Friday, March 30

دعوه للتعايش

السلام عليكم و رحمه الله و بركاته
الصوره المرفقه هي من إعدادي الشخصي و ليس القصد منها التحقير أو الإهانه فصاحبي الصوره قد تعاونا معاً بالفعل و معني هذا التعاون أن كلاهما لا يري أي عيب في الظهور إلي جوار الآخر
أما عن هدفي من الصوره
فالهدف واضح ليس ثأراً شخصيا من الأستاذ عمرو خالد..أبداً
و الصوره تعبر عن نفسها
الأستاذ عمرو خالد أطل علينا ببرنامجه دعوه للتعايش
و انا لا أريد أن أتكلم كثيراً
فالأستاذ عمرو خالد لم يشأ أن يعطيني الفرصه لتفقد محتوي البرنامج بل باغتني بتتره الذي قدمه تامر حسني مع خلفيه موسيقي صاخبه تصلح لأحد صالات الديسكو و ليس لبرنامج ديني هادف
و الآن
هي عده أسئله
هل يضرب الأستاذ عمرو خالد مثالاً عمليا رائعاً في التعايش و نراه علي خشبه المسرح مع تامر في حفلته المقامه قريبا في منتجع لاجون بالإسكندريه...!!!!؟
و هل نتوقع خطوه تعايش قادمه مع الغرب الأمريكي كما يدعو الأستاذ عمرو خالد و نتوقع أن يسند الأستاذ عمرو تتر برنامجه القادم للفريق الأوربي المشهور
Back Street Boys
لماذا يستثني الأستاذ عمرو خالد الجانب النسائي من تجربته في التعايش مع أنه دائماً يذكر بدور المرأه و مع ذلك لم نري المطربه التي يرتبط إسمها بإسم تامر
المطربه شيرين...!!!؟
الأستاذ عمرو خالد أصر خلال الحلقه الماضيه علي حشر كلمه التعايش في كل جمله ينطقها تقريبا و أصر علي قوله أن الأئمه الأربعه...أئمه الفقه ... كانوا أساساً أئمه تعايش..!!؟
طيب هل كانوا يتعايشون علي أنغام موسيقي البوب بهذا المنظر...!!؟
و لماذا لم يخبرنا الأئمه الأربعه عن أنهم أئمه تعايش أم أنهم كانوا يدخرون هذا للأستاذ عمرو خالد
و الله انا أرجو إن لو أحد سوف يعلق علي الموضوع
أن يتخلي عن العصبيه و التعصب و يقرأ بقصد الوصول إلي الصواب و إحقاق الحق
و إن كنت مخطئا يا أخي فصوبني
فكلنا خطائون
أحبكم في الله
و أكرر هذا ليس هجوماً علي شخص معين..و أنا في كل كلامي لم أقل إلا الأستاذ عمرو خالد
و لكنه الثبات علي سنه النبي صلي الله عليه و سلم و التناصح الهادف

Tuesday, March 27

هو ينفع...!؟


السلام عليكم و رحمه الله و بركاته

ينفع نخلي حرامي يقوم بالآذان في مسجد

مع العلم بإنه حرامي و شغال حرامي و لم يتب أو يعلن ندمه علي ذلك

ينفع

ممكن نخلي واحد زاني مثلاً...إماماً لنا علي منبر من منابر الإسلام

ينفع نخلي واحد يتعامل بالربا أمين علي أموال المسلمين مثلاً

و الللا العقل بيقول إن لكل مقامٍ مقال

و الحكمه وضع الشئ في موضعه

صح و اللللا انا بخرف و اتجننت

لو حد بيقول صح

طيب حد يقولي إيه اللي بيعمله فيا الأخ الأستاذ عمر خالد ده

تامر حسني

تامر

معقوله

يا أخي و الله العظيم حرام

تامر حسني يا أستاذ عمرو

و الله أنا بقول كلمه أستاذ بالعافيه

بس أعمل إيه هحاول أتعايش بقه و خلاص

يا أخي

ألم تجد من شباب الأمه الإسلاميه

و شباب الصحوه في كل هذا الكيان العظيم من يعبر عن دعوتك غير هذا التامر حسني

تامر حسني هذا يبارز الله بمعصيته

تامر حسني هذا يدعوا ملايين الشباب يوميا للحب و العشق و الهوي

تامر حسني هذا يدعوهم للفسق و الفجور

تامر حسني يلهيهم عن ذكر الله

حسبي الله و نعم الوكيل

حسبي الله و نعم الوكيل

و الله أنا دمي بيغلي في عروقي

يا أخي إتقي الله

ألم تقرأ رأي الأئمه الأربعه الذين تتحدث عنهم في الموسيقي و المعازف و الغناء

ألم تستمع إلي أقوال رسول الله صلي الله عليه و سلم في صحيح البخاري و مسلم

ألم يصل إلي مسامعك قول بن مسعود رضي الله عنه في الغناء

هو إنت إيه بالظبط

حسبي الله و نعم الوكيل

حتي و إن قلت صواباً في برنامجك فقد خالط قلبي الشك في منهجك

فإذا كانت مقدمتك و نهايتك و فواصلك كلها يأتيني صوت تامر حسني فيها

صوت من يدعوا ليل نهار للعشق و الهوي

فماذا أنتظر من دعوتك

و أنت الذي وافق هواك هوي شخص مثل هذا

و كما قالوا

الطيور علي أشكالها تقع

و الحمد لله

فقد إمتلئت الشاشات الآن بمن يدعون إلي الله

غير ناظرين إلي بهرج براق

و لا متطلعين إلي ما يغضب الله

أناس نحسبهم علي خير و لا نزكيهم علي الله

لا يتحدثون عن فكر و فلسفات

و إنما يتحدثون بفقه الأئمه و علم الصحابه الكرام

لا يميعون

و لا يطئطون

أناس يعلموننا الدين بدون تمييع

دين محبه

دين سلام

ليس فيه تمييع و لا إستسلام

دين حاسم واضح

قاطع ليس فيه أنصاف حلول

و لا أقبل فيه بالتمييع

ياااااااااااااااااااااااااااااااااااااااااااااااااااااااااااااااااااااااااااااااه

مش عارف أقول إيه

مش مصدق

تامر حسني

حسبي الله و نعم الوكيل

يا أستاذ عمرو

ده دين

مش شخشيخه في إيدك تجيبها شمال و توديها يمين

ده دين

دين رب العالمين

ده دين

تامر حسني....!!!؟

لا حول و لا قوه إلي بالله

حسبي الله عليه توكلت و هو رب العرش العظيم

يا أخي تأمل في الثلاثه الذين خُلِفوا ثم أتوا الرسول صلي الله عليه و سلم

فإعترفوا بأن ليس لهم عذر

ماذا كان الفعل معهم

و هم من ذهبوا لرسول الله صلي الله عليه و سلم

مقرين بذنوبهم معترفين بخطأهم تائبين عن ذللهم

خمسين يوماً...لا يكلمون أحداً و لا يكلمهم أحد...زوجاتهم تركن بيوتهم حتي حكم الله فيهم

خمسين يوما مقاطعه من المجتمع الإسلامي كله

فكيف الحال بمن كسبه و رزقه و عمله إضلال الناس و الدعوه إلي الحب و الهوي و العشق

هاي الله تامر حسني و هداني و هداكم

نسأل الله أن يتوب علي كل عاصٍ مسلم

و لكن...!!؟

طالما أنه مصر علي ما هو عليه

فهل يكون هو ذاك الشخص المناسب

و لماذا تامر بالذات يا أخ عمرو خالد

ليه

إشمعنا

إيه الرساله اللي ورا ده

يا أخي ده حتي هرب من الخدمه العسكريه

و الله العظيم عيب

و الله عيب

مش ممكن

حد عاقل يفهمني
ده كمان عامل إستفتاء
بصوا بصوا
الصوره ديه من موقع الأستاذ عمرو خالد
إستطلاع علي الأغنيه

و الله هتجنن

هو إحنا هنود و اللا ايه

يا جماعه و الله لو أن هذا العمل أبتغي به وجه الله تعالي ... فقد سلك مسلكاً آخر تماماً

و كم من عامل ذا جهد ذهب جهده هباءً بسبب سوء فهمه

و كم من مجتهد ضل السبيل بسبب قله علمه

و سبحان الله
اللهم أرنا احق حقاً و إرزقنا إتباعه
دعاء عجيب و الله
فكثير من الناس لا يرون الحق حقاً
و القليل الذين يرونه حقاً
لا يتبعوه
فسبحان الله

هدانا الله و إياكم إلي سبيل الرشاد




مش عشان هم الإخوان...أبداً .. لكن عشان ...؟

السلام عليكم و رحمه الله و بركاته
بدايه البوست ده بالعاميه الموضوع و ما فيه عن حكايه التعديات قصدي التعديلات الدستوريه الأخيره اللي تفضل مشكوراً سياده الرئيس
و تفتق ذهنه بعد سته و عشرين سنه إنه لازم يتعدي قصدي يعدل الدستور

و كأنه تذكر أن الدستور هو الشئ الوحيد الذي لم يتعدي قصدي يعدل فيه لحد دلوقت
ما علينا من التعديات و مدي جدواها
أنا أصلي مقتنع تماماً إن كل ده فطش و خرف و تهري
ج
تمام زي ما كنت حاسس في الإنتخابات الرئاسيه السابقه...تحس إنك قدام مسرحيه هزليه من بتوع الهالك اللي إسمه نجيب الريحاني
أيامها كان أحد المرشحين بيقول لما أصبح رئيساً سألزم الموظفين بلبس الطربوش الأحمر
عارفينه
يا سكومونوس
المهم كنت عند واحد زميلي إمبارح..عازمني علي الغذاء..و كان عامل خضار سوتيه يجنن بالمناسبه
قوم إيه

و أنا قاعد كده و رجل تحت التانيه و منجعص
أبص ألاقي الأستاذ عمرو أديب في برنامج القاهره اليوم بث مباشر الساعه خامسه
و قال إيه قاعدين معانا عشان الإستفتاء
و كان معاه الراجل الأسمراني القصير ده اللي مش عارف إسمه و الصوحفي التاني اللي إسمه تقريبا خيري
و قاعدين زي عادتهم واحد يغني و التاني يرد عليه كأنهم يعني مش مرتبين الكلام في الفاصل
قوم إيه الأستاذ عمرو أديب راح رازع البوء الجامد اللي طبعا هما مش عارفين إنه هيقولوه و لا عندهم فكره عنه
قال أنا رأيي إن الإخوان لو كانوا نزلوا
كانوا هما الوحيدين اللي ممكن يعملوا حاجه قالها و سكت...و أصحابه مكدبوش خبر هاتك يا تقطيع في فروه الغلابه بتوع الإخوان المسلمين

أنا مش إخوان
و ممكن أكون مختلف معاهم
لكن برده أنا مش مختوم
و لامؤاخذه أنا برده مش الهندي المنتظر
و لا رابط الفيل تحت في عمود النور اللي جنب البيت

و فاهم كويس إنهم مبيهاجموش الإخوان عشان هما إخوان
لأ
عشان الكلمه اللي بعدها
المسلمين
قوم إيه أستاذ عمرو قالك فاصل يا إخواننا
و جاب حبه لقاءات مع الناس اللي راحت الإستفتاء
قوم انا إتعدلت كده و قلت إسمع ياااض و بطل بقه راسك الناشفه دي
قوم جت ست كبيره سألوها إنت جايه ليه جاوبتهم عشان إنتخب
قالولها تنتخبي مين
قالتلهم معرفش
قوم أنا بيني و بينكوا معرفتش ألم روحي
و هاتك يا ضحك و كركعه من هنا لبكره
قوم جابوا راجل تاني
مهنش عليهم يخلوني أكمل ضحكي

سألوه إيه رأيك في التعديلات الجديده

قالها يا ست الأستاذه أهم حاجه لقمه العيش

قوم أنا إنكسفت كده و بطلت ضحك
صعب عليا...ما هو برده بني آدم غلبان و مش لاقي ياكل...و بيقلولوه هنعدل الدستور
و روح قول رأيك
عشان تبقي ديموقراطي
و هو فاكرها يا ولداه حاجه بتتاكل مع طبق الفول فقال يروح يغمس

قوم قلت لنفسي يااض متبقاش كده متطرف دول برده ناس مش مثقفين..إستني لما ييجي حد مثقف قوم شويه
و جابوا شاب زي الورد

سألته المذيعه
سؤال..بصراحه غير متوقع في وقت زي ده
قالتله: يعني إيه دستور...!!!؟
بم بلا لااااااا

قوم الواد خد نفس عميق

و قلت بقه ده هيكسر الدنيا
و راح رادد
و انا تاني معرفتش ألم نفسي من الضحك
قاللها بدال الموضوع كده شوفي حد غيري
هاهاهاهاهااااااااااااااااااااااااااااااااااااااااااااااااااااااااااااااااااااااااااااااااااا
إتوهمت مكنتش مصدق

قوم راح إيه
راحوا جايبين حشد كبير من الناس
قرابه العشر أشخاص

حشد هائل

و قاعدين يقولوا
الصحافه فين الدستور أهوه
بالظبط زي مابيقولوها لرضا البلتاجي لما بيحسب رميه تماس بلنتيين و عشرين ضربه حره من منطقه خطيره للأهلي لما بيلاعب بلديه المحله مثلاً
أنا أهلاوي علي فكره
و أنا قاعد بقه بصراحه بقي خادني علي خوانه
و لقيته إتفتح ..مبقتش مصدق
هما دول اللي رايحين يستفتوا
قوم إيه بعدها بشويه لقيت صوت
خنزير

آااه خنزير
قلت في عقل بالي

هوا تاااني..هو بشكله بغباوته بوشه العكر
الراجل ده اللي مش مفيد خالص
و معاه واحد تاني بتاع مسرحيات إسمه لنين الرملي
و قعد عمو لينين يسفسط
و يقول

أنا شايف إننا في مصر و في المنطقه كلها مشكلتنا إننا لما إختلطنا بالحضاره الغربيه بقينا قدم في التحضر و التقدم و قدم في العصور الوسطي و هي ديه مشكلتنا اللي لازم نحلها
قوم أنا قلت يا واد الكلمتين دول لازم وراهم حاجه تانيه..أكيد بقه هيقول مين دول بتوع العصور الوسطي

بس خاب ظني و الراجل مقلش
قوم الأستاذ عمرو أديب ... كده علي غفله و من غير ما يقصد و لا يرتب و لا أي حاجه
قاله بصوته الجهور
أستاذ لينين...قلت هيقوله نحن العصافير بس مقالش
قاله..إيه رأيك في الإخوان المسلمين
راح رادد الأخ النطع قاله

أهو دول بقه بتوع العصور الوسطي
قلت لروحي يااااه عليك يا واد إنت جامد كده من يومي
قوم إيه الراجل الخنزير راح ناطط من علي الكرسي و بمجهود شاق في رفع منخاره من علي شفاتيره
و قاله
يا حبيبي

يا حبيبي يا لينين
قوم أنا كرهته أكتر ما كنت بكرهه
مش عشان الإخوان
برده
لكن عشان المسلمين
مش تعصب لفرقه و لا لمجموعه

لكن للمسلمين يمكن أكون أنا شخص غير سوي أصلاً
لكن دول المسلمين
هما مش بيحاربوا الجماعه لأنها جماعه
لكن لأنها تنتسب للإسلام
حتي و إن إختلفت معهم في مواقف كثيره

لكنهم إخوتي
يا جماعه..عايز أقول..متنخدعوش
متضيعوش وقتكوا في متابعه المهاترات ديه
الأفضل إن كل واحد ينشغل بنفسه و يصلح روحه
أنا و الله تعبان و قرفان بس عارف إنها هانت
إن الله لا يغيرُ ما بقومٍ حتي يغيروا ما بأنفسهم
كتير مننا مبيراقبش نفسه و يتابعها زي مبيتابع الأخبار و المدونات

يعني مبيقعدش كده يراجع كل كبيره و صغيره في نفسه و شخصيته و حياته
أعتقد لو كل واحد عمل كده حاجات كتير قوي هتتغير
حتي الملتزمين قليل جداً منهم من يفعل ذلك

و أنا و الله أدناكم و أدناهم
بس هقول إيه لعلنا نتغير
لعل الله ييسر لنا التغيير أرجوا إن الرساله تكون وصلت
أحبكم في الله

Sunday, March 25

العصبيه..جاهليه بعد إسلام..!؟

السلام عليكم أحبتي و رحمه الله و بركاته
بعد أن تقرأ السلام لا تنسي أُخيَّ أن ترد علي السلام، فإلقاء السلام سنه و الرد عليه واجب
ثم..ننطلق إلي موضوع البوست
البوست باين طبعا من عنوانه..و العنوان واضح
الكلام عن العصبيه و التعصب المتفشي بيننا
و الذي يكاد لا يسلم منه أحد في هذه الأيام
قال رسول الله صلي الله عليه و سلم عن العصبيه و التعصب
دعوها فإنها منتنه
تقبيحاً منه صلي الله عليه و سلم لهذا الفعل و توضيحا لمده قبحه و سوءه
و خطوره العصبيه أنها تشق الصف المسلم و تقسمه علس نفسه و تشيع الفوضي و الهمجيه بين أفراده
لماذا؟
لأن تعصبك لرأيك و تعصبي لرأي يقتضي تشتت وجهاتنا..و عدم إتحاد مقاصدنا..و منها تحدث الغيره و الحسد و الغيظ
ثم تصل إلي الكره و البغض
و العصبيه ليها أشكال كتيره موجوده في حياتنا و حوالينا
دول إتنين زمايلي في الشغل
نازلين في بعض نقار و مشاكسه...ليه يا تري
لأن واحد فيهم أهلاوي
و التاني طبعا
زمالكاوي
يا جماعه عيب...يا عاقلين مينفعش
لكن بتكلم مين
وصلت إن الأهلاوي بيقول للزملكاوي
ربنا يهديك
لا حول و لا قوه إلا بالله
إتنين تانيين
نازلين خناق ليه يا تري
أصل واحد بيحب تامر
و التاني بيحب حماقي
و اللي اتنين بصراحه أزبل من بعض
يقوله سامع اللحن
التاني يضرب كف علي كف و يقوله يا عم بس فين الصوت
ياجدعان إعقلوا
نسوان العراق هما اللي بيستغيثوا بأعلي الصوت و محدش سامعه بسبب اللي بيعملوه اللي اتنين دول فينا إن كان تامر و الللا حماقي
ربنا يهديهم
بس دول مش ناس نتخانق عليهم و لا حتي يستاهلوا إنهم يكونوا محل نقاش
دول ناس بيبارزوا الله بالمعصيه و يضلون الخلق
هدانا الله و إياهم
المصيبه بقه
العصبيه اللي في أوساط من يدعون و يتصفون بالتدين أو الإلتزام
سبحان الله
تجد الأخ سمع كلمه من شيخ...ياااه خلاص لو حد قال كلمه غيرها ...يقام عليه الحد
تقوله يا أخي المسأله مسأله خلافيه
يقولك الشيخ قال كذا و مش فاهم أصلاً يعني إيه خلاف سائغ و لا يعني إيه راجح و مرجوح و لا أي حاجه
و أخ تاني سمع شيخ بيقول الأغاني حلال
يقوم خلاص بقه أي حد يقول الأغاني حرام يقول عليه متطرف
و كمان إرهابي
يا أخي من نبيك و من قدوتك أهو ذاك الشيخ الذي خرب الغرب رأسه أم هو محمد بن عبد الله صلي الله عليه و سلم الذي لا ينطق عن الهوي
من تصدق كلام بن مسعود رضي الله عنه أم كلام فلان و علان
و كأن الشيخ الفلاني أو العلاني أصبح كلامه كلام منزل لا يقبل تغيير و لا تبديل
و قد ورد عن الرسول صلي الله عليه و سلم أنه يرد عليه علي الحوض أناس من أمته يريدون شربه ماء من يديه لا يظمأون بعدها أبدا
فتحجبهم الملائكه فيقول صلي الله عليه و سلم أمتي أمتي
فترد الملائكه إنك لا تدري ما أحدثوا بعدك
فيقول صلي الله عليه و سلم سحقاً سحقاً بعداً بعداً لمن بدل بعدي و غير
أرأيت..كيف إن إتباعك لا يكون إلا إلي النبي صلي الله عليه و سلم
ثم لا يكتمل هذا الإتباع إلا إذا توخيت نماذجاً إرتضاها الله سبحانه و تعالي لتكون تطبيقاً عملياً لفهم سنه و أوامر النبي صلي الله عليه و سلم
و هم الصحابه رضوان الله عليهم
فلا يكون تعصبك إلا للسنه
أما كلام فلان و علان
فهما كان قدره و مهما كان شانه أو شهرته أو طول لحيته
و جاء بما يخالف هدي النبي صلي الله عليه و سلم و فهم صحابته فكلامه مردود عليه
دون تعصب لأشخاص أو تحزب لجماعات
هذا هو منهجنا الإسلامي المعتدل
و لا ينافي تعصبك لسنه النبي الصحيحه أن تأخذ أخاك ممن لا يعلمون و لا يفقهون ما فقهته أنت باللين و الرحمه فمقصد تعصبك للسنه هو التمسك بها و الثبات عليها...و ليس المناطحه و المجادله مع الناس
و لكن إتباع اللين و الحكمه و الدعوه الطيبه
أما أن أسير وراء شيخ أو داعيه معين بدون وعي مغلقاً أذني عن أي دعوه
فهذا ليس منهجاً إسلامياً علي الإطلاق
فالأصل أنك تتبع الدليل و تأخذ بالبرهان
من الكتاب و السنه
بفهم صالحي سلف الأمه
من الصحابه و التابعين
رضوان الله عليهم أجمعين
هذا هو الأصل
و هذا هو الفهم دون تعصب و دون همجيه
يكون سقف تفكيرك هؤلاء الأفاضل العظماء
يكون مرجع ثقافتك هؤلاء الجبال
الذين لا يشكك عاقل في أنهم أرجح هذه الأمه عقولاً و أمتعهم حديثا و أخشعهم لحدود الله
أحبكم في الله
و أرجو من الله أن ننبذ وراء ظهورنا بذره العصبيه الجاهليه
و نزرع مكانها بذره المحبه و الإخاء و التناصح الأخوي الإسلامي الجميل
أحبكم في الله ثانيه

Wednesday, March 21

كلام...و كله بيتكلم


السلام عليكم و رحمه الله و بركاته
الناس دلوقتي كلها بتتكلم
كتير قوي عندهم مدونات و بيكتبوا و يقولوا..كلام كتير...منهم أنا طبعا...كلام كويس..و كلام بايظ
كلام عالي و كلام واطي
كلاااام كتير و كله بيتكلم
بس المهم في وسط الزيطه ديه...نقف و نشوف
مين بيقول إيه

النقطه اللي تأملتها...إن معظم اللي بيكتبوا..مبيقلوش جديد
يعني...مبيخترعوش يعني
بمعني أوضح...إننا بنكتب أفكار و كلام..عندك زي ماهو عندي و موجود برده عند ناس تانيه
و في كتير من الأحيان بننبهر بكلام...مع أنه أفكار بسيطه و قواعد متستاهلش إنبهار
و أعتقد إن ده نتيجه للسطحيه اللي إحنا وصلنالها
و الهيافه اللي بقت جزء لا يتجزأ من حياتنا

من كتر ما بقينا سطحيين بقت أي فكره تحت هذا السطح و لو بسنتي واحد...تخلينا نفتح بقنا شبرين و نبرق و نشرقب و نصفق و نهلل لقائلها ... مبقللش من قدر القائل و لا من قدر الكلمه
بس بقول إن الموضوع مش مستاهل كل الإنبهار ده و إن المفروض إننا فعلا نراجع ثقافتنا اللي إضمحلت ديه
الحاجه التانيه

ضياع اللغه العربيه و ندره و قله من يستخدمونها في كتاباتهم
بل تجد أن كثيراً ممن يحبون اللغه العربيه الرصينه و أدعي أني منهم...تقل بالتدريج الموضوعات التي يكتبونها بالعربيه الفصحي و تزداد نسبه العاميه في كتاباتهم
و عشان كده...سمعت من فتره عن شاعره..أو قل يقال أنها شاعره تدعي إيمان بكري
و اللي قاللي عنها هو الأخ بينو..و دارت بيني و بينه مناقشه حواليها
هو كان معجب و متحمس ليها جداً

في حين إني كنت علي النقيض...مبقولش إننا مش معجب بيها
لأ...جايز هي فعلا بتقول كلام بيمس واقعنا...و بتنتقض...أوضاع في حياتنا
لكن أنا إعتراضي علي الأسلوب
الأسلوب المسف الساخر إلي درجات مذريه..و اللي بتتخلله كتير قوي ألفاظ تؤذي مسامع أي متعفف...و تردي أذناه صرعي لأحط المعاني
ديه حقيقه

يعني لما تقول ما نصه (حموريتك أهلك عاجبانه)..مينفعش أبداً إني أقوم أسقف و أقولها برافوا

جايز فكرتها كويسه...جايز كلامها بيعبر عن واقع أو مشكله

لكن الغايه أبداً لا تبرر الوسيله...و مينفعش نقول إن عشان كلامها فيه شئ من الصحه إنها تتكلم بالأسلوب اللي هي عاوزاه

و إلا يبقي منعيبش علي شخص زي سعد الصغير لما يقول
العنب العنب العنب و البلح البلح البلح
و يطلعلنا واحد تاني يقول
السمك السمك السمك
إما أن نقيس بنفس المقياس و نلوم هذا و نلوم هذا
أو أن نعطي الحق للكل في قول و نشر الإسفاف و السفاله كيف يشاء
اللغه ديه أمانه يا جماعه
لو ضاعت اللغه هنقرأ القرآن إزاي

لو بقيت ثقافتنا هي ثقافه كلنا بنحبك يا حمار و ثقافه إيمان بكري و أمثالها
أمال إمتي هنعرف بن القيم و بن كثير و و جبال أمثال بن المبارك و غيرهم
أنا مبقولش إني مقطع الدنيا قرايه و إني المثقف الأوحد
أو إني العالم العلامه البحر الفهامه
لا أبداً
دا أنا ممكن أكون أدناكم و أحطكم قدرا في هذا الموضوع
لكن الكلمتين دول كانوا محيرني و حبيت إني أقولهم
لغتنا العربيه أروع و أعذب اللغات حقا
لغتنا تستحق أن نتمسك بها و تحافظ عليها و نمارسها قولاً و كتابه
لغتنا لغه القرآن
اللغه التي أنزل بها كلام الرحمن
لغتنا العربيه...بين الغربه و الجهل و النسيان
من يذكرها من يحملها بين شفتيه و يجريها علي اللسان

و يبقي ما قلته مجرد كلمات
كلمات ليس كالكلمات
كلمات تسري فيها النبضات
كلمات تجري فوق لساني و تشعل في عيني ومضات
كلماتي ليست للبشرِ
كلماتي يرقبها الرحمن
كلماتي ليست كالصور
كلماتي تحملني في الجنان
كلماتي توزن عليا في الميزان
كلماتي لو خرجت صدقاً تنجيني من عذاب النيران
كلمات لو لله خالصهً
لن تبقي في قلبي الأحزان
كلماتي مسئوليه في عنقي و لساني ترقبه الأذنان

أحبكم في الله

Tuesday, March 20

الحلاقه ملهاش كبير

السلام عليكم و رحمه الله و بركاته

أنا شغال في شركه المفروض إنها شركه كبيره

شركه بترول...و مش أي شركه

لائحه الشركه
الماده الأولي: الحلاقه ملهاش كبير
first rule: Shaving Has No Limits

و بصراحه بحس إني شغال مع شيوخ منصر...ناس تاكل مال النبي

و هو ده اللي بيتقال عليه الفساد الإداري في مصر المحروسه

الناس بيبصولنا في لقمه العيش..مع إن أقل واحد فيهم بيلهف مرتب يكفي خمسين واحد من محدودي الدخل

و بعدين بقه النظام...النظام عندنا...حاجه كده إيه ..أقول إيه يا خواتي...تهبل

تجنن

حاجه تنقط

تموت

هفرقع

مش قادر...بجد أنا دماغي مولعه

يا جدعان اللي يقولكوا مصر بتتقدم..و يقولكوا الكوادر المصريه .. و سواعد المصريين و الكلام ده

قولولوه يتنيل في جنب

قولولوه ينقطنا بسكاته

مش عايز أقول كلام قبيح و الله

بس الكلام أهوه بيتنطط علي لساني

طقشونا في بعض أنا و بينو
مره عشان اللحيه...و مره عشان المصالح و اللخبطه

و مره عشان كل واحد عايز يمشي اللي في دماغه

الحاجه اللي هونت عليه

إني شفت يعني إيه..أخوه في الله

كان في سفريه و المفروض إن أنا كنت مسافر فيها...مش عشان أحقيه معينه ..لكن عشان البرويوكول كده

و بعدين حصل تضارب معين...و قرروا يسفروا بينو .. عشان مصالح و خلافات بين مديري و مديره

و بعدين مديري ... عمل زوبعه

قاموا قرروا يسفروا كل واحد فينا نص المده

تقولهم..يا جماعه مينفعش

يا جدعان حد يديني عقله

حروح أنا أعمل إيه

طيب و الراجل اللي هيرجع ده هيرجع ليه

لكن في الأول و الآخر أنا كنت و الله مبسوط ليه كأني أنا اللي سافرت بالظبط

مش عشان أنا واد جدع و لا حاجه

بس عشان حديث نبي العالمين صلي الله عليه و سلم

لا يؤمن أحدكم حتي يحب لأخيه ما يحب لنفسه

و الصراحه كانت صعبه شويه إن فرحتي ليه تكون زي فرحتي لنفسي بالظبط

بس أنا حاولت و حاولت أكون مخلص لله

أدعو الله أن يتقبل مني

و أدعو الله أن يبارك لأخي بينو في ماله و عمله و صحته

و أخيراً

معلش يا بينو..متزعش نفسك...محدش يستاهل إنك تعكر دمك عشانه

و إفتكر

إن

الحلاقه ملهاش كبير

Thursday, March 15

مسلسل واحد و حلقات متفرقه

السلام عليكم و رحمه الله و بركاته
في ظل ما يجري و يحدث حولنا من أحداث متلاحقه يصبح واجبا علي كل فرد أن يدقق النظر و يمعن التفكير في كل ما يجري من حوله و ما هي الخلفيات التي ينبني عليها كل ما يجري

فمثلا بين تصريحات غفير الثقافه المصري المدعو فاروق حسني حول الحجاب و بين إعدام صدام قد يبدو الفارق بعيد و كبير جدا و لكن المدقق المتأمل في الموقف يعي تماما أن ثمه إرتباط بين الحدثين ربما بعد قليل سيجوز لي أن أقول أنه إرتباط وثيق و من الممكن ساعتها أن أجد القارئ العزيز يوافقني في الأمر

البعض تخيل أن الكلمات المسمومه الي أطلقها غفير الثقافه جاءت كلمات عشوائيه لا تنم عن إعداد مسبق لها و ترتيب مقصود لميعدها،و أنا أختلف مع هذا المذهب حيث أري أن كلمات هذا الكلب ما هي إلا حلقه ضمن سلسله الهجمات التي تشنها العالمانيه الغربيه علي الإسلام و قد يرد أحدهم و يقول أن الكلمات أتت من (رجل) مسلم فلماذا نقحم الغرب في كل شيئ، و الرد بسيط فليس خافيا علي أحد أن إحدي الوسائل الفعاله التي يستخدمها الغرب في مهاجمتنا هي إطلاق ألسنه أناس من جلدتنا و يتكلمون كلامنا و لكنهم أبعد ما يكونون عنا و عن الإسلام و ربما يصبح ذلك جليا واضحا إذا إستطلعنا الماضي المقزز لكل أصحاب المنابر الغربيه في مصرنا الإسلاميه أمثال قاسم أمين و طه حسين و محمد عبده و العقاد و القائمه طويله و فيها أيضا من مدعيات الأنوثه أمثال نوال السعداوي و إقبال بركه . عند إسترجاع كل هذه الأسماء نجد أن جميعهم كنا نحسبهم منا ، يطلون علينا عبر إعلامنا و لكنهم يتكلمون بما غرسه فيهم أربابهم في الغرب إذا فكلمات هذا الرعديد خفير الثقافه لم تكن إلا إحدي هذه الهجمات التي أريد بها توجيه ضربه عالمانيه في الجسد الإسلامي الذي بدأ يتعافي من جراحاته الداميه و بدأت الصحوه تدب في أوصاله مما هيج مخاوف الغرب الصليبي و لذلك نجد الضربات أصبحت توجه بقوه و تتابع سريع جدا فهذه الصور المسيئه للرسول صلي الله عليه و سلم و هذا الكافر بابا الفاتيكان و هذا الأفاق خفير الثقافه.
إذا يبين لنا أن كلمات هذا الشخص ما هي إلا هجمه من جمله الهجمات عي المسلمين في كل مكان

كذلك الأمر بالنسبه إلي إعدام الرئيس العراقي الراحل صدام حسين رحمه الله ، الأمر هنا كان واضحا لكل الناس كبير و صغير .... فإعدام الرجل كان تنفيذا للأحقاد الصليبيه الرافضيه الت إجتمعت مصالحها و تشابكت و تقابلت في بلاد الرافدين و التي لن تصبح أبدا بلاد الرافضين....و هذه المره نجد أيضا اناس عليهم سمت الإسلام لكنهم أبعد ما يكون عنه إنهم أتباع الدين الشيعي الرافضي الإمامي الإثني عشري...أتباع الخميني عليه لعنات كل لاعن...تم إغتيال الرئيس صدام حسين صبيحه يوم عيد الأضحي و ليس مستغربا أن يتم ذلك فهذا هو النتاج الطبيعي و المتوقع لأتباع الدين الرافضي...! هذا هو دينهم و هذه هي عقيدتهم...!!

فأؤكد مره أخري علي النقطه الأولي و هي أن الحد ثين ليسا بعيدين عن بعض و إنما هما حلقتين منفصلتين في مسلسل واحد تتواصل حلقاته واحده تلو الأخري حلقات قد تبدو منفضله عن بعضها إلا أنها حقيقه مرسومه و معده من قبل مخرج متقن لعمله..!! و لكن

و يمكرون و يمكر الله و الله سبحانه هو خير الماكرين

فالشعب المصري بجميع طوائفه توحد علي نبذ العالمانيه اللادينيه ممثله في شخص الغفير
و المسلمين جميعا وقفوا من الرئيس الراحل صدام حسين موقف المنبهرين ببطولته الحزني علي أحد أبنائهم و ربما محيت جميع مساوءه بعد أن تكشف الغطاء عن أعماله في العقد الأخير من حياته و التطور الإيماني الذي حدث في شخصيته فصدام رغم أنف الكل
مات ...!!! و لكن
مات بطلا

Sunday, March 11

راكب جموسه

السلام عليكم و رحمه الله و بركاته
غريب شويه إسم البوست ده...راكب جموسه..!!؟
و أنا ماشي يوم الخميس الماضي...راكب...عربيتي ...و مسافر ... و معايا بينو ...علي طريق الإسكندريه القاهره الزراعي
تأملت منظراً شوفته كتير قبل كده...بس المره ديه كانت أول مره أتأمله
منظر إيه ده بقه
منظر الراجل الفلاح اللي مروح من الغيط آخر النهاار
و ديه فيها إيه ديه
الراجل بيعدي الطريق...اللي كله عربيات ... و معاه الجموس بتاعه ...الغريب بقه إن الراجل
راكب علي الجموسه...!؟
و دي فيها إيه ديه
بقولك يا جدع إنت الراجل الغلبان ده بيعدي الطريق اللي كله عربيات مسافره..و هو راكب الجموسه
يعني لو يعني فرضاً واحد إتهور كده و لا كده...إيه اللي هيحصل
الراجل ده لا هيعرف يروح و لا ييجي
ماهو راكب علي الجموسه
آاااه
فهمت يعني..الراجل المفروض يمشي و يجر الجموسه بحيث إن قدر الله و حدث شئ...فيعرف ينفد هو و يبقي الحكايه جت في الجموسه
آاااااه تصدق أنا برده أول مره أفكر فيها كده
طبعاً الراجل لو قبل ما يعدي الطريق بص إيه اللي هو هيعمله و فكر في عشر ثواني..أكيد مش هيعمل كده
لكن الفكره إننا في حاجات في حياتنا...بنعملها...عشان بنعملها
من غير ما نفكر و بنعملها لأننا إتعودنا نعملها كده..و إتربينا و شوفنا بابا و ماما..بيعملوا كده
فعلاً عندك حق..أنا في حاجات كتير بعمل فيها كده
يعني بصراحه كتير مننا...راكب جموسه
بس كل واحد عنده جموسته الخاصه بيه
في واحد جموسته...في شغله
و في واحد جموسته...في معاملاته
و في واحد جموسته في...كذا و كذا
عارف أنا ساعات...بقول لنفسي لو مكنتش أنا اللي هغير و هستني حد غيري يغير...و لو كل واحد عمل زيي..يبقي إمتي هنتغير
يا سلام أديك جبت الكلمتين اللي بلف و أدور عليهم من الصبح
طبعاً ما أنا اللي فاهمك.. و عاجنك و خابزك
بس خلاص...بلاش الكلام ده قدام الناس
المهم...عارف أكتر جموسه بتضايقني إيه
الجموسه إياها اللي إسمها الحريه و العالمانيه اللي الناس بتوع الحراره راكبينها
قصدك بتوع الحريات
أيوه بتوع القضايا و الخناقات...أهو الجماعه دول راكبين الجموسه من زمااان..و جموستهم كبيره قوي
معديين الشارع كده من غير لا إحم و لا دستور
هاها
آه بجد..و بعدين جموستهم...جموسه لا مؤاخذه مبتستحيش...يعني ماشيه تعك يمين و شمال..و ريحتها وحشه
علي رأيك الجماعه دول مبسمعش حسهم إلا و أحط إيدي علي قلبي...و أقلق كده و تجيلي النوبه
مش بقولك...ده بسبب الريحه
طيب و الجماعه دول إيه حلهم
شوف يا....إبني
الجماعه دول حلهم إنك متعبرهمش...يعني لما تلاقي الجموسه بتعاتهم معديه الطريق...إمش عاادي خالص
بس لازم يكون معاك سكينه
ليه..!!؟
علشان الجموسه اللي زي ديه
مسيرها هيجيلها لوري لامؤاخذه و يحش رجبتها
و ساعتها تجوم إنت تلحجها بالسكينه..و تسمي
و نااااااكل
و يجعله عامر

يُمَتَّعُنِي...!!؟

السلام عليكم و رحمه الله و بركاته
بسم الله و الصلاه و السلام علي رسول الله صلي الله عليه و سلم
منذ فتره لا تزيد علي الأسبوع أو الأسبوعين...إستمعت إلي شريط للشيخ الجليل الذي أحبه في الله الشيخ محمد حسين يعقوب...و الشريط هو واحد من جمله سلسله رائعه للشيخ أسمها سلسله أصول الإلتزام
الشريط إسمه التبتل..و موضوعه الأساسي..كيف يجب أن يكون لك حظ من العباده لله..و أن أساس هذه العبادات هو الحب لله و ليس الآداء الحركي و الجسدي فحسب...تحدث الشيخ بإستفاضه عن سائر العبادات و أسهب متحدثاً عن الذكر...ذكر الله...و ما هو وردك من الأذكار المختلفه...كلام الشيخ و كأنه وجد صديً في نفسي...بل و شعرت به يتردد في أركاني..و يملئ وجداني..و يتردد في كياني كله...هل أذكر الله علي هذه الحاله التي يتحدث عنها الشيخ
هل أشعر بهذا الحب لله حين أذكره...هل أشتاق إلي ذكر الله رب العالمين
هل أشعر بمذاق هذه الكلمات علي لساني..تجري حلوهً هنيه عذبهً شجيه..هل و هل...أسئله كثيره راودتني..و ربما في بعض الإجابت شعرت بي أشفق علي نفسي..فكم أنا بعيد...و كم كنت غير مدرك لمعني عبادتي لله
و قررت أن أجرب
و بدأت و كما تعلمت بالإستعانه بالله...قلت يا رب أنا أتكلم دون شعور ففهمني يا أرحم الراحمين
أريد أن أشعر بلذه عبادتك
ثم أخذت أوحي إلي نفسي و أغرث الشوق إلي عباده ربي في كياني...و حقيقهً لم أكن أغرث هذا الشوق بل أعيد غرث ما أجتثته الذنوب و المعاصي و حياه اللهو من ما هو موجود أصلاً في فطرتي
فأصبحت أنهض لصلاه السنه..و أنا أخبر نفسي أني أريد أن أتركع لربي...أريد أن أشعر بحلاوه ذلي و قربي من حبيبي الرحمن الرحيم
و أخذت أحاول الإكثار من ذكر ربي
حتي أتت لحظه أذكرها و كأنها الآن...كانت في صلاه سنه العشاء...أحسست بحلاوه غريبه لقول سبحان ربي الأعلي..حتي أني كنت أشتاق و أنا قائم للسجود...و أخذني الشوق و تلاعب بي...في قيامي كدت أبكي...فركعت ذليلاً لربي...في حين كان شوقي يأخذني ... أريد أن أسجد و أكبر رغبه تجتاح قلبي...هي أني أريد أن أحمد الله الذي شرع لنا كلمه سبحان ربي الأعلي
من فرط شعوري وقتها بحلاوتها...أردت أن أحمد الله و أشكره أن يسر لي قولها
فسبحان ربي الأعلي...القوي الأبقي..سبحان ربي الكريم واسع المن ..كريم الصفح..ذو الجود و الكرم و المنه
و لكن
لم ألبث أن أحفظ نعمه ربي علي...و غرتني نفسي..و تكالب علي هواي و شيطاني..فأردوني..فذللت و عصيت ربي
فذهبت عني حلاوه و لذه شعوري بقرب الله
و الجزاء من جنس العمل
فأنا لم أحفظ النعمه فكان الجزاء أن تزول من قلبي
و أخذت أهرول أبحث يمينا و يساراً في نواحي قلبي...أين ذهبت..لماذا إختفت..و جاوبت نفسي..بأني أصبح الآن علي أن أعمل أكثر و أجتهد أكثر حتي يمن الله علي بهذه النعمه مره أخري
و الآن أريد أن أقول لكم أنه فعلاً
يُمَتِّعُني....!؟
حقاً أذوب أحياناً بذكر الله
لو حاولت أن تداوم علي ذكر الله ستعرف ما أتحدث عنه بالتحديد..إنها حلاوه الذكر و مصداق قول الله...ألا بذكر الله تطمئن القلوب
و الله إنها لمتعه
أرجو منكم أحبتي..أن تدعوا لأخيكم أن يهديه الله و يصلح عوج قلبه
و أتمني بصدق لو أنكم إستمعتم إلي هذه الماده الراقيه و التي هي بعنوان

Thursday, March 8

حقيقه الدعوه إلي توحيد الصف الإسلامي (بوست قديم يعاد نشره)..!؟

حقيقه الدعوه إلي توحيد الصف الإسلامي

وجهت إلي واحده من أعضاء المجموعه (مجموعه أهل الجنه البريديه) إقتراحا جميلا بأن نوالي نشر سلسله من الرسائل التي تتناول بعض المفاهيم التي طمس معناها و المقصود منها بل و يمكن القول بأنه قد تم إساءه إستخدامها في كثير من الأمثله حتي أصبح تستخدم في غير معناها الحقيقي كمثال مثلا كلمه الحريه....أصبحت الآن تستخدم بإفراط حتي أصبحت فوضي و ليست حريه....إقتراح الأخت كان إقتراحا ذا قيمه أجدني الآن أستعير منها فكرتها و أبدأ بشيئ دار في خلدي... و هو مرتبط بما تمر به أمتي الغاليه من أحداث.

طبعا الإنسان إن ظل قابعا في شرنقه حياته الخاصه فإنه حتمي سيموت بداخلها دون أن يدري أحد أو يحس له الناس بأثر...بعض الناس ينشغل تماما بل و يغرق في حياته الخاصه من جمع للمال و تحقيق للرغبات الخاصه و فقط و أجدها صراحهً حياهً عفنه بل و إنها ليست بحياه فهي للموت أقرب...و لذلك فأنا أعشق الإندماج مع مشاكل مجتمعي و قضايا أمتي الإسلاميه.

الأحداث الدائره الآن من صراع بين السنه و الشيعه و الذي تسوده الآن الدمويه المفرطه من الجانب الغادر الذي إن راجعنا التاريخ وجدناه يشهد و يقر بأن الدمويه هي نصف الدين الشيعي و هي عمود الوسط في هذا البناء الرافضي الخبيث...هذه الأحداث جعلت المتكلمين و المتحدثين و من يدعون بالمثقفين و العلماء سواء من إنطبق عليهم إسم و صفه العالم أو من لم يصبهم منها إلا الإسم ، كلهم إنقسموا علي أنفسهم و إنما أقصد بالإنقسام هنا أهل السنه بعديد إتجاهاتهم...و أيضا فرق الليبراليين الذين حقيقه أشبههم بالذباب تجده يقف علي أي شيئ و خصوصاً مناطق العوج و العفن ، تحاول أن تبعده فلا يبتعد و عاده لا يظهرون إلا في الفتن و المحن كعاده الذباب يجمعه الشيئ العفن...!!!

عموما إنقسم أهل السنه إلي ثلاث فرق أؤكد أهل السنه...
أولها : عوام بسطاء غرهم الزهو الرافضي و بهرتهم الهاله الإعلاميه حوله. و تأيدهم للشيعه تأييد عاطفي بحت
و ثانيها: أناس يدّعون الفطنه و ينادون بالتقريب بين السنه و الروافض و الفرق بينهم و بين الأولي أن هؤلاء تأييدهم ليس عاطفيا و إنما هو تأييد منهجي قائم علي تضليل الناس و صرف أنظارهم عن عقائد الشيعه و هو تضليل ناتج عن الجهل و العمي الذي أصاب أبصارهم. و منهم طائفه العالمانيين و بعض الجماعات الإسلاميه ذات الطابع السياسي في مصر و المحظور نشاطها بحسب أقوال الرئيس الأخيره و التي تثير العجب..!!
و ثالثها: فريق قاوم و وقف من أول لحظه ليعلن أن الدين الشيعي دين بعيد تماما عن الإسلام و أخذ علي عاتقه مهمه التعريف و التنبيه بخطر المد الشيعي علي الدين الإسلامي، و هؤلاء هم طائفه العلماء بكينونه الدين الشيعي و جذورها الصفويه المجوسيه و كرههم للإسلام و المسلمين، و هؤلاء جاءت آرائهم بناء علي دلراسه تاريخيه و دينيه لكتب الشيعه أنفسهم و متابعه التاريخ...فعلموا و حذروا و أثبتت الأيام صدق موقفهم

بعد هذه المقدمه قد يسأل القارئ سؤال .... أين هذا المفهوم الذي نريد بيانه كما قلنا في بدايه الرساله
نعم الكلمه التي أريد لها التوضيح هي جمله و ليست كلمه

توحيد الصف الإسلامي

العباره صراحهً عباره براقه جدا...إتخذها كثير من من لا يعلمون حقيقه الدين الشيعي نبراسا و طريقه عمل و مبررا للدعوه لفتح باب الحوار مع الشيعه
و قالوا بأن توحيد الصف ضد العدو أهم من الخلافات الداخليه و أن من يدعون لنبذ الشيعه و يحذرون منهم إنما هم من قصار النظر الذين لا يريدون للأمه النصر، ثم لا يلبثون أن يضربوا مثال بأوروبا الموحده و يقولون إنظروا كيف توحدت أوروبا..!!! كلام فيه منطق أقول عجيب ..!!فإن من البيان لسحراً
و هنا سؤال ما معني توحيد الصف الإسلامي و بين من و من يكون..؟
حقيقهً أولي: قواعد إقامه الوحده بين طرفين هي توحد المقصد...و انا ذكرت في بدايه الكلام أن هذا الجدل دائر في أوساط أهل السنه فقط و كان لي هدف من ذلك بتوجيه النظر إلي أن الشيعه موقفهم واضح و هم علي قلب رجل واحد أن السنه هم العدو الأول و أنهم يتحالفون مع الشيطان للفتك بأهل السنه
إذن هل الأساس الأول و هو وجود هدف واحد متوفر .... قطعا لا
هم هدفهم إقامه دوله شيعيه كبري في الخليج أو ما يسمس بالهلال الشيعي و لن يتأتي لهم ذلك إلا بالقضاء علي أهل السنه،و الخميني...يؤكد في كتبه أنه لا رفع لرايه جهاد إلا بعد خروج المهدي إلا ضد السنه الذين يسمونهم النواصب.. أما السنه فهدفهم إعاده بناء البيت الإسلامي من الداخل و تهيأته لمحاربه أعداء الإسلام علي كافه أشكالهم

إذا فلا مجال هنا لذكر كلمه الوحده بين السنه و الشيعه من حيث عدم وجود هدف واحد فعلام الإختلاف يا أهل السنه..!!!

ثانياً : التوحد يعني غض طرف كل من الطرفين عن مناطق الإختلاف عند الآخر و هذا غير متوفر بالمره عند الجانب الرافضي الذي يقول صراحه بأن السنّي كافر و ماله و دمه و عرضه حلال بل و يتقربون لله بقتل الأبرياء من أهل السنه...!! و لن يكون هذا أبداً متوفراً عند أهل السنه لأن غض الطرف عن عقائد الشيعه يعتبر سكوت علي تبديل أصول الدين و تغيير معالمه..و لا يجوز لنا بحال السكوت عن هذا العوج.. فكيف التقارب يا من عندكم العقل و الحكمه

ثالثاً: و هي نقطه هامه.... جدا المعروف أن باب التحالفات العسكريه مفتوح فمثلا ليس هناك ما يمنع من أتحاف مع عدوي للنيل من عدو آخر... و لكن هذا يستوجب أمرين هامين...
أولهم: أن أطمئن و أءمن تماماً غدر هذا العدو الذي أتحالف معه الآن.
ثانيهم: أن أتخذ مع ذلك كامل الإحتياط من هذا العدو الذي أحالفه


و ننظر هل ينطبق هذا الكلام علي الشيعه:

الشيعه أهل غدر و مكر و عندهم أنا التقيِّه تسع أعشار دينهم فالنفاق و الكذب و الغدر و إظهار عكس ما يبطنون أساس عندهم يتعبدون به...فكيف الأمن مع هؤلاء الأوباش...يقول قائل أحسن الظن بهم و لن أرد أنا بل أترك التاريخ يرد...و يمكنكم إستشاره هولاكو و سؤاله عن الشيعه...أو ملوك البرتغال الذين حالفهم الشيعه الصفويون لغزو الحرم المكي
يمكنكم سؤال الخلافه العثمانيه عن أسباب سقوطها...ستجيبكم الشيعه الصفويون ..إستشيروا بن العلقمي...ستعرفون أنهم خونه كلاب لا أمان لهم..و لمن لا يعلم فقد كان وزير ملك التتار هولاكو خان..وزيره كان الطوسي..و هو شيعي محترق...إسألوا عماد الدين زنكي...عن وزير مصر الفاطمي الشيعي شاور و تحالفه مع الصليبيين لقتال عماد الدين زنكي و من بعده صلاح الدين الأيوبي

إذن كيف الأمن مع هذا الحليف الذي يريدنا البعض أن نفتح باب التحاور معه..؟!!!

طبعا لم أستطرد هنا إلي الناحيه الدينيه و ما يؤسس عليه الشيعه دينهم من سب لأم المؤمنين عائشه رضي الله عنها و سب للصحابه رضوان الله عليهم و تحريف للقرآن و تغيير في الصلاه و تبديل في الأحكام و تأليه للأئمه و عبوديه للقبور و سجود للأصنام و طواف بالأضرحه و إستغاثه بالموتي و شرك بالله و سب لأزواج النبي صلي الله عليه و سلم و نكران لسننه و ممارسات شاذه و إستباحه للحرمات و عفن ما أنزل الله به من سلطان و دعك مما قد يروجه الشيعه نفسهم من أن هذا غير صحيح فكل كلمه قلتها موثقه بأدله صوت و صوره و من كتبهم و مراجعهم فلا تخدعك تقيتهم

سيقول البعض أننا و هم نعبد ربا واحدا و نتبع نبيا واحدا...أقول له أخطأت و الله و لست أنا من أقول و لكنه أحد مراجعهم و علي ما أذكر هو التعيس الشقي نعمه الله الجزائري الذي قال نصاً...النبي الذي خليفته أبي بكر و عمر ليس نبينا .... و الرب الذي صحابه رسوله أبي بكر و عمر ليس ربنا...هكذا قالها فهل بعد هذا الكلام كلام....!!!أرجو أن تكون الفكره واضحه

Tuesday, March 6

بسله بالسبانخ...!؟

السلام عليكم و رحمه الله و بركاته
عمرك فكرت تاكل بسله بالسبانخ..!!؟
بسله .... و بالسبانخ .....!!؟
أيوه بسله بالسبانخ...بامايونيز المخلوط بالمسطرده..!؟
إيه يا عم ده...لأ طبعاً................لأااااااااااااااااااه..!؟
طيب ..بس بس براحه..أنا كمان عمري ما كلتها..!!؟
بس لو أنا مجبر إني لازم هاكلها ياعني...أقصد يعني لو غصب عني واكلها واكلها..أعمل إيه..!!؟
تعمل...أنا عارف ياخويا...تعمل مش واخد بالك و خلاص..!؟
يا عيني...يا سيدي...يا فاهمني..؟؟
فاهمك...و الله ما أنا فاهم حاجه.؟
م أنا جايلك في الكلام...شوف يا سيدي..لو أكله وحشه و هاكلها...هاكلها...يبقي لازمته إيه أقف أتفرج عليها و هي بتنطبخ..مقعد بعيد أحسن
و لما تيجي..أبقي أمسك مناخيري بصابعين..و أسدها ..و آكل و أنا مش سامع و خلاص..صح
أيوه صح
طيب أمال ليه بقه الناس عاملين هليييله علي التعديلات الدستوريه الجديده...و كلام و حديت و أفلام هندي..و تركي كمان...و البرلمان يجتمع...و المعارضه تعارض...و ابتوع الحريه يتحرروا...و علي فكره بتوع التحرر هم أولئك الناس الذين كلما سخنت الأجواء تحرروا فيصبحون أكثر حراره من غيرهم في الأقاليم الحاره المتحرره..و يكثر وجودهم بجوار مستنقعات الحري(بحذف نقطه) و..المهم نرجع لموضوعنا
التعديلات الدستوريه عامله بالظبط زي الطبخه الملخبطه...الراجل حط بسله علي سبانخ علي...إسمه إيه ده و عمل خلطه مفيش غير واحد بس يقدر يستحملها...واحد بس هو اللي عاقل في البلدي و ممكن يتعامل مع اللخبطه ديه كلها..ف علي إيه بقه إخواننا من الناس اللي بيتكلموا واجعين دماغنا ... م إحنا كده كده واكلين في الآخر
نظريه برده...!!؟
طبعا يا حبيبي...مدام كده و لا كده هاكل الطبخه الملخبطه ديه..يهمني في إيه بقه إني أتفرج عليها و هي بتطبخ
بس يعني أمال عايزنا نقف مكتوفي الأيدي
دي سلبيه
و ما ضاع حق وراءه مطالب..!!؟
آاااه و تحيا الأمه العربيه...و مصر هي أمي ...نيلها هو دمي...رزها ف خضاري..و ياريت سندوتش حوواشي من خيرك يا مصر
و بعدين نقلب علي ميلودي و لا مزيكا و هاتك يا رقص...و برده ندلع دينا و فيفي و الحلوين دول
يا سيدي بعيداً عن الشعارات الحمضانه اللي أكلت دماغنا محدش أبداً قال إنك تبقي سلبي
و الإسلام أبداً لم يكن دين سلبيه..بل هو الإيجابيه بعينها..و لكن بإعمال العقل
يعني...تقدر تقوللي إيه سبب اللي إحنا فيه ده..ليه حالنا وحش كده..!!؟
طبعاً...خد عندك...الإقتصاد بتاعنا بايظ...و التعليم فاسد....و الإداره بقه في مصر هي المشكله الحقيقيه ..عندنا فساد إداري
فساد....جميل...و فساد ده مش معناه إن مفيش قيم صالحه بتحكمنا..!!؟
أيوه
لطيف...طيب و إيه هي أعظم قيم ممكن تصلحنا..أليست دين الله العزيز الحكيم..!!؟
طبعاً...طبعاً...أكيد
يعني المشكله الأساسيه هي بعدك و بعدي عن دين الله عز و جل..!!؟صح..!!؟
إمم أكيد إستنتاج منطقي
طيب...عملت إيه آلاف المظاهرات و الإعتراضات...علي مدي عشرات السنين..!!؟
الناس اللي بتقف في المظاهره ديه...هل بتقف تصلي الفجر...!؟في جماعه...!!؟صف أول...!!؟؟
طيب حتي في البيت....حطيت وشك في الأرض ليه..!!؟
أصلي أنا كمان مبصليش الفجر في جماعه..!!؟
طيب عرفت بقه إيه الحل..!!؟
أكيد..!!؟
يبقي مين اللي سلبي...اللي قام ليله يعبد ربه...و صلي الفجر..و نفع نفسه و نفع أمته بأنه بني شخص مسلم صالح
و إلا اللي وقف نهاره في مظاهره...و قضي ليله في سهره..و خلص علي كده يومه..!!
أنا مبقولش إن اللي يتظاهروا..كلهم وحشين..!!؟
بس مش معايا إن المظاهرات ديه ممكن تكون أخرت الدعوه سنين..!!؟
يمكن كلامك فيه كتير صح
و يمكن حد يقول ... إني مش صح
بس كلمتين و بس
إرجع للدين
و إعرض نفسك عليه
شوف هيقولك إيه