Wednesday, February 28

مبينكسفوووش.....!!؟؟

السلام عليكم و رحمه الله و بركاته

اللهم صلي علي سيدنا محمد و علي آل سيدنا محمد كما صليت علي آل سيدنا إبراهيم و بارك علي سيدنا محمد و علي آل سيدنا محمد كما باركت علي آل سيدنا إبراهيم في العالمين إنك حميد مجيد

ثم أما بعد

إعذروني إذا كان الموضوع قد يتخلله بعض الخروج عن سياق الأداب العامه و قد يشوبه بعض الألفاظ التي أكرهه أن أكتب بها

بقولك إيه يا أستاذ

إيه يا خط يا أحمر

سيبك من المقدمات ديه و إزلف علي الموضوع علي طول..؟

إزلف...آاااه ياني...طيب يا سيدي

إيه بقه العنوان ده قصدك بيه إيه...هم مين اللي مبينكسفوش

أقولك يا سيدي

البنت اللي مش محجبه...أو المحجبه...حجاب من إياااه..أبو بنطلون جينز محزق و خرقه علي شعرها

ناهيك عن الجانب الديني

و هي ماشيه في الشارع مبتنكسفش

إزاي يعني

يعني..و هي عارفه إن كل الدنيا مبحلقه لامؤاخذه في كل حته في جسمها مبتتحرجش

مش عارف ليه الفكره ديه في دماغي بقالها كتير...بس أنا ...أنا

ذكر...رجل يعني

و بتكسف جداً

يعني أقصد

زماااااان.. و أنا صغير..زماااااان...يعني من بتاااااع عشر سنين كده..زمااااااان بقه

و انا عندي مثلا تلاتاشر أربعتاشر سنه...كنت أسمع مثلاً الناس الكبار و هما بيقولوا خللي بالك يا فلان الأندروير باين

بأدب و إحترام فائقين...و كان الموضوع فيه حرص بالغ علي حياء الشخص..و إعذروني إن كان الكلام فيه تدني

لكن دلوقتي...الموضه إن الواد (بتاع سوسو و توتو) يمشي و الأندروير باين

و البنت لو البنطلون مش مفرتك جسمها و كل حته فيها بتوصف نفسها تبقي بنت بيئه و دقه قديمه

يعني...أنا مش فاهم

إزاي ممكن حد يقبل كده

لما أسمع بنت بتكلم بنت...بتقولها قوليلوا (يابن ال....) أفتح بقي بقه انا ساعتها و لا أعمل إيه
و يبقي إسمه إيه ده
عالم مبتنكسفش

بس إنت مكبر الحكايه حبتين يا عم الشيخ... و بعدين إنت إيه اللي بيخليك تبص..؟؟؟؟؟

شوف بقه أهو إنت كده هتنرفزني عليك

يا عم ما أنا بنزل الشارع و أكيد غصب عني في مرات بتقع عيني علي المناظر ديه

و بعدين إنت ليه بتسفسط..هو أيهم أهم إن إحنا نناقش المظاهر العوجه في مجتمعنا و إلا نتصيد لبعض الأخطاء

و الا مطلوب إني أسكت ساكت و مفتحش بقي

طيب ... بس باااس بررراحه

أنا بقه مش هو ده موضوعي...أنا سألت نفسي سؤال

ليه الدنيا إتغيرت كده...ليه مفهوم الأدب و الحياء إختلف تماماً كده

بقت البنت اللي بتتكسف تكلم ولاد بنت شاذه

أصبح الولد اللي بيحمَّر وشه لما يكلم بنت ولد خيبه

الولد اللي بيحاول ميعملش علاقات مع بنات إسمه واد دقه قديمه
تخيل ده في بنات لما بيتقدملها عريس ممكن ترفض علشان هو ولد خاام و ملهوش تجارب..يعني مفرقعلوش إزازتين بيره و لا مشيش مع بنات قبل كده
تخيلوا ده في بنات...و آسف لكن هعمل إيه هم إسمهم كده بنات..بتشرب مخدرات عيني عينك مع ولاد
في بنات و ولاد محترمين لكن أنا بتكلم عن الشريحه السيئه اللي كل يوم بتزداد
و خايف يجي اليوم اللي يبقي ده العادي
زي ما أنا دلوقتي لما بسمع الكلام ده بقول عادي
مش عايز أقول عادي
عايزين نسأل ليه
مين غيرنا...!!؟؟

عارفين مين اللي غيرنا كده

فكرواااا

مين

ناس من جلدتنا..هما هما..هتلقيهم في كل حته

عارفين زوزو...بتاعت يا واد يا تقيل

عارفين النوعيه ديه من الأعمال..و أنا بتكلم عن الأعمال..و مليش دعوه بالممثله لأنها عند مليك مقتدر الآن

عارفين العنب العنب العنب

عارفين دينا...الرقاصه

و سبحان الله دينا ديه بقه فيها شئ عجيب

سبحان الله لو قلت دينا بس...متعرفهاش و متتعرفش إلا إما تقول دينا الرقاصه

شوف ربك...لما يذل حد..محدش هيعرفها بعد كده إلا إما تقول الرقاصه..سبحان الله

نرجع لموضوعنا

عارفين مين اللي عمل فينا كده..ناس من عينه هاله توهان

و إيناس الدغيدي اللي إسمها أعتقد إنه أشتق من إسم حيوان من الحيوانات المتطوره في معيشتها و تعيش في تجمعات

لاحظ إيناس و نسناس

عارف مين كمان.. ناس زي نوال السعداوي مثلاً

اللي بتقول إنها هربت من الجو الجنسي المنتشر في مصر بسبب ظاهره تعدد الزوجات

و هربت راحت فين بسلامتها...راحت أمريكا

طبعا الرف الأمريكي حيث لا جنس و لا يحزنون

حيث الجنس هناك يباع مثل الليمون

لكن تقول إيه..و من يضلل اللهٌ فما له من هاد

عارفين إيه كمان بوظ قيمنا كده...و ده أنا هكتب عنه بوست لوحده

الوصله...!!؟

وصله إيه يا عم..؟؟

وصله الدش..حسبي الله و نعم الوكيل..أنا بجد بيصعب عليا الراجل بتاع الوصله ده..شايل ذنوب شعب بحاله في رقبته

إيشي تي في لاند و إيشي موفي وان و تو

و القنوات ديه بتعرض برامج في منتهي السفاله

يا جماعه

بس بس...يا عم إنت قاعد تتكلم و أنا سايبك من الصبح..الكلام ده كله إحنا عارفينه كويس..ريح نفسك بقه الله يهديك..!!؟

الله يهدينا و يهديك يا خط يا أحمر..إلزم أدبك عشان بجره ماوس همسحك من الموضوع خالص..ماشي

و إسمع الكلام للآخر

;)ماشي

يا جماعه أحنا مبنكتبش هنا عشان نكتب و خلاص

و لا عشان تقروا..و ممكن حد منكوا يقولوا برافو موضوع جميل

و لا حتي اللي هيقفل و ميكملش قرايه

إحنا بنكتب عشان تتولد فكره..و الفكره تكبر بكره..و تتبني..واقع في مجتمعنا

عشان نغير

و نتغير

إنت و أنا إبتدي بنفسك

و بأهل بيتك

و بقرايبك..من غير متدخل نفسك في مشاكل الإختلاط..يعني متكلمش بنت عمك..كلم إبن عمك الأول و هو يكلم أخته و هكذا...!!؟ قيمنا تتغير

يا جماعه اللي بيحصل في التليفزيون ده مش أي حاجه كده و خلاص..لأ..ده متخططله من زمان

الناس اللي ذكرتهم دول مسنودين و بيجدوا دعم كبير من بره

إيد علي إيد تعلي

إيد علي إيد تساعد

إحنا أقوي لأننا

بنعمل لحب ربنا

إحنا أقوي لأننا

نطبق سنه نبينا

أحبكم في الله

لو تعلمون كم يحتاج أخيكم لدعائكم..لدعوتم لي بالليل و النهار

أدعوا لي أن يهديني الله

9 comments:

يا قلبي يا غريب said...

السلام عليكم...اشتاق الي الكلمه الطيبه و اشتاق الي النصيحه الغاليه و اشتاق الي من احبه في الله فاذهب الي اهل الجنه اسال الله ان تكون و ان نكون منهم اخي و الله احبك في الله
اما ما في كلامك هو حق و الله احزن لاني اعرف ان تلك التي خلعت من حيائها اكثر ممكن خلعت من ملابسها لم تذق طعم الايمان لم تذق طعم الالتزام فهي يا اخي محرومه من ذالك و الله انظر اليها بشفقه اكثر من نظرتي اليها انها تعصي الجبار جل جلاله و الله يا اخي الموضوع هو اكبر من تبرج ... و الله الخلل في الاصل التربيه رب البيت قبل اي شيء الم يقل الله في كتابه يَا أَيُّهَا الَّذِينَ آمَنُوا قُوا أَنفُسَكُمْ وَأَهْلِيكُمْ نَاراً وَقُودُهَا النَّاسُ وَالْحِجَارَةُ عَلَيْهَا مَلَائِكَةٌ غِلَاظٌ شِدَادٌ لَا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ [التحريم : 6]
الكلام للمؤمنين نسال الله ان نكون منهم انظر الي مسؤليه الاب و الاخ هي يقي اهله من النار و ما يقرب اليها من قولا او عمل و يا لها من مسؤليه .. نسال الله ان يثبتنا علي الحق و اياكم و ان يحفظ بناتنا و اخواتنا من شياطين الجن و الانس

khaled said...

السلام عليكم
فيه حاجات كتير ابتدت حرام و بقت هى كل حاجة فى بلدنا
يعنى التليفزيون انتشر و الناس الملتزمين قالوا عليه حرام
اشتغلوا فيه الناس غير الملتزمة
و الدش انتشر الناس قالوا ده بيجيب حاجات مش كويسة و بعد عنه الناس الملتزمة و انتشر الدش
انتشر بين الناس كالنار فى الهشيم
و طبعا اللى اشتغل فيه امثال الرقاصات و المومسات و كتروا و الاخوة الملتزمين بعدوا و غابوا عن الساحة و سابوا عقول الناس يدخلها افكار الشيطان من فتنة بقت من النادر ان يكون فيه بيت ما دخلتهوش
فيه قنوات كتير جميلة و ملتزمة زى الفجر و الحكمة و الناس و قنوات كتير لو سيبنا الدش للفساد القنوات دى مش هتنتشر
و ده ينطبق على مجالات كتير
فيه برضه بصيص امل
معذرة للاطالة

BinO said...

أخي في الله
صدقت في قولك
بس هو ده توارد أفكار ولا أيه
ومش محتاج أقول أكتر من كده لأنك عارف رأيي

أهل الجنه said...

بينو

يا بني إحنا قاعدين في وش بعض بقالنا بتاع تمن تسع سنين

أينعم في إختلاف في بعض وجهات النظر و طرق التعبير عنها

بس الإتجاهات واحده

و أنا أحبك في الله

أهل الجنه said...

يا قلبي يا غريب

يا أخي كلماتك بتحيرني و و بتخليني فعلاً أفتكر نفسي بكتب كلام كويس

نظرتك للأمر مشابهه لنظرتي تماماً في كثير من الأحيان أنظر إلي البنت المتبرجه و أقول ألا تستحين من الله

و أعود و أقول لنفسي

ألا تستحي أنت من الله

أدع الله لي أن يرزقني منه حياءاً

و أن يزدني إليه قرباً و له تعففاً

أهل الجنه said...

خالد

يااااا مرحب

بقالك كتير غايب عني

كلماتك فيها وجهه نظر معتبره و لكن لي تعليق عليها إن أذنت لي

إمتناع الأخوه من الملتزمين بتطبيق شرع الله في كل كبيره و صغيره من حياتهم عن المشاركه في مثل ما ظهر في حياتنا من فتن قد يكون إمتناعاً له وجهه نظر في بدايه الأمر و هي الإبتعاد عن الفتن إذ كانوا يخشون علي أنفسهم الفتنه

و هذا ما حدث بالفعل مع كثير ممن تصدوا دون علم راسخ و تحقق لهذه الفتنه فضلوا و أضلوا

و الأمثله كثيره من دعاه الفضائيات الذين يظهرون علينا في قالب أرادوا صبغه بصبغه الدين ليبيحوا للناس الربا و المعازف و الإختلاط

و أيضا في بادئ الأمر لم يكن الأمر بهذا التدني فكان التليفزيون يقتصر علي القناتين الأولي و الثانيه

و لما أصبح الأمر في تدني بشع إنطلق مشايخنا و علمائن عن طريق بعض القنوات التي تنتهج منهجا واضحاً لا تمييع فيه مثل تلك التي ذكرتها أنت أمثال الشيخ يعقوب و الشيخ حسان

و لكن هل الأمر أساساً مسئوليه هؤلاء برمته

أقول كلا

لماذا؟؟ لأن هؤلاء العلماء ما يفعلون أما ملياارات الوليد بن طلال التي تنفق علي هيفاء و غيرها

فالأمر بيدنا نحن أيضا

و نبدأ بأهلونا و ذوينا و الله الموفق

عذراً علي الإطاله

يا قلبي يا غريب said...

السلام عليكم
اين انت يا اخي؟

أهل الجنه said...

السلام عليكم و رحمه الله و بركاته

أخي أنا متواجد

احبك في الله

إنـســانة said...

بصراحة لأ مابيتكسفوش

كان عندى واحدة زميلتى فى الكلية بس بتلبس بنطلونات ضيقة وكدة
فسألتنى إنتى اللى ليه مش بتحبى كدة .. او بمعنى آخر ايه رأيك فى اللى بيلبسوا كدة؟؟

قلتلها أقل حاجة انهم مش بيتسكفوا

فى وشها كدة وهى جمبى والله اتكسفت وانا بقولها كدة

بس برده احنا مش ملايكة وربنا يكتبلنا الهداية جميعاً

اللهم آمينت