Wednesday, March 21

كلام...و كله بيتكلم


السلام عليكم و رحمه الله و بركاته
الناس دلوقتي كلها بتتكلم
كتير قوي عندهم مدونات و بيكتبوا و يقولوا..كلام كتير...منهم أنا طبعا...كلام كويس..و كلام بايظ
كلام عالي و كلام واطي
كلاااام كتير و كله بيتكلم
بس المهم في وسط الزيطه ديه...نقف و نشوف
مين بيقول إيه

النقطه اللي تأملتها...إن معظم اللي بيكتبوا..مبيقلوش جديد
يعني...مبيخترعوش يعني
بمعني أوضح...إننا بنكتب أفكار و كلام..عندك زي ماهو عندي و موجود برده عند ناس تانيه
و في كتير من الأحيان بننبهر بكلام...مع أنه أفكار بسيطه و قواعد متستاهلش إنبهار
و أعتقد إن ده نتيجه للسطحيه اللي إحنا وصلنالها
و الهيافه اللي بقت جزء لا يتجزأ من حياتنا

من كتر ما بقينا سطحيين بقت أي فكره تحت هذا السطح و لو بسنتي واحد...تخلينا نفتح بقنا شبرين و نبرق و نشرقب و نصفق و نهلل لقائلها ... مبقللش من قدر القائل و لا من قدر الكلمه
بس بقول إن الموضوع مش مستاهل كل الإنبهار ده و إن المفروض إننا فعلا نراجع ثقافتنا اللي إضمحلت ديه
الحاجه التانيه

ضياع اللغه العربيه و ندره و قله من يستخدمونها في كتاباتهم
بل تجد أن كثيراً ممن يحبون اللغه العربيه الرصينه و أدعي أني منهم...تقل بالتدريج الموضوعات التي يكتبونها بالعربيه الفصحي و تزداد نسبه العاميه في كتاباتهم
و عشان كده...سمعت من فتره عن شاعره..أو قل يقال أنها شاعره تدعي إيمان بكري
و اللي قاللي عنها هو الأخ بينو..و دارت بيني و بينه مناقشه حواليها
هو كان معجب و متحمس ليها جداً

في حين إني كنت علي النقيض...مبقولش إننا مش معجب بيها
لأ...جايز هي فعلا بتقول كلام بيمس واقعنا...و بتنتقض...أوضاع في حياتنا
لكن أنا إعتراضي علي الأسلوب
الأسلوب المسف الساخر إلي درجات مذريه..و اللي بتتخلله كتير قوي ألفاظ تؤذي مسامع أي متعفف...و تردي أذناه صرعي لأحط المعاني
ديه حقيقه

يعني لما تقول ما نصه (حموريتك أهلك عاجبانه)..مينفعش أبداً إني أقوم أسقف و أقولها برافوا

جايز فكرتها كويسه...جايز كلامها بيعبر عن واقع أو مشكله

لكن الغايه أبداً لا تبرر الوسيله...و مينفعش نقول إن عشان كلامها فيه شئ من الصحه إنها تتكلم بالأسلوب اللي هي عاوزاه

و إلا يبقي منعيبش علي شخص زي سعد الصغير لما يقول
العنب العنب العنب و البلح البلح البلح
و يطلعلنا واحد تاني يقول
السمك السمك السمك
إما أن نقيس بنفس المقياس و نلوم هذا و نلوم هذا
أو أن نعطي الحق للكل في قول و نشر الإسفاف و السفاله كيف يشاء
اللغه ديه أمانه يا جماعه
لو ضاعت اللغه هنقرأ القرآن إزاي

لو بقيت ثقافتنا هي ثقافه كلنا بنحبك يا حمار و ثقافه إيمان بكري و أمثالها
أمال إمتي هنعرف بن القيم و بن كثير و و جبال أمثال بن المبارك و غيرهم
أنا مبقولش إني مقطع الدنيا قرايه و إني المثقف الأوحد
أو إني العالم العلامه البحر الفهامه
لا أبداً
دا أنا ممكن أكون أدناكم و أحطكم قدرا في هذا الموضوع
لكن الكلمتين دول كانوا محيرني و حبيت إني أقولهم
لغتنا العربيه أروع و أعذب اللغات حقا
لغتنا تستحق أن نتمسك بها و تحافظ عليها و نمارسها قولاً و كتابه
لغتنا لغه القرآن
اللغه التي أنزل بها كلام الرحمن
لغتنا العربيه...بين الغربه و الجهل و النسيان
من يذكرها من يحملها بين شفتيه و يجريها علي اللسان

و يبقي ما قلته مجرد كلمات
كلمات ليس كالكلمات
كلمات تسري فيها النبضات
كلمات تجري فوق لساني و تشعل في عيني ومضات
كلماتي ليست للبشرِ
كلماتي يرقبها الرحمن
كلماتي ليست كالصور
كلماتي تحملني في الجنان
كلماتي توزن عليا في الميزان
كلماتي لو خرجت صدقاً تنجيني من عذاب النيران
كلمات لو لله خالصهً
لن تبقي في قلبي الأحزان
كلماتي مسئوليه في عنقي و لساني ترقبه الأذنان

أحبكم في الله

17 comments:

رفقه عمر said...

كلامك صح بخصوص المدونات التى تتكلم فى كلام تافه ويهلل له الجميع افضل انظر للموضوع من جميع الاتجاهات لا اجد فيه اى شئ يستحق هذا التهليل والاشادة وبصراحه بينزل من نظرى اى شخص بيعلق على هذه البوستات لان الكلمه حق وما يلفظ من قول الا لديه رقيب عتيد وخصوصا لو وجدت شخص جاد او بيتكلم فى الدين ووجودته بيعلق على هذه البوستات بحس ساعتها بالتناقض فى معتقداته واتجاهاته
اعننا الله على قول كلمه يرضى بها عنا اللهم امين يارب العالمين

مسلم said...

رفقه عمر

أولا البقاء لله

أدعو الله أن يأجرك في مصيبتك و يرزقك خيراً بإذنه سبحانه

أشكر لك زيارتك

و تعليقك

جزاك الله خيراً

Mohamed A. Ghaffar said...

بعد إذنك انا رايح اقفل المدونة

مسلم said...

ليه بس رايح تقفلها؟؟؟

مش فاهم

khaled said...

اخى المسلم
جزاك الله خيرا
انا حبيت احكيلك قصة حصلت من ييجى سبع سنين
ساعتها انتشر شريط فى كل مكان
بقيت اسمعه فى القهاوى
فى الشارع
عند بتوع العصير
و فى الميكروباصات و عند الناس الجهلة و المثقفة و فى كل مكان
هاتسألنى الشريط ده فيه اغنية ايه؟
هأقلك الشريط ده مش بتا اغانى
ده كان بتاع الشيخ محمد حسين يعقوب
اعزه الله
لو تتذكر
شريط
لماذا لا تصلى
انت مابتصليش ليه؟
تعرف
انا عرفت ان فيه شيخ اسمه حسين يعقوب من الشريط ده بس
ده اول شريط يتكلم فيه الشيخ بالعامية
و لو تلاحظ ان معظم شرايطه فيها كتير بالعامية بعد الشريط ده
الشريط ده انتشر لانه خاطب الناس على قدر عقولهم
خاطب الناس بلغة يفهمونها
احب اضيف حاجة تانية
ماتطلبش منى ان اتكلم باللغة العربية و انا جاهل بيها
انصب الفاعل و اجر المفعول و اسكن المتحرك و ابهدل اللغة العربية و للاسف باسمع كتير من الشيوخ و الشرايط اللى فيها غلطات نحوية فظيعة و للاسف اللى زى دول منتشرين كتير و كتير من الناس بتحبهم
اقلك
انا مش هاتكلم فى مدونتى باللغة العربية كتير لانى مش قد مسؤولية الغلط و كمان ما احبش اتفزلك و انا من اجهل الناس
لازم اتعلم لغة صحيحة قبل ما اتكلم بيها و الا كنت مسخرة لاهلها و ما قبلوا منى نصيحة
و كيف اخذ نصيح من فاقدها؟
وفقك الله
احبك فى الله اخى الكريم
اختى رفقة
البقاء لله
ثانيا احب اوضح حاجة
احنا عارفين الدين و تقسيماته ما بين معتقدات و معاملات و عبادات
يعنى لو شفت زلة لسان لواحد او حتى شفته قصر فى كلامه او اى حاجة ما اعتبرهاش نقص فى العقيدة
يعنى الناس اللى بتعلق ع الكلام الهايف
و لا ازكى نفسى و لا احد
ما قلش ان ده قدح فى عقيدته
يعنى هو بيتكلم فى الدين فى مدونته
و يروح يعلق على بوستات التهريج اقول عليه ان عقيدته ناقصة؟
حاشا لله
و احب اقلك اختى الكريمة ان مش معنى التدين الجدية و التكشير فى كل الاوقات
يعنى مثلا هل محرم على الضحك و التهريج لمجرد انى متدين؟
اسف على كلامى الكتير
و معذرة ان كنت تثاقلت عليكم
احبكم فى الله
وفقنا الله و اياكم

مسلم said...

السلام عليكم أخي في الله خالد

أولا يا أخي ليس معني أن شيخاً فاضلاً نحي منحيً معيناً أن هذا هو السبيل

لا أقول أن الشيخ الفاضل شيخي و أستاذي و حبيبي في الله الشيخ محمد حسين يعقوب مخطئ

و لكن...الحفاظ علي اللغه أمر هام...فليس معني أهميه مخاطبه الناس علي قدر عقولهم أن نقول (و الله بحبك يا حماري) أو نقول (العنب العنب العنب) هنا إنتقلنا من مجال الدعوه و تقريبها إلي مستوي فهم و وعي القاريئ و المستمع إلي مجال الإسفاف و التدني و البجاحه المتعمده في الألفاظ

و البون شاسع و الفرق واضح بين التحدث بالعاميه في شرائط و دروس الشيخ و بين أشعار هذه الشاعره أو هذا ال سعد الصغير فليس هناك مجال للمقارنه أو للموازنه بين الإثنين

ثم لو أنك تستمع لشيخ فاضل مثل العالم الشيخ الدكتور محمد إسماعيل المقدم و مدي حرصه و تنبيهه علي أهميه الحفاظ علي اللغه

و الشيخ المقدم ممن يجلهم و يقدرهم الشيخ يعقوب أيما إجلال و هو من هو غفر الله له

لا ينافي ذلك أهميه مخاطبه الناس علي قدر عقولهم و لكن مع عدم إغفال جانب هام و هو

أني في خلال محاولتي ذلك لا أغفل أهميه محاوله أخذ أسماع الناس إلي تعود و إلف اللغه العربيه و الإرتقاء بهم في سُلمها

ثم بالنسبه لموضوع الكتابه باللغه العربيه لا أدعي أني ممن يضبطون الكلام إعرابا قبل عرضه و لكن

حاول يا أخي و إجتهد...علي الأقل في إستخدام مترادفات رصينه و عبارات جزله متينه و الله الموفق

أحبك في الله

هدانا الله و إياكم

محمود سعيد said...

بالنسبة لموضوع كتر الكلام
فى الحقيقة الاثنين مطلوبين

كلام ونقاش وحوار وفكر

وتأليف


أما بالنسبة للغة العربية
فأنا شخصياً باحاول أكتب بالفصحى العامية

يعنى الكلام العامى بس اللى أصله عربى
حاجة زى
خش
وصح
وتعالى
وروح
ده عربى وعامى

برضه التدرج مطلوب كما هو فى مثال الشيخ محمد حسين يعقوب

Mohamed A. Ghaffar said...

عشان اخاف يسرى على اللى انت قلته ده
ودرأ المفسدة مفضل على جلب المصلحه

مسلم said...

يا سيدي إحنا بس بنذكر بعض

و ذكر فإن الذكري تنفع المؤمنين

يا قلبي يا غريب said...

السلام عليكم ورحمه الله و بركاته
اخي مسلم
هو سؤال اي لغه سنتكلم في الجنه ان شاء الله..؟
انها اللغه العربيه...لغه القراءن
حيث هناك يا اخي
لَا يَسْمَعُونَ فِيهَا لَغْواً وَلَا تَأْثِيماً [الواقعة : 25]
نسال الله ان نكون من اهل الجنه

khaled said...

اخى المسلم
احبك الله الذى احببتنى فيه
جزاك الله خيرا
اخى الكريم
الناس اللى زى بحبك يا حمار و بتاع العنب و الحاجات دى
خارج نطاق المناقشة اصلا لانه ليس لهم وزن فى مثل هذا الكلام
وانا معك فى اهمية الحفاظ على اللغة العربية اعز الله الشيخ المقدم و شيوخنا الكرام و لكن
لما تشوف الناس بتتهافت على اللى بيتكلموا باللغة العامية و بيعرضوا عن اللى بيتكلموا اللغة الفصحى يبقى لازم نقف و نفهم
يعنى فيه شيوخ من قديم الازل و مش مشهورين
بس الناس الملتزمة و هم قلائل عارفينهم اما بقية الناس ما يعرفوش عنهم حاجة
زى محمد حسين يعقوب و عمرو خالد و محمد هداية و غيرهم كتير
و انا ما بناقش مين هم بس بناقش اسلوبهم اللى خلى الناس تقرب منهم بسرعة
صدقنى الحكاية لازملها وقفة مش مجرد نعمل المفروض و خلاص
ارجو الا اكون متثاقلا عليك اخى الكريم
احبك فى الله

يا قلبي يا غريب said...
This comment has been removed by the author.
BinO said...

بما ان أسمي اتذكر في البوست كان لازم اعلق
رغم اني اتكلمت مع حيمو في الموضوع ده لايف
لأننا بنشوف بعض تقريباً 18 ساعة في اليوم ده قبل ما يقسموا التورتة طبعاً

المهم
كلامك أخي في الله كلام صحيح تماماً
رغم ان البعض فهم الكلام في ناحية تانية خالص زي الستاذ محمد عبد الغفار وخالد
طبعاً اتباع الدب والذوق العام وعدم التدني والأنحطاط والبعد عن اللفاظ البذيئة اهم شئ
وايمان بكري بالنسبة لي كانت حالة
حالة غريبة
تتكلم بلسان الناس اللي مش فاهمة
يعني بتكلم زينا
بس كلامها موزون
ليه هدف وعايز حاجة
يعني كلامها عايز يبني
وليها لون واحد
مش أكثر من لون
طبعاً مش معني الكلام ده اني موافق علي أنحطاط اللفاظ
ولكني أتكلم عن الفكر
وايضاً كون اي أنثي تتكلم بطريقة لا تليق للأناث
حاجة تدمي

أما اللغة العربية
فكما فال قلبي الغريب
هي لغة اهل الجنة
لغة القرأن
لساننا العربي
بس الناس لها عذر لننا لم نتعلمها كما ينبغي
يجب ان نجتهد اكثر لنتقنها
أني كنت اتحسر و انا استمع لطلبة الأزهر القادمون من روسيا والمقيمين في السكندرية وهم يتحدثون العربية الفصحي بطلاقة
واحنا لسه بنرفع المنصوب ونجر المسجون أأقصد المرفوع


وأسألكم الدعاء
وأشوفك في الترانزيت ان شاء الله :)

مسلم said...

أخي خالد

أنا لم أختلف معك علي الإطلاق فكلامك صحيح و لا ينكره إلا جاحد منكر لواقع الأمور أو حالم أخذه خياله بعيداً عن أحوال الناس

الفكره أن حتي شرائط الشيخ يعقوب المتكلم فيها بالعاميه تجد فيها من الألفاظ ما يرقي بمسامعك و ينمي حسك اللغوي و يثري ثقافتك العربيه

و هذا ما أقصده تماماً...فحديث الشيخ يعقوب علي عاميته إلا أنها عاميه بليغه..عاميه ثريه..عاميه محترمه

عاميه هدفها الفصحي و مآلها إليها و ليس العكس

أما ما أتحدث عنه و أنتقده هو العاميع من أجل العاميه أو كما قال سعيد صالح في مسرحيه العيال كبرت رداً علي أخيه الذي كان يتحدث بالفصحي

كلمني بالهجايص

هذا ما أتحدث عنه

مداخلاتك أثرت الموضوع و جعلت له قيمه لم أكن لأتوقعها أو أتوق لتحصيلها

جزاك الله خيرا أخي

مسلم said...

بينو

يعني إنت مكنتش هتعلق لو مكنتش ذكرت إسمك في الموضوع...!!؟

عموماً أعتقد إن تعليقك عندي شرف حصلت عليه..و مع ندره حصولي عليه يزداد الشرف شرفاً و يزداد الكرم قيمه
جزاك الله خيراً

بالنسبه لموضوع إن كلام إيمان بكري له قيمه أو إنه كلام ليه هدف

أنا مختلف معاك بصراحه إيمان بكري مقالتش كلمه واحده مش موجوده عندك و لا عندي و لا عند بياع الكوسه اللي علي ناصيه الشارع

كلنا زهقانين و كلنا قارفانين

يمكنك أن تقول أنها إستطاعت أن تجيد التعبير عنه في كلام منظوم

أقول لك نعم...أجادت النظم و لكن..؟

هل هذا النظم يقبل أم لا هذا هو السؤال

كلامك ذكرني بكلام بتوع الحريات و ألخرابات...!!؟

بيدافعوا عن حريه حتي الشواذ مش مهم هو بيدافع عن إيه المهم إنها حريه

بالمثل مش مهم إيمان بكري بتقول إيه المهم إن كلامها في نظم جيد

لا طبعا الغايه أبداً لا تبرر الوسيله

غاياتي عظيه فلا أنجسها بوسيله حقيره

ليس أن أقف و أنا الأنثي لأقول كلنا بنحبك يا حمار

و من الناحيه الشرعيه لقد سألت أحد الشيوخ الأجلاءو أخبرني أن أقل ما في هذا الكلام أنه عبث لا يفضي إلي مصلحه و ربما يكون فيه غيبه

و لكن حديثي هنا فقط عن إستخدام اللغه المتدنيه بهذا الشكل في الكلام

أما عن موضوع التورته..فأنا يا سيدي إذا كان اللي هيقاسمني في التورته أخ مسلم ..فلا مانع عندي أبدا

و إذا كانو أخدوا مني حته فهي راحتلي برده..لأنها راحت لأخ علي الأقل يشاركني هم الدين و أعلم أنه فرض عليك كما أنه فرض علي أن أحب و لك و تحب لي ما نحبه لأنفسنا

و إلا فلا يؤمن..!؟؟

و بالنسبه للترانزيت...هو ترانزيت يعني إيه بالكوري

BinO said...

يا حيمو انا مش بعلق علي كل حاجة عشان ساعات مش بلاقي كلما اقوله
أو ان الكلام اللي أتقال كفاية
أو نكون انا وانت اتكلمنا في القصة قبل كده

طبعاً انا اكتر حاجة مريحاني انا التورتة ليا وليك
:)

BinO said...
This comment has been removed by the author.