Tuesday, February 20

قل موتوا بغيظكم (نقاش مع وهابي)..؟

السلام عليكم و رحمه الله و بركاته
بص بقه من أولها أهوه أنا بقولك....محدش هيرحمك من أصحابنا إياهم...و أنا مش هحوش عنك
هاهاها....إزيك يا خط يا أحمر...وحشتني بقالك بوستين مش موجود...الناس وحشها نقارك
مالك بقه يا سيدي خايف من إيه
ماهو المثل بيقول...البوست باين من عنوانه
إمم...طيب إحنا مش متفقين إننا نسمع بعض الأول
.....دايما تغلبني كده....!!!
عارف إنت طيب يعني إيه وهابيه..؟؟
وهابيه..ديه ...يعني...حاجه وحشه قوي...دول الإرهابيين...المتزمتين
الكلام ده إنت قريته في مرجع أو كتاب موثوق فيه
و لا قريته لمين...!!؟
يعني ما كلهم بيقولوا كده...الناس بتوع الحريه و المعارضه و الكلام ده..و بتوع الشيعه كمان
طيب مش عيب متسألش صاحب الشأن الأول
و بعدين يا أخي هو إحنا ليه في كل حاجه نقول أهم شئ التخصص...و في الدين كل واحد يتكلم علي هواه
عارف إنت كده عامل زي مين...!!؟
مين...!!؟
راجل غلبان عنده حمار بيحبه قوي و لقي الحمار عارف طريق الغيط لوحد فأفتكر إن الحمار بيفهم في كل حاجه فلما سنانه وجعته قام فاتح بقه في وش الحمار...قام الحمار هابش أنفه..!!
مين بقه الحماااااار....!!؟
الحمار..محدش حمار يا عم أنا بقولك مثلاً مثلاً
إمم...(; مش مستريحلك....!!
المهم خلينا في موضوعنا...إن المفروض أول حاجه أسأل أهل العلم..و أعتمد علي مصادر أهل السنه
عارف إنت ليه بيستخدموا كلمه الوهابيه
ليه..بجد عايز أعرف...ليه؟
علشان يفهموك إن الوهابيه ديه شئ غير الإسلام...يعني بدل ما يقولوا السنه أو الإسلام يقوموا يقولوا الوهابيه عشان يبقي اللفظ أخف....لكن المهم بقه في الآخر لفظ وهابيه ده بيوصف ايه...؟
يعني إيه أول حاجه بتيجي في دماغك لما بتسمعه؟؟؟
أكيد التشدد...يعني مثلاً
اللحيه و الجلباب القصير...و النقاب مثلا...!! ديه بالنسبه للمظهر يعني
أولا أنا فعلاً مبسوط بصراحتك
طيب ممكن أسألك سؤال
هو الإمام الشافعي و الإمام مالك و أبي حنيفه كانوا وهابيين
يعني لما يكون إجماع جمهور العلماء علي وجوب إطلاق اللحيه...يبقوا كلهم وهابيين
بلاش
هو عبد الله بن عباس و بن مسعود و الصحابه رضوان الله عليهم كانوا وهابيه
بلاش ديه كمان
مش أحسن نرجع بالصوره لأصلها...يعني بلاش يا سيدي الإمام محمد بن عبد الوهاب
خلينا في النبي محمد بن عبد الله صلي الله عليه و سلم
أليس هو من أمر بتقصير الثياب...و إطلاق اللحيه
يبقي الأمور ديه من الدين
مش وهابيه بقه و لا حاجه
ماشي أنا معاك بس برده فيها تشدد شويه
ممكن أسألك سؤال..!!؟
هل كان رسول الله صلي الله عليه و سلم متشدداً؟؟
لأ...لأ ..لا طبعاً حد يقدر يقول كده حاش لله
إذن أكيد أوامره مافيهاش تشدد...صح و لا إيه
طبعاً صح...بس يعني تفسيرات العلماء و الزمن إتغير و كده يعني..!!
عندك شك إن علم الله سبحانه و تعالي وسع كل شئ و كل زمن..!!؟؟؟
لا طبعاً يا أخي..؟؟
طيب إذا كان إحنا البشر بعقولنا القاصره لما بنيجي نعمل مشروع مثلاً...بنعمل خطط مستقبليه لعشرات السنوات القادمه صح..!!؟
أكيد طبعا
هل تظن إذن أن الله الخالق الذي خلق عقلك هذا الذي تفاخر به..أنه سبحانه و تعالي غاب عنه أن يكون شرعه مناسب لكل زمان و مكان..!!؟؟
لا طبعا..حاش لله
إذن فما أوحاه الله سبحانه و تعالي إلي نبيه صلي الله عليه و سلم هو ما يصلح لأي زمن و لأي مكان
صح
إممم....طبعاً
طيب ممكن أسألك سؤال كمان...شايف إنتشار اللحيه و النقاب اليومين دول..؟؟
آه أكيد
طبعاً حاجه جميله إنتشار الإلتزام و التدين..!؟
فعلاً حاجه تفرح
لو كان كل واحد حلق لحيته بقه من زمان و محدش صبر علي هذه السنه العظيمه...مش كان زماننا دلوقتي منعرفش أصلاً يعني إيه لحيه
عندك حق ده إحنا كنا هننساها تماماً و كانت هتطمس من الدين
يبقي مين اللي عنده حق...الراجل اللي وقف مكانه و ثبت و تمسك بسنه نبيه...و لا الأخ التاني اللي قالولوه إحلق راح حالق...و مقاومش عشان دينه
أكيد طبعا اللي قاوم
طيب يوم القيامه إن شاء الله ... ألا تحب أن تلقي نبيك و أنت متمسك بسنته كامله و لم تفرط في شئ منها..؟
نعم أكيد
انت مش معايا إن حياتنا ديه مهما طالت في الآخر قصيره..و إن الموضوع كله إنك إنت و أنا نستحمل شويه
أمال مين الرجاله اللي هيشيلوا الدين...مين لما أنا و إنت هنقول لا يا عم أنا مقدرش علي تطبيق السنه..؟؟
عندك حق طبعا إحنا
و بعدين يا سيدي اللي قاعدين يقولولنا وهابيه و إرهابيه
إحنا بنلاقيهم يعني بدل ما ينقدوا الأفلام و الفيديوكليبات بينقدوا في السنه
يعني مسمعناش حد فيهم هاج و ماج علي دينا الرقاصه (الله يهدينا و يهديها) يعني
و لا مثلا قال لسعد الصغير إيه الفجور و قله الأدب اللي بتقولها ديه
و لا حد منهم هز طول سعادته و راح رفع دعوي قضائيه ضد مرتادي شواطئ العراه مثلا في الساحل الشمالي
أو حتي عمل تصويت من أجل إغلاق شاطئ لابلاج مثلا في مارينا
آه صحيح
و ده بقه يوضح قصدهم تماماً....الناس ديه اللي بيضايقها حاجه واحده بس هي إنتشار الدين و الإلتزام
و لما يشوفوا واحد أطلق لحيته مثلاً
يقولك ده أصلهم غسلوا دماغه
هاها...آه صح
طيب هو الغسيل مش يعني نضافه...يبقي عندهم حق الراجل دماغه نضفت
فإنما سمي الغسيل من النظافه
فنشكرهم علي إعترافهم ده
تصدق عندك حق
طبعاً...أنا بسمع و بشوف تعليقات...بجد ما يقلهاش إلا جاهل
و فعلاً مشكله الناس ديه إنها بتتكلم بجهل شديد
و لما بيتكلموا عن الإسلام
إما إنهم بينقلوا آراء لغربيين
أو آراء لناس كل ثقافتهم إتربت عند أقدام الفكر الغربي
يعني ناس ثقافتهم ريحتها وحشه ... مع الإعتذار للريحه الوحشه
كفايه يا عم ضحكتني
سيبني ..إحنا فعلا محتاجين نرجع لديننا و نفهم
محتاجين نقرا
لمصادرنا الموثوق فيها
البخاري و مسلم
كتب بن كثير
التاريخ الصح مش شغل الرعاع اللي بيعملوه علينا
الفقه ناخده من منابعه الصح
من آراء الصحابه و التابعين
و لما ألاقي شيخ مهما كان مين بيقول كلام عكس كلام الصحابه
يبقي كلامه ده مكانه الزباله
حتي لو كان شيخ و بعمه و طالع في التليفزيون و و
يعني ميجيش واحد يقولي ده أنا عندي بيانو في البيت و بعزف ناي بعد ما عرفنا كلام سيدنا عبد الله بن مسعود في الغناء و المعازف مثلاً
لا و الأدهي يقولك ده انا بحب أسمع عبد الوهاب
طيب مقالوش عليه وهابي ليه ده كمان
هاهاها عندك حق
شفت بقه إن الناس ديه ناس مرجعيتها كره الإسلام و كره أي مظهر يذكرهم بإنتشار الإلتزام
لذلك يكرهون اللحيه و النقاب
مش عايزين الناس تظهر إلتزامها
مش عايزين الإسلام يبان في مجتمعنا
المنظر بينرفزهم
وأنا صراحه أشفق عليهم لأني أعلم مدي حنقهم
ولكن...أجابهم رب العالمين فقال
قل موتوا بغيظكم
بس خلاص
و يجعله بإذن الله عامر يارب
عقلي و عقلكوا طبعاً

10 comments:

مش كفايه بقى said...

ربنا يباركك فيك اخى فى الله ..اسلوبك بسيط ويصل الكلام بسهوله لاى شخص
ربنا يجعله فى ميزان حسناتك وتداوم على كده على طول

ma_3alina said...

عارف .. لما اسمع حد بيقول على مسلم دا وهابي ...
بفتكر على طول القساوسة اللي مش بيقولوا علينا مسلمين وبيقولوا علينا محمديين .. المحمديين بيقولوا .. والمحمديين يعتقدوا .. والديانة المحمدية .. عشان ما يقولوش علينا إن احنا مسلمين لله ..
وعلى كل .. إنهم يكيون كيدا وأكيد كيدا
جزاك الله خيرا

khaled said...

جزاك الله خيرا اخى
على الموضوع الاكثر من رائع و الذى يروى احتياج كل مسلم فى داخله

أهل الجنه said...

جزاكم الله خيراً إخوتي

أحبكم في الله و الله

يا قلبي يا غريب said...

السلام عليكم ورحمه الله ..الذين قالوا وهابي ما هم الا روافض او مبتدعه او علمانيين او صوفيه او جهلاء في اقل وصف لهم او اعداء للدين بشكل عام ...و لله الامر من قبل و من بعد
و جزاكم الله خيرا علي اسلوبك الرائع

باب البحر said...

جزاكم الله خيرا أخي.

و الله حسب علمي إن الوهابية يختلف تعريفها باختلاف الفرق المعادية.

كما بينت . أراد الأعداء إطلاق تسمية على أهل السنة . كي يوهموا الناس أنهم غير أهل السنة .. و كرهوا أن يسموهم (المحمديون) نسبة للشيخ محمد بن عبد الوهاب . فوقعوا في مطب أكبر و سموهم (الوهابيون) نسبة لله عز و جل الوهاب !!.

و تعريفهم يختلف باختلاف الفرق المعادية - كما أسلفت -:

فالصوفية: (و كما قال الشيخ علي جمعه في أحد تسجيلاته الصوتية) يرونهم أصحاب اللحى و الجلباب القصير و الكرش . يدعون العلم و لا يعلمون إلا كتب منتقاة . لا يصلون في المساجد ذات الأضرحة.

و الشيعة: يرونهم أعداء آل البيت . هم و من وافقهم على حب الصحابة . يعتقدون كذبا و زورا أنهم يكرهون عليا رضي الله عنه و آل البيت و يكنون الحب للمنافقين (كما يدعون) من الصحابة.

ربنا يهدي.

مسلم said...

باب البحر

مرحبا بك في المدونه

كلامك جميل

و أضيف عليه قول العالمانيين فهم يقولون أن الوهابيه أصحاب عقول متأخره و ممسوحه

مبرمجين من قبل أصحاب النفط

و لا حول و لا قوه إلا بالله

Anonymous said...

كلام حق يراد به باطل وانت تعلم انك لكذاب يكفيك ان تعلم ان هناك من يعلم وليس الجهلاء الذين يقرؤا لك

Anonymous said...

سيطر الوهابيون على الحكم، وأصبحت كلمتهم هى الأعلى، لم يكتفوا بالأفكار فقط، ولكنهم نزلوا إلى الميدان، بدأو فى نهاية عام ١٩٢٥ بتدمير مايسمى بقبور آل البيت، حطموا قبرى خديجة زوجة محمد و امه آمنة وأغلقوا غار حراء الذى قيل ان محمد تلقى فيه الوحى، وعندما بدأ الوهابيون نشاطهم الارهابى بدأو بأقرب الناس اليهم، نبيهم، وتناقلت صحف العالم أخبار تخريب الوهابيين للآثار المقدسة في الحجاز، وأوفدت حكومة إيران لجنة للتحقيق فيما حدث، خرب الوهابيون قبور آل البيت دون إذن ودون علم بن سعود، وليس فى هذا تبرئة لساحته لكنها إدانة له، فقد فعلها الوهابيون بعد أن شعروا أنهم أقوى منه واشد سطوة، فلم يهتموا حتى بان يخبروه بعملهم التدميرى، لقد قال بن سعود: حزنت عندما تأكدت أن للآثار حرمة وكرامة عند الكثيرين من المسلمين فى أنحاء العالم ولذلك سأبذل الجهد! فى إعادة هذه الآثار إلى ما كانت عليه

لم يفعل ابن سعود شيئا. لم يرمم الآثار المقدسة، ولم يعدها إلى سابق عهدها لا، اكتفى بالتصريحات فقط. كان عبد العزيز بن سعود عاجزا عن مواجهة الوهابيين الذين مضوا لتنفيذ خططهم بشتى الطرق، ولم يراعوا في ذلك سلطة ملك ولا حرمة قبور آل البيت، لقد أرادوا السيطرة فقد منحهم الملك الضعيف الفرصة فاغتنموها حتى النهاية، ففرضوا أفكارهم بالقوة، كانت أفكارهم رجعية متزمتة ومبادئهم سطحية، فقد اعتبروا قبور آل البيت آلهة فأعلنوا عليها الحرب ومنعوا شد الرحال لزيارة قبر الرسول، سنكون سطحيين بالطبع إذا اعتقدنا أن الوهابيين كانوا يهدفون إلى نشر هذه الأفكار فقط فلقد وضعوا السيطرة على العالم الإسلامي هدفا لهم ولما كانت مصر هي صاحبة السيادة فقد اعتدوا عليها. كان الاعتداء ماديا في البداية، فقاموا بالاعتداء على المحمل الذي كان خيرا ورخاء ينتظره السعوديون كل عام بفارغ الصبر

Anonymous said...

إن مصر تتعرض ومبكراً جداً لمخطط سعودي للسيطرة علي مصر وصياغتها بشكل يتناسب مع الجو والشكل والروح الوهابية.. وهي روح في مجملها ضد الحياة.. وروح منافقة تعيش علي السطح الطقوس الإسلامية بحذافيرها.. لكنها تحت الثياب تسبح فوق بحيرة من الفساد والمعصية والعفن وقطع كل الطرق مع الله، أدرك السعوديون أنهم من الصعب أن يحتلوا مصر عسكرياً.. أن يأتي اليوم الذي يجلس فيه مواطن سعودي ليحكم مصر ويخطط لها مستقبلها قاهراً وقامعاً.

لكن الاحتلال ليس عسكرياً دائماً.. وجنود المعارك والحروب ليسوا عساكر مسلحين بالبنادق والمدافع والرشاشات، فهناك جنود آخرون كانت مهمتهم محو الشخصية المصرية، طمس ملامحها وجعلها بلا روح.. إن الإسلام الذي يعيشه المسلمون إسلام يتصالح مع الحياة.. ينسج بينه وبينها علاقة من نوع خاص لا تقوم علي القهر والتهديد والوعيد.. ولكن تقوم علي أن المصري يعرف ربه ويطمع في وجهه طوال الوقت.. وعندما تضيق به الحياة وتظلم حلقاتها.. فإن يد الله تمتد إليه من بين الظلمات لتنقذه في الوقت المناسب.. هذه الحالة من التصالح لم تعجب السعوديين فقرروا تصدير إسلامهم إلينا من جديد.
عبر آلاف المصريين الذين عملوا في السعودية جاءت الأفكار الوهابية.. شكلاً ومضموناً.. كان معظم هؤلاء مجرد عمال وصنايعية خرجوا من مصر وهم يحلمون بلقمة عيش.. فإذا بهم يعودون ومعهم ما لم يحلموا به من المال، عادوا وهم يلبسون الجلباب السعودي وبدأ تنتشر في مصر محلات لتفصيل الجلباب السعودي.. ولا يرتديه المصري فقط.. بل يضع في جيبه العلوي سواكاً كبيراً وكأنه سلاح يمكن أن يدافع به عن نفسه.. وكأن هذا السواك هو شهادة إسلامه.. ومادام الجلباب أصبح سيد الموقف.. فلابد أن كل رجل يرتديه ترتدي زوجته النقاب.. ولا مانع إذا كان من نفس لون وتصميم النقاب السعودي.. إن المصريين لا يميلون بطبعهم إلي الألوان السوداء فهي مقبضة.. لكن النقاب بألوانه جاء من السعودية ليحتل الشوارع المصرية.. وعندما تسير في بعض الشوارع المصرية.. فإنك لا تشك لحظة في أنك تسير في أحد أحياء السعودية.

الزي وحده لم يكن كافياً.. فعبر قنوات عديدة دخلت مصر كتيبات صغيرة عليها أسماء شيوخ السعودية الكبار الذي يحمون بظهورهم المذهب الوهابي أمثال ابن باز وابن عثيمين وصالح المنجد وغيرهم.. وهذه الكتيبات التي تباع في الغالب مجاناً تجدها تصل بسهولة إلي أيدي الشباب.. لا مكان في هذه الكتب لأي شيء حلال فكلها فتاوي تحريم لكل شيء وأي شيء.. وكأنهم أرادوا للناس أن يعيشوا العذاب مرتين.. إن هذه الكتب تطبع في مكتبات عديدة تحصل في معظمها علي تمويل مباشر من جهات سعودية.. وتخيل أن التكوين النفسي والعاطفي للشباب يمكن أن ينمو ويتصاعد علي أنغام هذه المحرمات.