Sunday, March 11

راكب جموسه

السلام عليكم و رحمه الله و بركاته
غريب شويه إسم البوست ده...راكب جموسه..!!؟
و أنا ماشي يوم الخميس الماضي...راكب...عربيتي ...و مسافر ... و معايا بينو ...علي طريق الإسكندريه القاهره الزراعي
تأملت منظراً شوفته كتير قبل كده...بس المره ديه كانت أول مره أتأمله
منظر إيه ده بقه
منظر الراجل الفلاح اللي مروح من الغيط آخر النهاار
و ديه فيها إيه ديه
الراجل بيعدي الطريق...اللي كله عربيات ... و معاه الجموس بتاعه ...الغريب بقه إن الراجل
راكب علي الجموسه...!؟
و دي فيها إيه ديه
بقولك يا جدع إنت الراجل الغلبان ده بيعدي الطريق اللي كله عربيات مسافره..و هو راكب الجموسه
يعني لو يعني فرضاً واحد إتهور كده و لا كده...إيه اللي هيحصل
الراجل ده لا هيعرف يروح و لا ييجي
ماهو راكب علي الجموسه
آاااه
فهمت يعني..الراجل المفروض يمشي و يجر الجموسه بحيث إن قدر الله و حدث شئ...فيعرف ينفد هو و يبقي الحكايه جت في الجموسه
آاااااه تصدق أنا برده أول مره أفكر فيها كده
طبعاً الراجل لو قبل ما يعدي الطريق بص إيه اللي هو هيعمله و فكر في عشر ثواني..أكيد مش هيعمل كده
لكن الفكره إننا في حاجات في حياتنا...بنعملها...عشان بنعملها
من غير ما نفكر و بنعملها لأننا إتعودنا نعملها كده..و إتربينا و شوفنا بابا و ماما..بيعملوا كده
فعلاً عندك حق..أنا في حاجات كتير بعمل فيها كده
يعني بصراحه كتير مننا...راكب جموسه
بس كل واحد عنده جموسته الخاصه بيه
في واحد جموسته...في شغله
و في واحد جموسته...في معاملاته
و في واحد جموسته في...كذا و كذا
عارف أنا ساعات...بقول لنفسي لو مكنتش أنا اللي هغير و هستني حد غيري يغير...و لو كل واحد عمل زيي..يبقي إمتي هنتغير
يا سلام أديك جبت الكلمتين اللي بلف و أدور عليهم من الصبح
طبعاً ما أنا اللي فاهمك.. و عاجنك و خابزك
بس خلاص...بلاش الكلام ده قدام الناس
المهم...عارف أكتر جموسه بتضايقني إيه
الجموسه إياها اللي إسمها الحريه و العالمانيه اللي الناس بتوع الحراره راكبينها
قصدك بتوع الحريات
أيوه بتوع القضايا و الخناقات...أهو الجماعه دول راكبين الجموسه من زمااان..و جموستهم كبيره قوي
معديين الشارع كده من غير لا إحم و لا دستور
هاها
آه بجد..و بعدين جموستهم...جموسه لا مؤاخذه مبتستحيش...يعني ماشيه تعك يمين و شمال..و ريحتها وحشه
علي رأيك الجماعه دول مبسمعش حسهم إلا و أحط إيدي علي قلبي...و أقلق كده و تجيلي النوبه
مش بقولك...ده بسبب الريحه
طيب و الجماعه دول إيه حلهم
شوف يا....إبني
الجماعه دول حلهم إنك متعبرهمش...يعني لما تلاقي الجموسه بتعاتهم معديه الطريق...إمش عاادي خالص
بس لازم يكون معاك سكينه
ليه..!!؟
علشان الجموسه اللي زي ديه
مسيرها هيجيلها لوري لامؤاخذه و يحش رجبتها
و ساعتها تجوم إنت تلحجها بالسكينه..و تسمي
و نااااااكل
و يجعله عامر

6 comments:

يا قلبي يا غريب said...

السلام عليكم
كيف الحال اخي و حال اخونا بينو
كلامك ملهوش حل
و الله نفسي اكتب و اطلع الي جوايا بس في شيء جوا الواحد مات
بس كلامك ماشاء الله طيب زيك
جزاكم الله خيرا

khaled said...

السلام عليكم
اخى
كيف حالك و حال بينو
جميل قوى موضوع الجاموسة ده و انا باحب المواضيع اللى فيها حكم مستخبية
جزاك الله خيرا

R2K said...

: )

د/خـــالد...من المحروسة said...

مدونة طيبة يا اهل الجنة
ربنا يتقبلها منك

بصراحة مفيش احسن من المدونات اللي بتتكلم بطريقة عامية
طبعا طه حسين افندي -الله يعامله بما يستحق-

لو كان عايش كان اتبسط لان البني ادم ده كان بيتمنى نشر العامية وده طبعا لان سيادته كان تنصر وتعمد و..........
بس احنا والحمد لله -مش بنزكي نفسنا-
بس بنحاول نفهم الناس الكلام اللي مش مفهوم بطريقة تفهمهم
.........
هههه
انا متاكد انك مفهمتيش من كلامي حاجة
مش مهم
المهم ان موضوعك جميل
اتشرف باضافتك

والاخ الفاضل خالد واهل الجنة ..ان شاء الله قريبا هيبقى فيه اتحاد المدونين الاسلاميين
(مدونون تحت راية الحق)

khaled said...

الدكتور خالد
فكرة جميلة عن الاتحاد
ان شاء الله على البورش
:)
كنا تكلمنا انا و اهل الجنة على توحيد الاهداف و ان نجعل المدونات تخدم الاسلام
فكرة طيبة

مسلم said...

خالد

الدكتور خالد

ياريت لو نفعل الكلام ده...القصد مش إتحاد بقدر ما هو توحيد للأهداف و الرؤي و تقريب لوجهات النظر