Monday, February 5

سياسه التعريه...؟

السلام عليكم و رحمه الله و بركاته
ملحوظه: خلي بالكوا من الخط الأحمر أحسن ده غلباوي قوي
يمكن يكون العنوان غريب حبتين
نوضح الأول و بعدين نتكلم
سياسه التعريه هي تلك النظريه الإعلاميه التي تعتمد علي توعيه الخلق من الظواهر المجتمعيه الضاره بواسطه عرض الظواهر عاريه تماماً للجمهور
مش فاهمك و هبدأ أهرش في دماغي كدهه
طيب بص يا سيدي الفاضل هسألك سؤال صغير
سؤال كده واضح و صريح...!!!
عبرآلاف المسلسلات و الأفلام و الأغاني و البرامج الحواريه أو قل إن شئت الحربيه عن مشكله مثلاً زي مشكله الإدمان.....هل قلت نسبه الإدمان....!!!!
مش واخد بالي سعاتك
أقولك ياسيدي بالرجوع لإحصائيات وزاره الصحه المصونه من 25 سنه كان في حسب كلامهم يعني 25 ألف مدمن
طيب و دلوقتي
دلوقتي عندنا 3 مليون مدمن يا باشمهندس
آاااااه
نرجع بقه مرجوعنا لسياسه التعريه
معاك
سؤالي بقه يعني بعد كل الأفلام و المسلسلات اللي بتتكلم عن إن المخدرات ديه وحشه و كخ
و يقولك ياااه بص إزاي الواد بقي مدمن
ياااااه بص إزاي عمل دماغ
ياااااه بص تاجر المخدرات الوحش معاه فلوس كتير
بص بقه إزاي هيطلع براءه
و إزاي الواد بعد معمل دماغ جامده حب بنت برده جامده
و شوف بقه هيتعالج و يعيش مع حبيبته في تبات و نبات
ياااااه خللي بالكوا إوعوا تبقوا مدمنين زي عموا اللي إتجوز ده
طيب و انت بقه حضرتك قصدي يعني سعادتك عايز تقول ايه
آه أقولك يا سيدي عايز أقول إن علاج المشكله عمره ما يكون بعرضها كده بهذه الصوره العريانه و التي في معظم الأحيان تزيد شغف المشاهد بها
يعني آلاف الأغاني إتكلمت عن الحب و الغدر و الخيانه و الناس الوحشه ديه
و لسه البنت بينضحك عليها و لسه الواد بيقول أنا الغلطان مش إنت
اتكلمنا كتير عن الجواز النيله العرفي
و مافيش فايده نسبه الزواج العرفي دلوقتي في الجامعات وصلت لرقم يخض
مع إن الواد ناوي مقدما يخلع
و البنت عارفه إنه هيبيعها في أول محطه
طيب بس يا أستاذ عشان متصدعش دماغنا انت شايف إيه الحل
انا مبسوط قوي بصراحتك ديه
الحل هو و متفتكرونيش إخوان
الإسلام هو الحل
طبعا الإسلام دين جميل و فيه عبر كتير و بعدين يا عمنا إحنا مسلمين...متفتح معايا شويه
لاااا لا أنا مبقولش شعارات و مش قصدي إننا مش مسلمين
انا بتكلم جد قصدي نرجع لديننا بجد و نشوف ربنا سبحانه و تعالي علمنا إزاي نحل المشاكل
شوف قصه سيدنا يوسف كده و تأمل
الله سبحانه و تعالي عندما أراد أن يضرب لنا المثل في العفه بعفه سيدنا يوسف عندما راودته إمرأه العزيز عن نفسه
لم يقل الله سبحانه و تعالي أنها كانت ترتدي كذا أو أنها ظلت تنثني أمامه هكذا أو...أو...
لكن الحديث لقرآني جاء ليعرض مشكله و ليصف حال نبي الله يوسف فيها و يدلل أن إستعانه يوسف عليه السلام بالله و لجوء قلبه له سبحانه كان هو السبب الأول في نجاته من الفتنه...و بذلك لم يأت الحديث شهوانيا مثيراً للغرائز و إنما جاء محرضا علي الفضيله دافعاً إليها
الأسلوب القصصي كان أساساً من الأساسات لتعليم الإنسان و توجيه فكره
لكن أي قصص....القصص المنضبط الذي يوظف لتوجيه القارئ إلي الغايه بدون إثاره شهواته
يعني متجيش واحده من الوحايد إياهم تقولي أصل البوسه بتخدم القصه
بالله عليكوا يا خوانا أنهي بوسه ديه اللي خدمت القصه قبل كده
و خدمتها إزاي يعني
خدمات جليله طبعاً يا أخي مش في شباب تعبان بيتفرج...معلش انا بهرج يا أفندينا
حتي الجد بقي فيه تهريج...أرجوك متهرجش في الهزار
و يجعله عامر
الموضوع ممكن ننتكلم فيه أكتر من كده
بس كفايه أحسن تزهقوا مني

3 comments:

khaled said...

اتكلموا كتير عن المشاكل و الفوا كتير و مثلوا كتير لكن ما فيش فايدة
و يمكن الافلام دى كانت السبب لنشر الافكار السودة دى
و الحل بسيييييييط جدا
الاسلام
شكرا ليك
موضوع جميل

أهل الجنه said...

شكرا يا خالد علي متابعتك للمدونه

أهل الجنه said...

الصراحه كمان الوضع بقه يقرف

كل يوم مسلسل

و فيلم

و أغنيه

و يقولولك إحنا بنمثل المجتمع

و بنحل مشاكله

و تبص يا أخي تلاقي المشاكل بتزيد

حاجه بجد تقرف