Monday, February 19

يا قلبي يا غريب

السلام عليكم و رحمه الله و بركاته
ملحوظه: يرجي قراءه الموضوع بالكامل
عمرك حسيت إنك مجروح
عمرك حسيت إن في عز ما إنت طاير...جناحك إتكسر
عمرك حسيت إنك عايش بين الناس مدبوح
عمرك حبيت
عمرك عشقت كلام الليل و الغني
عمرك دب في قلبك نبض و إفتكرته نبض الهنا
عمرك ضحيت
عمرك عشقت حد و حسيت
إنه هو كل الحياه
عمرك دوبت في حبيبك ذوباناً إلي منتهاه
عمرك شفت الشمس في عين حد بتحبه...عمرك عشت الفجر في جبين حد أمرك يهمه
عمرك غيرت عليه بجنون
عمرك كنت في عز غضبك...حنون
عمرك حسيت إنك و إنت معاه ملكت الكون
عمرك طيرت..من غير جناحين
عمرك كان نفسك تجري دمك لحبيب..عمرك حسيت في جسمك بلهيب
لما بيغيب.
عمرك ضاع حلمك
و إنحبس جوا عينك دمعك
إنكسر قلبك
حسيت بحنين
قطع ملامحك
داس علي دقات قلبك
عمرك عشت من غير روح
إنسان فاضي قلبك مدبوح
عمرك حسيت إنك في عز ما عايز تصرخ خايف بجرحك تبوح
عمرك لميت قلبك ..خدته في إيدك و نسيت عيدك..قعدت إنت و هو بعيد
قاعد علي بحيره الهوي
..نفسك تركب شراع النسيان
عمرك عينك دارت حولك..و إنت لا حولك
حد يعينك و لا إيد إنسان
عمرك عشت في ذكري و عشقت النسيان
و كنت فاكر مشكلتك هي أقوي عذاب
حسيت إنك تايه مش لاقي الباب
عمرك فكرت...بعد ما تعبت ده كله و إحترت
إن الحياه لو كل هدفها كلمه عشق و لحن عذاب
يبقي إحنا عايشين في سراب
عمرك فكرت...إن العشق ده خيبه و غمه
إن في حاجات كتير تانيه مهمه
إنك واحد في كيان أمه
إنك واحد في رقبته هم الإسلام
لو حسيت
عمرك ما تنام
طول ما الأم حاضنه وليدها
ماسكاه في إيدها
و رصاص الغدر بيملي الأركان
لسه شايف إن عشقك يستاهل أحزان
طول ما الطوبه بتصرخ في إيدين طفلي
و الأم تنادي و جوزها بيجري
يزف وليده للجنه بإيده و عنيه بتبكي
طول ما صوتها بيدوي في ودان كل الأمه ...صونوا الإسلام
عمرك ما تنام
قلبك يصحي و ينسي عشقه
يذكر ربه
يشيل هم دينه و همه
حب الهوي مش كل همومك
في أهم منه
حب الله
حب رسولك
مش كلمه تقولها...لا لا لااااااا
ده سلوك تعيشه في ليلك و يومك
أنا زيك... و زي كل شاب
عشت كل ده..و أكتر منه كمان
و بعد كل ده...لقيت طوق النجاه...مركب ماشيه في وسط الضلمه رميتلي حبالها...و بفضل الله
لقتني ركبت و عن كل اللي قلته من شويه بعدت...قلبي رجعلي الحمد لله
عمرك سجدت تشتكي لله
حاول تسجد...لربك و أقعد..إحكي اللي نفسك تكتبه...عمرك كلمت ربك كده...صدقني هو ده الحل الوحيد
العشق إذا خالط القلب...سكنه و ليس بخارج منه إلا بقوه و يقين لا يأتيان إلأ بالإستعانه بالله
إعلم أخي و إعلمي أختي
أن كل علاقه تجمعك بشاب أو فتاه في غير ما أمر الله أن لها أثرها الضار علي قلبك
إعلم و أعلمي أن ما قدره الله هو ما سيكون يقينا
عمرك حبيت ربك زي ما حبيت غيره
عمرك كان كل همك رضاه
عمرك قضيت ساعه في ليلك مناجاه
عمرك حبيت نبيك صلي الله عليه و سلم
عمرك حبيت دينك زي ما حبيت حبيبك أو حبيبتك
الحب مش بس معناه...حبيب و حبيبه و غنوه و مركب في النيل و شكل جميل..و و و ..
الحب أعلي من كده بكتير
و لما يجي الوقت المناسب...هتكون حبيبتك زوجتك
و حبيبك زوجك...و هيكون اللي بيجمعكوا برضه حب الله
و لو لسه الجرح في قلبك قايد
و لهيبه يوم عن يوم تلقاه زايد
يبقي إسمع نصيحتي
إعلي علي ضعفك
إركب موجه أملك
هلل و إرفع إيدك و انت بتشاور علي جزيره فرحك
جدد عمرك
حزنك علي اللي فاتك مش هيزود صبرك
إفتح قلبك...متخافشي
إرسم حلمك ...قوم و إمشي
إنت أقوي من ضعفك
أكيد تقدر تفوق من همك
و قبل كل ده إستعين بالله ربك
إسجد قول...يا رب من غيرك ليه و أنا مبتلي و قلبي مكسور
إسجد حس ب الذل
قدام الخالق ربك
إسجد قول...يا رب جيتلك
و لمين راح أروح لو مش هرمي حمولي عندك
قف زي المسكين علي بابه...و أكيد برحمته هيفتحلك
قوم نور قناديلك
قوم و إسجد ساعه من ليلك
ربك أعلم
ربك أكرم
ربك قريب
بس إنت تفكر
تعالي و إشكي و مين أكرم
من ربك مين غيره يسمعك
تعالي إتكلم قول كل اللي بيوجعك
معظم الأفكار جاءت إرتجاليه..فأرجو إن ألفاظي متكنش مفتعله...و أرجو أن تكون خالصه لله تعالي
و أن تبلغكم منها النصيحه
و أرجو أني أكون وصلت و لو فكره صغيره
و مش عايز أطول عليكوا
بس
اللي هزني و خلاني أقرر أكتب البوست ده سببين
أولهم مدونه شخص عزيز عليه...أنا معرفوش شخصيا و يمكن من ساعات مكنتش أعرفه
بس لما زارني و زرت مدونته ... قلبي وجعني
و إفتكرت إني من قريب كنت زييه
و ثاني سبب إن أنا أصلا الموضوع ده بيألمني قوي...موضوع العلاقات العاطفيه بين الشباب و البنات و اللي بيجي من وراها
بجد أنا من أكتر الناس اللي بيقطع قلبي كل قصه حزينه منهم
وحش قوي لما تشوف قدامك شخص بيدبل
شخص عايش جسد و بس روحه عنه بترحل
و لأني جربت عارف أكتر...إزاي الموضوع ده في حياه كتير من الناس بيأثر
بس ده عمره ما بيحصل و إنت مستعين بالله
و بجد و الله العظيم
مالهوش حل
إلا إن ربك يطهر قلبك

8 comments:

رفقه عمر said...

مش عارفه بعد كلامك دة ممكن كلام يتقال عارف علشان هو خارج من القلب فتحس فيه الصدق ويدخل القلب لان فعلا تعلققك بالله بيخلى الواحد بجد عندة عزة نفس غريبه وقوة عزيمه اغرب انا فعلا اكتر لحظه حستها بفايدة الايمان يوم وفاة اختى رحمه الله عليها حسيت بسكينه غريبه ورضا تام بقضاء الله فهمت بس ساعاتها هى دى ثمرات القرب من الله هى نزول الرحمات فى وقت الشدة ويمر كل شئ بسلام
ربنا يجعل هذه المدونه الجميله فى ميزان حسناتك امين يارب العالمين

أهل الجنه said...

هذا كلام أنا لا أستحق أن أوصف بأعشاره

و يعلم الله أن بي من البلايا ما لو إطلعتم عليه لرمقتموني بأحقر النظرات

عموماً المهم أن تنالنا الفائده مما يكتب

و أن يرزقنا الله الإخلاص

بالنسبه للموضوع أنا فعلا عندي قد الكلام ده عشر مرات

لأن الموضوع فعلاً محتاج نقف مع بعض

و نوعي بعض

و ننصح بعض

لو كل واحد نصح أصحابه

و إجتهد و أخلص لله

أكيد بإذن الله الوضع هيتغير

اللهم إستخدمنا و لا تستبدلنا

khaled said...

كلامك جميل و بالرغم من ارتجالك الا ان اسلوبك رائع و قالب جميل لنصائح ما اشد احتياجنا لها من زمن

يا قلبي يا غريب said...

أَنِّي مَسَّنِيَ الضُّرُّ وَأَنتَ أَرْحَمُ الرَّاحِمِينَ

يا قلبي يا غريب said...

السلام عليكم ورحمه الله و بركاته.
اشهد الله اني احبكم في الله

أهل الجنه said...

أحبك الذي أحببتنا فيه يا أخي

BinO said...

جزاك الله خيراً أخي في الله محمد
وكلامك رقيق جداً رغم أنه ما بيتناسبش مع شخصيتك العصبية :)
ولكن الله يفعل ما يشاء
طبعاً أنا بدعبك
ربنا يكرمك و يريح بالك أن شاء الله

أهل الجنه said...

جزاك الله خيراً يا أخ بينو

طبعا بينو ده صديقي و عشره عمر من حوالي 8 أو 9 سنين دلوقت

و أشهد الله أني أحبه في الله