Monday, April 16

تخين و بكرش

السلام عليكم و رحمه الله و بركاته

تخين و بكرش

لابس بدله باين عليها الفلوس اللي مدفوعه فيها

دماغه كبيره... و وشع متنفخ

ماشي بسرعه و خفه

كرشه بيجي يمين و شمال

و شكله كأنه مليان من جوه فلوس و ورق بنكونت

إيشي أخضر و أحمر علي كل لون

صوته عاده تخين

إسلوبه كتير جامد و متين

فيه منه نسخ كتير

في كل مصلحه و وزاره تلاقيه منه اتنين تلاته

دول منتشرين

في مناصب مرموقه و عاليه

و تلاقيه لما يكلمك يقولك يا سعاده الباشا .. يا جناب الوزير

ده طبعا لو له عندك حاجه

أما لو ليك عنده.. فتستني بالساعات بره جنب الغفير

عاده بيفهم في حاجات كتير

يعني ممكن سياسه

إقتصاد...بترول...نصب و تزوير

دول إسمهم

مجموعه

الحمار أبو زلومه

اللي في ديارنا منتشرين

إفتكر الأوصاف ديه كويس

و منهم أصلع و شنبه عريض

و منهم شعره خفيف علي جنب و له سكسوكه

إوعي تنساها...الأوصاف ديه و دور عليها

ممكن يطلع مديرك

رئيس شركتك أو وزيرك

ممكن تلاقي منه واحد تحت سريرك

المهم تحفظ شكله

تعرف رسمه

و إوعي فيوم تبقي زيه

مش هتعرف تعمل معاه حاجه دلوقتي

أصله في العاده بيبقي مسنود

سواء من أخواته في المجموعه

أو من أصحاب الكلمه المسموعه

المهم ترصدهم

و إوعي تبقي منهم

لأن الخطر إن كل واحد فينا جواه واحد منهم
بكرش... و تخين

مفيش داعي للتخمين

هما سبب الوكسه

هما أساس النكسه

هما اللي بيبيعوا كل غالي و ثمين

و عاده بتلاقيهم من هواه التدخين

سيجار بني طويل

و يا سلام لو محشي فيتامين

ديه سكتهم و ديه طريقتهم

إوعي منهم يا جميل

و دايما خالي بالك

إنه

بكرش

و تخين

الكرش ده مش وزن زياده

لأ

ده لزوم اللعب و المنظر اللي فوق العاده

هتقليلهم دايما سكرتيره

حلوه في ماشيتها و جميله

تحل ياولداه من عالحبل

و رنه جزمتها زي الطبل

لو تعرف سكتها...تروح لطريقه

لو تدخل في دماغها...راح تبقي صديقه

بس إوعاك يوم تبقي

تخين و بكرش

3 comments:

خالد وليس بخالد said...

صدقت يا استاذ
والله انا هنا بيحضرني كلمة غريبة جدا جدا لابن القيم -رحمه الله-
بيقول فيها ايه
(وكل منا بداخله داعية تدعوه لان يكون إلاها...إلا أنه لا يجد الظروف سانحة له..فلا يقول أنا إله...أما فرعون فقد وجد ظروفا سانحة...ولذا فقال أنا ربكم الأعلى)

قلت صدقت يا ابن القيم وصدقت يا استاذ..فكل منا بداخله ما يدعوه لان يكون تخين وبكرش...
ولكن الله سلم
نسأل الله السلامة والعافية
وجزاك الله خيرا
وحمدا لله على السلامة

Mohamed A. Ghaffar said...

معدش فى حد كده

يا قلبي يا غريب said...

السلام عليكم ورحمه الله و بركاته
كيف الحال اخي
كنت عايز اسلم عليكي
كلامك زيك جميل
ادعيلي يا اخي