع و السرفيس
ركب من مطار برج العرب...مطار صغنطط في إسكندريه
عمل ترانزيت في مطار دبي
ميزو ماشي ساكت
بيبص حواليه
و مش مصدق...و بيقول في عقل باله
أمال إيه يا إخواننا محطه شرق الدلتا اللي ركبنا منها ديه
هو انا جاي في اتوبيس و الا في طياره
طيب و هو مطار دبي ده مطار برده و لا محطه فضاء
طيب هو انا في دبي بجد و لا في أمريكا
ماشي يبص حواليه...المطار فيه نخل من جوه
و انترنت مجاني...ميزو بيقول في عقل باله...و الله و شفت الدنيا يا ميزو
ميزو قاعد ترانزيت 9 ساعات
فاتح بقه و مش مصدق جمال و حلاوه و فخامه المطار
مسجد جميل و إهتمام
كل حاجه معمول حسابها...و الناس بتحب بلدها
ركب ميزو علي كوريا
وصل كوريا...دخل المطار
اللي تصميمه في شبه كبير من مطار دبي
نظام..و من غير ما يكلم حد و لا حد يكلمه في عشر دقايق كان مخلص و خارج
ميزو بيقول في عقل باله...يا دلع دلَّع و ميزو في كوريا هيدلع
ميزو وصل و ابتدوا الشغل
حاجات كتير مش عاجبه ميزو في النظام اللي جاي يستلمه و يراجعه
و كل ما يقول للناس بتوع كوريا يقولوله الشركه المصريه هي اللي وافقت علي كده
قلنالهم واحد و الا اتنين قالوا واحد
قلنالهم الحلو و لا الوحش
قالوا الوحش
قلنالهم كده النظام ميمشيش كويس
قالولنا عيييييب ده إحنا مصريين و جدعان قوي
قلنالهم التكنولوجيا
قالولنا هنشغلها بدراعنا
كل حاجه حوالين ميزو في كوريا كل حاجه ديجيتال
حتي قاعده الحمام...بزراير
ميزو طبعا أول مره يشوف العربيات بتقف عشان الناس اللي ماشيه علي رجليها تعدي الطريق
ميزو برده أول مره يشوف بلد مافيهاش ولا عربيه مخبوطه
ميزو برده أول مره يشوف ناس بتحترم بعض و كلهم بيطبقوا النظام من غير ما حد يقول للتاني حاجه
ميزو حاول انه يفهم الناس بتوع مصر ليه فرطوا في التكنولوجيا ديه مع إنها بنفس الفلوس
و مع انها أحسن
ميزوا فضل يدور و يدور لحد ما عرف
الناس بتوع مصر طلعوا من عينه التخين أبو كرش اللي اتكلمنا عنه البوست اللي فات
ميزوا استسلم للأمر الواقع و قال في عقل بالي و هو بيفتكر الراجل اياه
حبيب قلبي
يا دلع دلع...و ميزو في كوريا بيتدلع
ميزو فاق من نومه و أحلامه
شركته أعلنت الخيانه و قررت انها تخصم نص مكافأته عن السفريه
فلوس السفريه طارت و ميزو في كوريا بياكل تونه
ميزو قال في عقل باله
و هو بيتخل مصر و جمالها
كعب جزمتك بيدل علي أنوثه طاغيه
و طالع لفوق
أول ما شاف الوجه الحقيقي لمصر
قال
ايه الحرمه الملخفنه ديه
ميزو...شاب من ضمن الشباب...مجتهد و بيفهم
ميزو نموذج لكل موهبه أو كفاءه في مصر
مبتلاقيش القدر الكافي من التقدير فبتهج و تطفش
هي ديه مصر
دوله طارده للكفاءات
جاذبه للتفاهات
هي ديه مصر في نظر ميزو بعد ما شاف دول مهياش في مصاف دول العالم الأول
لاااا أبدا
دي الإمارات و كوريا
يعني مرحش أوروبا أو أمريكا مثلاً
ميزو قل لنفسه
يالالاااااااالي
و قفل كمبوتره و نام قبل ما يطق من جنابه

3 comments:

خالد وليس بخالد said...

الحمد لله انهم سابوك ترجع بالسلامة

Mohamed A. Ghaffar said...

حمد الله على السلامه

احنا السبب

مسلم said...

أنا لسه مرجعتش

ربنا يرجعنا بالسلامه