Tuesday, March 6

بسله بالسبانخ...!؟

السلام عليكم و رحمه الله و بركاته
عمرك فكرت تاكل بسله بالسبانخ..!!؟
بسله .... و بالسبانخ .....!!؟
أيوه بسله بالسبانخ...بامايونيز المخلوط بالمسطرده..!؟
إيه يا عم ده...لأ طبعاً................لأااااااااااااااااااه..!؟
طيب ..بس بس براحه..أنا كمان عمري ما كلتها..!!؟
بس لو أنا مجبر إني لازم هاكلها ياعني...أقصد يعني لو غصب عني واكلها واكلها..أعمل إيه..!!؟
تعمل...أنا عارف ياخويا...تعمل مش واخد بالك و خلاص..!؟
يا عيني...يا سيدي...يا فاهمني..؟؟
فاهمك...و الله ما أنا فاهم حاجه.؟
م أنا جايلك في الكلام...شوف يا سيدي..لو أكله وحشه و هاكلها...هاكلها...يبقي لازمته إيه أقف أتفرج عليها و هي بتنطبخ..مقعد بعيد أحسن
و لما تيجي..أبقي أمسك مناخيري بصابعين..و أسدها ..و آكل و أنا مش سامع و خلاص..صح
أيوه صح
طيب أمال ليه بقه الناس عاملين هليييله علي التعديلات الدستوريه الجديده...و كلام و حديت و أفلام هندي..و تركي كمان...و البرلمان يجتمع...و المعارضه تعارض...و ابتوع الحريه يتحرروا...و علي فكره بتوع التحرر هم أولئك الناس الذين كلما سخنت الأجواء تحرروا فيصبحون أكثر حراره من غيرهم في الأقاليم الحاره المتحرره..و يكثر وجودهم بجوار مستنقعات الحري(بحذف نقطه) و..المهم نرجع لموضوعنا
التعديلات الدستوريه عامله بالظبط زي الطبخه الملخبطه...الراجل حط بسله علي سبانخ علي...إسمه إيه ده و عمل خلطه مفيش غير واحد بس يقدر يستحملها...واحد بس هو اللي عاقل في البلدي و ممكن يتعامل مع اللخبطه ديه كلها..ف علي إيه بقه إخواننا من الناس اللي بيتكلموا واجعين دماغنا ... م إحنا كده كده واكلين في الآخر
نظريه برده...!!؟
طبعا يا حبيبي...مدام كده و لا كده هاكل الطبخه الملخبطه ديه..يهمني في إيه بقه إني أتفرج عليها و هي بتطبخ
بس يعني أمال عايزنا نقف مكتوفي الأيدي
دي سلبيه
و ما ضاع حق وراءه مطالب..!!؟
آاااه و تحيا الأمه العربيه...و مصر هي أمي ...نيلها هو دمي...رزها ف خضاري..و ياريت سندوتش حوواشي من خيرك يا مصر
و بعدين نقلب علي ميلودي و لا مزيكا و هاتك يا رقص...و برده ندلع دينا و فيفي و الحلوين دول
يا سيدي بعيداً عن الشعارات الحمضانه اللي أكلت دماغنا محدش أبداً قال إنك تبقي سلبي
و الإسلام أبداً لم يكن دين سلبيه..بل هو الإيجابيه بعينها..و لكن بإعمال العقل
يعني...تقدر تقوللي إيه سبب اللي إحنا فيه ده..ليه حالنا وحش كده..!!؟
طبعاً...خد عندك...الإقتصاد بتاعنا بايظ...و التعليم فاسد....و الإداره بقه في مصر هي المشكله الحقيقيه ..عندنا فساد إداري
فساد....جميل...و فساد ده مش معناه إن مفيش قيم صالحه بتحكمنا..!!؟
أيوه
لطيف...طيب و إيه هي أعظم قيم ممكن تصلحنا..أليست دين الله العزيز الحكيم..!!؟
طبعاً...طبعاً...أكيد
يعني المشكله الأساسيه هي بعدك و بعدي عن دين الله عز و جل..!!؟صح..!!؟
إمم أكيد إستنتاج منطقي
طيب...عملت إيه آلاف المظاهرات و الإعتراضات...علي مدي عشرات السنين..!!؟
الناس اللي بتقف في المظاهره ديه...هل بتقف تصلي الفجر...!؟في جماعه...!!؟صف أول...!!؟؟
طيب حتي في البيت....حطيت وشك في الأرض ليه..!!؟
أصلي أنا كمان مبصليش الفجر في جماعه..!!؟
طيب عرفت بقه إيه الحل..!!؟
أكيد..!!؟
يبقي مين اللي سلبي...اللي قام ليله يعبد ربه...و صلي الفجر..و نفع نفسه و نفع أمته بأنه بني شخص مسلم صالح
و إلا اللي وقف نهاره في مظاهره...و قضي ليله في سهره..و خلص علي كده يومه..!!
أنا مبقولش إن اللي يتظاهروا..كلهم وحشين..!!؟
بس مش معايا إن المظاهرات ديه ممكن تكون أخرت الدعوه سنين..!!؟
يمكن كلامك فيه كتير صح
و يمكن حد يقول ... إني مش صح
بس كلمتين و بس
إرجع للدين
و إعرض نفسك عليه
شوف هيقولك إيه

5 comments:

khaled said...

السلام عليكم
اخى العزيز
جزاك الله خيرا
قال الله تعالى
و من يبتغ غير الاسلام دينا فلن يقبل منه
و قال رسول الله صلى الله عليه و سلم
تركت فيكم ما ان تمسكتم به لن تضلوا
و قال
تركتكم على المحجة البيضاء لا يزيغ عنها الا هالك
لا يزيغ عنها الا هالك
لا يزيغ عنها الا هالك
لا يزيغ عنها الا هالك


الى المزيد وفقك الله

رفقه عمر said...

ياريت كل الناس تعرض نفسها على الدين كانت الدنيا اختلفت كتير ياريت دايما تكتب طل يوم لانى فعلا بستفيد من فكرك جزاك الله خيرا انا بتعلم منكم انت وكل المدونين المحترمين

مش كفايه بقى said...

السلام عليكم ورحمه لله
ربنا يوفقك اخى فى الله ما شاء الله المدونه جد رائعه جدا وربنا يجعلها فى ميزان حسناتك ومنتظرين المزيد

Memo said...
This comment has been removed by the author.
أهل الجنه said...

أولا يا ميمو...
أنا مش إبنك

ثانياً إختاه....إعتقد إنك علقتي علي موضوع تاني خالص

إنت رأيك إن ديه سلبيه

لو قيام الليل سلبيه مكانش رب العالمين فرضه علي المؤمنين طيله سنه كامله في بدايه الدعوه

و بقولك تاني السلبيه بعينها

هي إني أقف في المظاهره بالنهار

و أسهر علي الأغاني و الأفلام طول الليل

هي ديه السلبيه

اللهم أرنا الحق حقاً و أرزقنا إتباعه

و جزاك الله خيراً علي ثنائك