Monday, January 29

خط أزرق و خط أحمر

السلام عليكم و رحمه الله و بركاته

أول حاجه شوفتوا أنا بدأت البوست بأيه....بالسلام اللي هو إيه تحيه الإسلام

طب و ده فيه ايه يعني

فيه كتير طبعا

طب ليه

لأن أغلب المدونات و أشهرها...و اللي بيقولوا انها جامده جدا و حاجات من ديه مفيش واحدها فيهم لقيت فيها موضوع ابتدي بتحيه الإسلام

مش عارف ليه....هي الحريات اللي بيتكلموا عنها فيها ما يمنع انهم يبدأو مواضيعهم بالتحيه؟؟؟

ييييه انت شكلك كده متعصب و هتزهقنا...؟

لا و الله يا سيدي بس ديه حاجه صغيره من ضمن الحاجات

طيب في إيه تاني سمعنا.... ;)

معظم المدونات ملهاش كلام إلا عن الريس و ظلم الريس و إستبداد الريس....كأن مشكله حياتنا هي الريس

آه ده انت هتتفلسف بقه

يا سيدي سيبني أتكلم زي ما هما بيتكلموا

هو قبل الريس....كان في مين مخلينا ورااااا

ريس غيره....

طب و قبله

ريس تاني

يبقي الإستنتاج المنطقي إن بعده هيجي واحد تاني...و خلي بالكوا

الريس دلوقتي اتجاهاته غير اللي كان قبله يعني ده ديموقراطي و اللي قبله كان رأسمالي إنفتاحي و اللي قبله كان إشتراكي و اللي جاي ممكن يكون ليبرالي....؟؟

عايز تقول ايه خلصنا

عايز أقول يعني إن بصراحه كده كل واحد فينا و حتي انا جواه هذا المستبد موجود و عايش معاه

لاااااا ...ده انت بتخرف

بس إستني ..... هثبتلك...؟؟

إثبت سمعني....قول و اتحفني

شوف يا سيدي أبسط مثال المدونيين دول بتوع الحريات

مالهم ...فيهم ايه دول

هقولك

بص كده لما بيعملوا أي بوست و حد يدخل ينتقدهم و يرد عليهم و يبين ان كلامهم أو وجهه نظرهم غلط بيعملوا ايه

ايه

بيردوا بمنتهي العنف....و مبيرجعوش عن اللي هم مقتنعين بيه...و حتي مبيردوش علي الدليل بالدليل

و ممكن يتطور الموضوع و يستخدموا ضدك زرار السحل قصدي المسح النووي و يمارسوا عليك القمع الفكري

و ساعات يوصوا حد من طرفهم يدخل يهاجمك و ممكن يشتمك كمان

تمام زي بلطجيه الإنتخابات

كل ده و المدونين دول كل اللي في إيديهم هي زراير الكي بورد اللي بيحركوا عليها أناملهم الضعيفه

طيب ما بالك بقه لما يكون المدونين دول تحت إيدهم جهاز أمني بجحافله دي كلها هيعملوا ايه بقه في اللي يعارضهم

أممممم

طبعا هيسحلوه و يخلوه يبص علي الشمس في عز الظهر و يقول انها عطارد...!!!؟

طبعا الكلام ده ممكن ميبقاش علي هواااا الكثيرين

اممممم

سكت ليه طيب هقولك علي حاجه تانيه

أظن إن أحسن منقعد ليل نهار نتكلم علي الريس و ظلم اللريس....إنت مش شايف إن إحنا عندنا في مجتمعنا مشاكل كتير غير الريس

يعني مثلا تعاملنا مع بعض و النفسنه اللي بين الناس و بعضها و قله الأخلاق .... هو ده برده الريس اللي عمله

قصدك ايه يعني

قصدي إن في حاجات تانيه و مظاهر كتيره في مجتمعنا تستاهل إننا نتكلم عنها و نحاول من خلال شبابيك المدونات إنن ننشرها علي حبال الفكر الحر في المجتمع

طيب انت بالله عليك مش شايف قد ايه شبابنا هايف
يا سيدي ده تسعين في الميه من شبابنا الفطاحل بيشربوا لا مؤاخذه مخدرات

و مقضيين نص وقتهم يغيروا نغمات المحمول

طيب بالله عليك مسمعتش عن نفخ العضلات بالسيليكون زي لامؤاخذه نفخ ال....

كنا بنتريق علي البنات اللي بيقعدوا نص اليوم قدام المرايه يسبسبوا شعرهم دلوقتي الرجاله الفطاحل بيقضوا يومهم كله يظبط في الشعرايه اللي واقفه في جنب راسه و يليطها بالجل

هم دول الرجاله اللي هيشيلوا البلد و الأمه

بصراحه كلامك صح

شفت بقه ان العيب فينا زي ما بقلك و قبل ما نقول الريس المفروض كل واحد يبص علي نفسه و يسألها

هل هو فعلا بني آدم محترم

يعني تخلص من سلبيات حياته و ارتقي علي شهواته و أطاع ربه و نفذ شرعه

كفايه كده النهارده

و يجعله عامر

2 comments:

رفقه عمر said...

مدونتك جميله انا اول مرة ادخلها وكلامك بجد صح ربنا يوفقك فى اللى جاى انشاء الله

أهل الجنه said...

جزاكم الله خيراً

و هذه شهاده من أخ أضعها تاجاً علي جبيني