Sunday, March 4

جاي هنا ليه..!!!!!؟

السلام عليكم و رحمه الله و بركاته
العنوان ده أنا اللي مختاره النهارده و أنا اللي هسألك و إنت ترد عليه...ماشي
ماشي يا خط يا أحمر..إسأل
إنت جاي هنا ليه..!!؟
نعم...؟؟!!؟؟
قصدي يعني عاملك مدونه...و حاطط حبة صور في الجنب و كاتب شعارات..و عامل هُليله...ليه..!؟
يعني من الآخر...إيه هدفك من وراء التدوين..!!؟
إيه يا عم..إنت قارص عليه كده ليه..برااااحه شويه..!؟
سؤالك سؤال وجيه بصراحه..و أنا فعلاً كنت حابب إني أقف مع نفسي وقفه..و كنت بفكر أكتب موضوع عن الحكايه ديه لكل المدونين...لكن إنت سبقتني و حطيتني في الإختبار قبل ما أنا أعمل ناصح و أسأل المدونين...عموماً..أنا هحاول أناقش المسأله معاك من أساسها..؟
مبدئياً و بما أني عاده تكون لي مرجعيه إسلاميه في كلامي..و إنطلاقاً من هذه الهويه الراسخه في وجداني أقول لك..إن المفروض عندما يقدم أي شخص علي عمل ما..أن يبتغي به وجه الله تعالي
جميل جداً...بس مش ملاحظ إن ده شعار رنان...و إن التطبيق ممكن يكون غير كده
يعني مثلاً ساعات أنا بحس إنك بتكتب
عشان يتقال إنك بتكتب
أو من أجل طلي السمعه و التقدير من الناس
و إنك بتفرح قوي لما حد بيقولك كويس..و كلامك جميل و بتحزن لما حد بيهاجمك
صح و لا لأ..!؟
أيوه ده بيحصل
و هل كان رسول الله صلي الله عليه و سلم يغضب لنفسه قط..!!؟
لا..و إنما كان يغضب لحدود الله و حرماته
يبقي إنت عندك حاجه غلط..؟؟ صح
أكيد..إنت عندك حق..أنا فعلاً أتهم نفسي بأني لست مخلصاً...و لا تعلم كم هو صعب علي أن أكتبها..و لكنها الحقيقه
ففعلاً أنا أشعر بالسعاده عندما يثني علي أحد..أشعر بها سعادهً لنفسي..و هذا هو بدايه الهاويه
و بعدين إيه الموضوعات اللي بتناقشها في المدونه...!!؟
يعني إيه مدي إرتباطها بواقع أمتك..و مدي تفاعلها مع مشاكل وطنك..و فاسد جيلك من الشباب..!!؟
بصراحه .. كتير بحاول أناقش نقاط تمس الشباب زي..العشق و الحب و القضايا و الفتن اللي حولنا..و ال
بس بس..و بتقعد تحكي عن نفسك و تجاربك و همومك...و توجع دماغنا بيها...من غير ما يكون همك الأول هو دينك..صح
يا أخي براحه عليه شويه..أنا برده بشر..منكرش إن أنا فعلاً عندي أخطاء من اللي بتحكي عنها ديه...صحيح..بس يعني...!؟
بس إيه...بلا بس بلا بتاع
هتقول إيه لرب العالمين...فين مسئوليتك..أنا بكلمك كده لأني خايف عليك و ملاحظ إنك بقيت بتكتب علشان تكتب مش عشان تصلح و تنفع
فوق بقه...و إفهم
يا خط يا أحمر...إنت مسحت بيه بلاط المدونه...و أنا هنشر كلامك ده للناس...عشان انت عندك حق
و عشان يعرفوا سوء سريره اللي بيكتب..و يفهموه صح
المدونات...ديه وسيله لنشر الخير ...لازم نستغلها لنفع الناس
و تعرف يا خط يا أحمر
إيه
أنا نفسي كل المدونين اللي بيشتركوا في نفس الأفكار و المرجعيه الإسلاميه يوحدوا جهودهم مع بعض..يعني نتعرف علي بعض و ممكن نجد طرق أحسن للتواصل و إنتاج فكر إسلامي علي منهج السلف الصالح قد يسهم في تطور مجتمعنا
إيد لوحدها متسقفش...و نتعلم من اللي بيعملوه الجماعه بتوع العالمانيه و الحريه...كلهم عارفين بعض..و بيدخلوا مدونات بعض يقعدوا يشكروا و يمجدوا في بعض
و بيتفقوا علي الوضوعات بتاعتهم مع بعض
منظومه يعني..!!؟
آه منظومه بس زي منظومه الصرف الصحي كده...ريحتها وحشه..وكلها عفن
بس في الآخر التعلم من تجارب الآخرين هو سبيل الفالحين
كويس إنك إعترفت بخطأك..و ياريت لو الخطوه ديه تحقق و مدونين كتير يشاركونا فيها
جزاك الله خيرا علي هذه الإفاقه
و يا رب الناس تتفاعل و لو مره واحده بس

6 comments:

khaled said...

السلام عليكم و رحمة الله و بركاته
الخط الاحمر ما بيتهمكش انت لوحدك ده بيتهمنا كلنا
موضوع تظبيط النية ده من اصعب الامور و بيها بيصلح العمل و بيها برضه بيفسد
و ان سلمت نيتك دخل عليك الرياء و هو الشرك الاصغر او الشرك الخفى الذى اخفى من دبيب النمل كما اخبرنا عنه رسول الله صلى الله عليه و سلم
بس عايز اقولك على حاجة
موضوع الفرح اللى بيحصلك لما حد بيقدرك و يثنى عليك و على اعمالك ده مالوش علاقة بالشرك او الرياء
ده اسمه عاجل بشرى المؤمن
بتلاقى استحسان الناس لعمل و يثنوا عليك فيه بعد انتهائه ما بيقللش من اجرك فيه ان شاء الله
و ده وارد فى حديث للرسول صلى الله عليه و سلم عندما سأله الصحابة عما يصيب الانسان الفرح من ثناء الناس عليه
قال
تلك عاجل بشرى المؤمن
و العلماء قالوا ان دى علامة على قبول الاعمال لانها عاجل بشراك اما الاجل فانها عند الله سبحانه و تعالى يثيبك عليها
و اتمنى ان كل واحد مننا و انا اولكم ان يتقى الله فيما يكتب و يوظف كتاباته لاهداف نبيلة
وفقنا الله و اياك

أهل الجنه said...

جزاك الله خيراً يا خالد

كلامك جميل جداً

بس مقولتليش إيه رأيك في موضوع إن المدونين اللي عندهم وعي إسلامي يوحدوا موضوعاتهم و جهودهم مع بعض و حتي ممكن يبقي في رابطه واحده بتجمعنا

رفقه عمر said...

انا معاك فان لازم المدون يستخدم هذه الوسيله لشئ ينفع الناس اى كان هذا الامر وخالد قال اللى كنت عايزة ااقوله ربنا يكرمك انت وخالد وكل المدونين الخلوقين مثلكم المهم الثبات وعدم اليأس انك توصل افكارك

khaled said...

السلام عليكم
اخى
هى فكرة جميلة بس ممكن تيجى بأسلوب حلو علشان الناس ماتعتبرهاش فرض عليهم و يهجروا المدونات
يعنى مثلا بوست دمه خفيف فيه نصيحة مستخبية او على جوانب المدونة نصايح و اعلانات ادعية و اعلانات عن الاسلام و المواقع الاسلامية زى ما انا عامل فى مدونتى كده
احب اعرف رأيك

أهل الجنه said...

كلامك صحيح

و كمان المفروض إننا..كمدونين لينا إتجاهات فكريه واحده...ندعم و نساند بعض

بمعني...ندخل كلنا علي مدونات بعض...و نشارك بتعليقاتنا...و نوضح الأفكار...و نصحح لبعض الأخطاء

و نطور من آداء بعضنا البعض

فكرتك جميله جدا و فيها فطنه كانت غايبه عني

جزاك الله خيراً

و لو إنت موافقني

ياريت نبتدي مع بعض إحنا الخطوه ديه و ننشرها و ندعي ليها من خلال كل المدونات

يا قلبي يا غريب said...

السلام عليكم
كيف الحال اخي
اسال الله ان يثبتنا علي الحق و اياكم
بالله عليك اسالكم الدعاء