Sunday, February 11

أنا حي.....طب عايش لإيه...!!!!؟

السلام عليكم أحبتي و رحمه الله و بركاته
بعد ما كتبت بوست (أنا حي) و حصلت حبه حاجات كده....سألت نفسي....طيب أنا عايش ليه...!!؟؟
ههههه....ليه..؟؟
إتفلسف علينا يا عم براحتك....سمعني...ليه..!!؟؟
طيب يا خط يا أحمر هستحمل غلاستك و هكمل
الحكايه يا سيدي جاتني نتيجه المدونات و اللي بشوفوا فيها و خصوصا بعض المدونات التي تتسم بإتجاهاتها الليربراليه
عندك ... إستني.... ليبراليه إيه يا عم ... كلمني بالهجايص
ليبراليه ديه يعني بالبلدي كده ثقافه الحريات ... يعني كل واحد حر في إنتماءاته و إعتقاداته و أي حاجه..!!!؟؟
ده بإختصار طبعاً
المهم يا سيدي الفاضل .. الناس بتوع الحريات دول تجدهم في أي حته طالعين كده...تسأل عايزين إيه يا عم ...يقولك عايزين الحريه
عايشين ليها يعني...بهائيين يقولك حريه...ملحدين...يقولك حريه...وزير الصفاقه يقولك حريه...شيعه برده حريه
و فيهم حاجه كويسه
إيه..؟؟
إنك تحس إن عندهم حاجه عايشينلها...هي ديدنهم اللي بيرددوه ليل نهاااار
الحريه
طيب لما هما عاجبينك أمال في إيه بقه..!؟؟؟
لا مين قال إنهم عاجبيني...!!! أنا قلت في حاجه حلوه
إنهم عايشين لشئ ....بس المشكله هل الشئ ده كويس...؟؟
بمعني...!!!؟
بمعني...أنا بحس بصراحه إن الناس ديه عامله زي الطفل الصغير اللي ضحكوا عليه ببزازه...فقعد يعيط علي البزازه و نسي أمه...مع إن الأم هي الأساس
بس هو بقه أصبح شايف إن البزازه هي اللي بتشبعه..!!!
إممممم معاك ...معاك ....كمل كمل
ماشي يا جميل إنت ....آااااه لو تفضل كده علي طول...المهم
بص يا سيدي...هسألك سؤال مهم قوي
هل أنت حر.....!!!!؟
طبعاً...!!
لأ غلط
إيه.....إظبط يا عم الأستاذ...انت هتغلط و لا إيه..!؟؟؟؟؟؟
لا ... بس فعلاً إنت مش حر
إنت عبد
عبد لله
يأمرك و ينهاك
صح و لا لأ..!!؟؟
أكيد طبعا....بس..!!!
من غير بس...سيبني أكمل
يعني إنت في الدنيا ديه مبتتصرفش بمزاجك و لا علي كيفك...إنت بتتصرف بحريه في المساحات التي أتاح الله فيها الحريه...و تنتهي بنواهي الله و تأتمر بأوامره...ليه
لأنه الذي خلقك ... فسواك فعدلك و هو سبحانه أعلم بما يصلح حياتك
ماشي يا سيدي متفقين..!!
جميل نيجي بقه لنقطه مهمه
المساحات التي أتاح فيها الله سبحانه و تعالي الحريه وفقا للإختلافات الشخصيه هل أنا حر أن أفعل فيها ما أشاء
لا....أنت حر أن تفعل ما تريد في ما تحسنه فقط و بما يصلح و لا يفسد
يعني إيه دي كمان يا أستاذنا..!!!!؟؟
يعني مسنفعش دكتور يقولي أنا حر أصمم عماره...مثلاً
لكن ينفع مهندس يبتكر طريقه جديده لبناء العماره توافق ما تعلمه و بناء علي دراسات تجريبيه مسبقه..!
آاااه كده فهمت..كمل..!!
كده موضوع الحريه أصبح واضح أعتقد ... بمعني أنه إذا تعرضت لأمر ما سواء ديني أو دنيوي فعلي أولا أن أعرف هل أمرني ربي بشئ في هذا الموقف بالتحديد
ثم بعد أن أعلم موقف الشرع أبني رد فعلي بناء علي ذلك
أظن يعني إن الدين يسر مش عسر...فمتعقدهاااش أحسن يقولوا عليك متطرف أو متعصب..؟؟
خايف عليه إنت هااااا..!
طيب إنت مش عارف إن الله قال ( و ما خلقت الجن و الإنس إلا ليعبدون)
فكيف تكون عبادته و أنت تجلس علي الإنترنت مثلا...!!!
تكون عبادته أولا بألا تفعل ما نهاك عنه عن طريق النت و تعرف ما يجوز و ما لا يجوز
ثم أن تبتغي بهذا العمل وجه الله تعالي فتنوي به نصره الدين أو النصح للمسلمين أو التعلم و المطالعه
ماشي ديه واضحه..
و بالمثل في كل شئ.....يبقي ده بقه مش تعصب...ده دين و حياه كامله تحياها لله رب العالمين
و بعدين بالنسبه لكلمه التعصب فيها مشكلتين
أولا: إنها كلمه نسبيه جداً فمثلا عمرو دياب ممكن يقول علي عمرو خالد متعصب...و عمرو خالد مثلا ممكن يقول علي فلان إنه متعصب
ثانيا: و هي مبنيه علي أولا إن ما دامت نسبيه هكذا فلازم يكون فيه مرجع نرجعله...و هو كتاب الله و سنه نبيه صلي الله عليه و سلم...فطالما ثبت الأمر في سنه النبي صلي الله عليه و سلم أصبح من غير الجائز أن نقول عليه تعصباً
لأن وصف الشئ بصفه يستلزم إلحاقها بفاعل الشئ
و رسول الله ليس أبداً متعصباً صلوات ربي و سلامه عليه
و حاش لله أن يكون دينه و شرعه شرع تعصب...!!!
ثم أن التعصب ربما يكون محموداً إذا كان لشرع الله و سنه نبيه...ده في ناس بتفخر و هي بتقول أنا أهلاوي متعصب
فسبحان الله أليس دين الله أولي بأن تكون لدينا حميه عليه
و لكنها حميه و عصبيه منضبطه بضوابط الشرع و كما علمنا نبينا (ص) و ليست عصبيه جاهليه
فهمت بقه فهمت......كمل موضوع الحريات و الناس بتوع الحريات..!!!؟
طيب...أنا عايز بقه بعد ما وضحنا علي قد حالنا مفهوم الحريه أقول حاجه
أيهم أحق أن أدافع و أناضل عنه....شرع ربي الذي أنعم علي و خلقني
أم الحريات التي في كثير من الأحيان تكون في مواضع لا يرضاها الله تعالي
إزاااي يعني..!!؟
أنا فاكر مره أيام موضوع غفير الصفاقه (فاروق حسني) واحد من بتوع الحريات كانت بتهاجم الوزير
و قالت ما معناه: أنا مبهاجمش الوزير عشان الحجاب فرض و لا لأ...أنا مليش دعوه...لكن أنا بهاجمه عشان الحريه
كل واحد حر في لبسه..!!!
سبحان الله...هذه الحريه و إسمحولي العفنه التي دفعتك دفعا للنيل من الوزير بمقالاتك أهي أشرف قدراً من دين الله حتي تثوري له
أهي أعلي منزله عندك من حرمه دين الله
و حرمه المؤمن التي هي عند الله أكبر من حرمه البيت الحرام
بس متكبرش الحكايه جايز مش فاهمه و لا حتي...مش عارفه في الدين..!!؟
أولا أنا أعلم إنها فاهمه و فاهمه كويس كمان
ثانيا : حتي لو مش فاهمه ... ديه تبقي مصيبه أكبر
لأنها كده أولا فتنه لكل مفتون....بتتكلم في اللي هي مش فاهماه و كأنها فاهماه
و بعدين دي واحده ممكن كتير يقرولها...عشان كده قلنا الحريه أن تفعل ما تشاء بإحسان فيما تحسن و تفهم
الحاجه التانيه اللي عايز أقولها...
هو مثلا الدفاع عن حريه الأقباط....هل سيوفرون هم للأقباط ما حرمهم منه الله
هل هم أعدل من الله
إذا كانت الإجابه بلااااااا طبعا
إذن فليس هناك من هو أعدل من رب العالمين
فلنطبق شرع الله
فتكون لنا جميعا الحريه المبتغاه
و عشان كده كنت بسأل...طالما إني عندي فرصه في الحياه
ليه مش كل واحد فينا عنده هدف بيعيشله كده
ليه الناس اللي عندهم أهداف باطله و فيها وجهات غير صحيحه دؤوبين في عملهم كده و أهل الحق مقصرين
ليه مش عايش و ليلي و نهاري بعمل من أجل إعلاء كلمه الله
أذكر كلمه معجزه لهدي شعراوي: قالت مفتخره بأنها كانت أول من إرتدي الشورت في الجامعه قالت...و كانوا ينقدونني و كنت أصبر عليه
يااااااااااااااااااااه بتقول و كنت أصبر عليه
تصبر علي إيه ديه .... علي لبس الشورت في الجامعه...علي باطل
و أهل الحق...يااااه علي أهل الحق في زماننا ده...نفسهم قصير قوي
الأقصي بيصرخ حد إتحرك
الأقصي بينادي حد إتهز
نعيب زماننا و العيب فينا
و ما لزماننا عيب سوانا
إختر لنفسك
ما تعيش له
و يجعله يارب إن شاء الله
عقلكوا و عقلي طبعاً

10 comments:

ma_3alina said...

مدونة رائعة وأسلوب جميل وبوستات أكثر من ممتازة .. انتظر منك المزيد والمزيد .. واسأل الله أن يجازيك كل خير ويرفع درجاتك في الجنة

أهل الجنه said...

و الله أني أحبك في الله

رفقه عمر said...

طريقتك متميزة فى عرض المواضيع وانا معاك ان للحريه حدود وخصوصا فى الدين الاسلامى بس فى قول بيقول ليس بعد الكفر ذنب يعنى طالما ان الانسان اختار الله ربا والاسلام دينا ومحمد صلى الله عليه وسلم يبدأ بقى يعمل بمقتدى هذا القول يعنى حريته مقيضه باوامر ربنا لكن الانسان اللى بعلن انه بريئه من الاسلام هو حر بقى يعمل ما بدا له لا حدود للحريه عندة لانه ليست لديه ضوابط شرعيه يمشى عليها ههو ماشى على هواه وبس وربنا قال على لسان نبييه صلى الله عليه وسلم لكم دينكم ولى دين بس بقى لو دخلتم فى دينى يبقى ترضوا بكل الضوابط فيه وكل الحدود مش حد يجى ويقول انا حر
يعنى لاتلوم على الكافر لانه ليس لديه ضوابط يمشى عليها فبيهبل بقى وبيقول اى حاجه وبيعمل ى حاجه
جزالك الله خيرا ويجعلن واياك من اهل الجنه امين يارب العالمين

أهل الجنه said...

رفقه عمر
معك حق في جزء من كلامك و لكني أريد أن أقول ماذا عن الكافر الذي يرتضي أن يعيش في دوله مسلمه

هل من حقه أن يطالب بتطبيق شرع الكفر

أم عليه أن يلتزم بشرع الإسلام الذي إرتضي هو مسبقاً أن يعيش في دوله دينها و مصدر تشريعها الإسلام

القضيه مش قضيه الحريه بقدر ما هي قضيه محاوله فرض الصبغه العالمانيه علي الناس

عارف أنا بحس إن هناك بعض العقول الخربه تحاول إستدراج بسطاء هذا الشعب من الغلابه الذين تفشت فيهم الأميه إلي تطبيق العالمانيه

لكن الله أركسهم...فها هو الإلتزام يعود يانعا في بساتين المسلمين

و ما هي إلا سويعات و تمور الأرض و نسترد قدسنا و أقصانا بإذن الله

Me2resh said...

جزاك الله خيرا
انها المرة الاولى التى اجد فيها مدونة تشرح صدرى

أهل الجنه said...

جزاكم الله خيراً و أرجو من الله أن يوفقنا جميعاً لما يحبه و يرضاه

ma_3alina said...

انظر ما تقول .. انظر ما تقول .. انظر ما تقول
فإني علمت أن رسول الله صلى الله عليه وسلم قال : إن الله يحب الذين يتحابون في الله ، ويحب الذين يتقاعدون فيه ، ويحب الذين يتباذلون فيه ، ويحب الذين يتزاورون فيه ، ويحب الذين يتجاورون فيه

أهل الجنه said...

Ma_3ALINA

كيف لا أحبك و قد دعوت لي أن يرفع الله درجاتي في الجنه

اللهم إرزقنا سلامه النيه و إجمعنا تحت ظلك يوم لا ظل إلا ظلك

أنا حقيقي مبسزط بردود كل من يزور المدونه

بس مش المهم الردود و انا مكتبتش المواضيع ديه عشان الردود

أنا بكتب علي أمل إننا ننفذ و نتحرك

قبل ما ييجي وقت نقول...كاااان في ناس بتقول

لازم نتحرك

الأقصي بيضيع و العراق بتضيع

و يا عالم الدورم علي مين

يا قلبي يا غريب said...

الي الاخ الاسكندراني...و الله كان نفسي اكلم زيك بس الناس تحبط انا نفسي محبط ..كلامك جميل بل رائع استمر و ربنا ياجرك عليه خيرااا

أهل الجنه said...
This comment has been removed by the author.